સુપ્રીમ કોર્ટે મનીષ સિસોદિયાની જામીન અરજી ‘નોટ બિફોર મી’ કરી, અન્ય બેંચમાં થશે સુનાવણી
નવી દિલ્હીઃ દિલ્હીના પૂર્વ ડેપ્યુટી સીએમ અને આમ આદમી પાર્ટી (AAP)ના નેતા મનીષ સિસોદિયાની મુશ્કેલીઓનો અંત નથી આવી રહ્યો. ગુરુવારે સુપ્રીમ કોર્ટમાં સિસોદિયાની જામીન અરજી પર સુનાવણી મોકૂફ રાખવામાં આવી હતી. . જો કે, અરજી પર સુનાવણી કરી રહેલા ન્યાયાધીશે પોતાને તેનાથી અલગ કરી દીધા છે. મનીષ સિસોદિયા લગભગ 16 મહિનાથી જેલમાં છે અને તેમણે ઘણી વખત જામીન માટે અરજી કરી છે
સુપ્રીમ કોર્ટના ન્યાયાધીશ જસ્ટિસ સંજય કુમારે મનીષ સિસોદિયાની જામીન અરજી પર સુનાવણી કરવાથી પોતાને અલગ કરી લીધા છે. દિલ્હીના પૂર્વ ડેપ્યુટી સીએમ વિરૂદ્ધ મની લોન્ડરિંગ અને દારૂ નીતિ મામલે ભ્રષ્ટાચારના કેસમાં કેસ નોંધવામાં આવ્યો છે. સિસોદિયાએ આ કેસમાં જામીન માટે સુપ્રીમ કોર્ટમાં અરજી કરી છે. જસ્ટિસ સંજીવ ખન્ના, સંજય કરોલ અને સંજય કુમાર આ કેસની સુનાવણી કરવાના હતા, પરંતુ કુમારે તેમાંથી પોતાને દૂર કરી દીધા હતા.
સર્વોચ્ચ અદાલતની બેન્ચે કહ્યું કે, મનીષ સિસોદિયાની અરજીની સુનાવણી અન્ય બેંચ દ્વારા કરવામાં આવશે, જેમાં જસ્ટિસ સંજય કુમાર ભાગ નહીં હોય. કોર્ટમાં કેસની સુનાવણી થતાં જ જસ્ટિસ ખન્નાએ કહ્યું, “અમારા ભાઈને થોડી સમસ્યા છે. તેઓ અંગત કારણોસર કેસની સુનાવણી કરવા માંગતા નથી.” આના પર આમ આદમી પાર્ટી વતી હાજર રહેલા વરિષ્ઠ વકીલ અભિષેક મનુ સિંઘવીએ બેન્ચને આ મામલાની તાત્કાલિક સુનાવણી કરવા વિનંતી કરી હતી.
એન્ફોર્સમેન્ટ ડિરેક્ટોરેટ (ED) અને સેન્ટ્રલ બ્યુરો ઑફ ઇન્વેસ્ટિગેશન (CBI) બંનેએ દારૂ નીતિ મામલે મનીષ સિસોદિયા વિરુદ્ધ કેસ નોંધ્યો છે. આનો ઉલ્લેખ કરતા સિંઘવીએ કહ્યું કે બંને કેસમાં હજુ સુનાવણી શરૂ થઈ નથી. તેના પર સુપ્રીમ કોર્ટે કહ્યું કે બીજી બેંચ 15 જુલાઈએ જામીન અરજી પર સુનાવણી કરશે. આ રીતે, મનીષ સિસોદિયાની જામીન અરજી પર સોમવારે (15 જુલાઈ) સુનાવણી થવાની છે.
