ટાટા ગૃપનો બીગ બાસ્કેટમાં પ્રવેશઃ હવે રિલાયન્સ, એમેઝોન સહિત રિટેલ માર્કેટ કંપનીઓ સાથે સ્પર્ધા થશે
નવી દિલ્હી: ટાટા ડિજિટલે ઓનલાઈન ગ્રોસરી બિગબાસ્કટમાં મેજોરિટી સ્ટેક હસ્તગત કરી લીધા છે. આ સોદાની સાથે જ દેશના સૌથી મોટા ઉદ્યોગ ગૃહ ટાટા ગ્રુપની હવે રીટેલમાર્કેટમાં મુકેશ અંબાણીની રિલાયન્સ રીટેલ, એમેઝોન અને ફ્લિપકાર્ટ જેવી દિગ્ગજ કંપનીઓ સાથે સીધી ટક્કર થશે. ટાટા ડિજિટલે આ ડીલ કેટલાક રૂપિયામાં થઈ તેનો ખુલાસો નથી કર્યો, પરંતું રેગ્યુલેટરી ફાઈલિંગ મુજબ, કંપનીએ બિગબાસ્કેટમાં લગભગ 64 ટકા ભાગીદારી ખરીદી છે.
ઈકોનોમિક્સ ટાઈમ્સના અહેવાલ મુજબ બિગબાસ્કેટના બોર્ડે આ સપ્તાહે જ આ ડીલને મંજૂરી આપી હતી અને ટાટા ડિજિટલે બેંગલુરુની આ સ્ટાર્ટઅપ કંપનીમાં શરૂઆતમાં 20 કરોડ ડોલરનું રોકાણ કર્યું છે. બિગબાસ્કેટમાં મેજોરિટી શેરહોલ્ડર ચીનનું અલીબાબા ગ્રુપ અને એક્ટિસ એલએલપી હવે તેમાંથી નીકળી ગયા છે. કોમ્પિટિશન કમિશન ઓફ ઈન્ડિયાએ ગત મહિને આ ડીલને મંજૂરી આપી હતી. બિગબાસ્કેટ અને ઓનલાઈન ફાર્મસી 1એમજી પછી ટાટા ગ્રુપની નજર ફિટનેસ સ્ટાર્ટઅપ ક્યોરફિટ પર છે. રીટેલ સેક્ટરમાં રિલાયન્સ ઈન્ડસ્ટ્રીઝ અને એમેઝોન સામે ટક્કર માટે આ મહત્વનું માનવામાં આવી રહ્યું છે.
સૂત્રો મુજબ, ટાટા ગ્રુપની ક્યોરફિટની ફાઉન્ડર મુકેશ બંસલ સાથે વાત ચાલી રહી છે. તેમને ટાટાના ડિજિટલ બિઝનેસમાં મહત્વની ભાગીદારી આપવામાં આવે તેવી શક્યતા છે. બંસલ ઓનલાઈન ફેશન રીટેલર મિંત્રાના કો-ફાઉન્ટર પણ છે. છેલ્લા 5 વર્ષથી તેઓ ક્યોરફિટ સંભાળી રહ્યા છે. બિઝનેસને એક પ્લેટફોર્મની નીચે લાવવા માટે સુપર એપ લોન્ચ કરવાની યોજના છે. ગ્રોસરી ઈ-કોમર્સ પર મોટો દાવ લગાવવાની સાથે-સાથે ટાટા ગ્રુપ હેલ્થકેર અને ફિટનેસમાં પણ રોકાણ કરી રહ્યું છે. માનવામાં આવી રહ્યું છે કે, તે 1એમજીમાં 55 ટકા ભાગીદારી ખરીદી શકે છે. હવે ક્યોરફિટને હસ્તગત કરવાને લઈને થઈ રહેલી વાતચીત એ વાતોનો સંકેત છે કે ટાટાની આ સેક્ટરોને લઈને કેટલી મોટી યોજના છે. ઈટીએ આ મહિને જણાવ્યું હતું કે, ટાટા ગ્રુપે ટાટા કેપિટલની અધિકૃત શેર કેપિટલ 1,000 કરોડ રૂપિયાથી વધારીને 11,000 કરોડ રૂપિયા કરી દીધી છે
