રાજસ્થાનના હલ્દીઘાટીમાં બનશે મહારાણા પ્રતાપની દુનિયાની સૌથી ઊંચી પ્રતિમા!

નવી દિલ્હી, 05 નવેમ્બર 2026: રાજસ્થાનના હલ્દીઘાટીમાં મહારાણા પ્રતાપની વિશ્વની સૌથી મોટી પ્રતિમાનું નિર્માણ કરવામાં આવશે. સરકારી કંપની ‘એનબીસીસી લિમિટેડ’ (NBCC Limited) 168 કરોડ રૂપિયાના ખર્ચે, પ્રવાસન સર્કિટના વિકાસના ભાગરૂપે આ નિર્માણ કાર્ય હાથ ધરશે. એનબીસીસીએ જણાવ્યું છે કે, રાજસ્થાન સરકારની ઐતિહાસિક અને સાંસ્કૃતિક વારસાના સંરક્ષણની પહેલના ભાગરૂપે, તેઓ હલ્દીઘાટીમાં ‘મહારાણા પ્રતાપ પ્રવાસન સર્કિટ’ વિકસાવશે.

NBCC એ રાજસ્થાન સરકારના પ્રવાસન વિભાગ અને રાજસ્થાન હેરિટેજ ઓથોરિટી સાથે એક સમજૂતી કરાર (MoU) પર હસ્તાક્ષર કર્યા છે. આ સમજૂતી કરાર હેઠળ, ચિહ્નિત કરાયેલા પ્રોજેક્ટ્સના આયોજન, ડિઝાઈન, અમલીકરણ તેમજ સંચાલન અને જાળવણીની જવાબદારી NBCC ની રહેશે.

રાજસ્થાન સરકાર દ્વારા મંજૂર કરાયેલા આ પ્રોજેક્ટનો ખર્ચ 168.39 કરોડ રૂપિયા (GST સિવાય) છે. આમાં પ્રોજેક્ટ મેનેજમેન્ટ કન્સલ્ટન્સી ફી ચૂકવવા માટે, પ્રોજેક્ટના વાસ્તવિક ખર્ચના 4.25 ટકા રકમની જોગવાઈનો સમાવેશ થાય છે. આ વિકાસકાર્યનું મુખ્ય આકર્ષણ હલ્દીઘાટી ખાતે મહારાણા પ્રતાપની વિશ્વની સૌથી ઊંચી પ્રતિમાનું નિર્માણ હશે. આ ઉપરાંત, અહીં એક વિશ્વસ્તરીય ઐતિહાસિક સંગ્રહાલય પણ સ્થાપિત કરવામાં આવશે, જેમાં આ મહાન યોદ્ધાને તેમના પ્રખ્યાત ઘોડા ‘ચેતક’ પર સવાર દર્શાવવામાં આવશે.

આ પ્રોજેક્ટમાં હલ્દીઘાટી સ્મારક ખાતે ટોપોગ્રાફિકલ પ્રોજેક્શન શોનો પણ સમાવેશ કરવામાં આવશે. આના માધ્યમથી, હલ્દીઘાટીના યુદ્ધનું ઐતિહાસિક મહત્વ અને તેની સાથે જોડાયેલી ઘટનાઓને એક ભવ્ય દ્રશ્ય અનુભવ દ્વારા રજૂ કરવામાં આવશે.

વધુ વાંચો: ટ્રમ્પનો મોટો સ્વીકાર! ઈરાન સંઘર્ષની અસર અમેરિકાની મધ્યસત્ર ચૂંટણી પર પડી