નવી દિલ્હી, 2 નવેમ્બર 2026: નશીલી દવાઓની ગેરકાયદેસર હેરાફેરી અને તસ્કરી સામે લડત ચલાવતા નારકોટિક્સ કંટ્રોલ બ્યુરો (એનસીબી) દ્વારા એક મોટો આર્થિક પ્રહાર કરવામાં આવ્યો છે. એનસીબીએ ડ્રગ્સના વેચાણથી કમાયેલા કાળા નાણાંથી ઊભી કરવામાં આવેલી રૂ. 20.10 કરોડની કિંમતની કુલ 25 સંપત્તિઓને ફ્રીઝ કરી દીધી છે. તપાસમાં બહાર આવ્યું હતું કે તસ્કરીના આ નાણાંને વિવિધ કંપનીઓના બેંક ખાતાઓ દ્વારા ફેરવીને આરોપીઓએ પોતાના અને પરિવારના સભ્યોના નામે આ મિલકતો ખરીદી હતી. સક્ષમ સત્તાધિકારી દ્વારા એનડીપીએસ એક્ટ હેઠળ 30 ઓક્ટોબર 2026ના રોજ એનસીબીના આ આદેશ પર મહોર મારવામાં આવી છે. ફ્રીઝ કરાયેલી મિલકતોમાં ઔદ્યોગિક પ્લોટ, દુકાનો, કોમર્શિયલ યુનિટ્સ અને રેસિડેન્શિયલ ફ્લેટ્સનો સમાવેશ થાય છે, જેને હવે વગર મંજૂરીએ વેચી કે અન્યના નામે ટ્રાન્સફર કરી શકાશે નહીં.
આ સમગ્ર કૌભાંડનો પર્દાફાશ 7 ફેબ્રુઆરી 2025ના રોજ અમૃતસરમાં 5,000 ટ્રામાડોલ ટેબ્લેટ પકડાઈ હતી ત્યારે થયો હતો. દવામાં હરિદ્વારની ‘જેઆર ફાર્માસ્યુટિકલ્સ’ અને દેહરાદૂનની ‘તિવારી મેડિકલ એજન્સી’નું નામ સામે આવ્યું હતું, પરંતુ તપાસ દરમિયાન માર્કેટિંગ કરતી કંપની અસ્તિત્વમાં જ ન હોવાનું ખુલ્યું હતું. એનસીબીની વિશેષ તપાસ ટીમની રાષ્ટ્રીય સ્તરની તપાસમાં ઉત્તરાખંડ અને હિમાચલ પ્રદેશની ફાર્મા કંપનીઓની સંડોવણી બહાર આવી હતી.
તપાસ દરમિયાન અત્યાર સુધીમાં આશરે 34 લાખ સાયકોટ્રોપિક ટેબ્લેટ્સ, 10.57 લાખ કોડીન કફ સીરપની બોટલો, 50 હજાર ટ્રામાડોલ ઇન્જેક્શન, 5 હજાર મિડાઝોલમની શીશીઓ અને આશરે 2,200 કિલો સાયકોટ્રોપિક પાવડર જપ્ત કરવામાં આવ્યો છે. આ નેટવર્કના તાર પંજાબ, હિમાચલ પ્રદેશ, રાજસ્થાન, ઉત્તરાખંડ, હરિયાણા, પશ્ચિમ બંગાળ અને ઉત્તર પ્રદેશ સહિત 7 રાજ્યો સાથે જોડાયેલા હોવાનું સામે આવ્યું છે અને અત્યાર સુધીમાં 17 આરોપીઓની ધરપકડ કરવામાં આવી છે.
આરોપીઓની મુશ્કેલીઓ વધી
હિમાચલ પ્રદેશના કાલા અંબ સ્થિત ડિજિટલ વિઝન અને વેલિંટન હેલ્થકેરમાંથી પણ મોટા પ્રમાણમાં ગેરકાયદે દવાઓ મળી આવી હતી. આ પ્રકરણમાં અંબાલા કેન્ટના કોનિક ગોયલ, મૈનિક ગોયલ અને તેમના પિતા પરષોત્તમ લાલ ગોયલ હાલ ફરાર ચાલી રહ્યા છે. એનસીબીના વારંવારના સમન્સ અને બિનજામીનપાત્ર વોરંટ છતાં તપાસમાં હાજર ન રહેનારા આ આરોપીઓની આગોતરા જામીન અરજીઓ સુપ્રીમ કોર્ટે પણ ફગાવી દીધી છે. હવે જપ્ત કરાયેલી સંપત્તિઓમાં આ પરિવારની મિલકતોનો પણ સમાવેશ થાય છે. એનસીબીનું માનવું છે કે માત્ર પ્યાદાઓને પકડવાને બદલે ડ્રગ્સની કમાણીથી ઊભા થયેલા આ આર્થિક સામ્રાજ્ય અને નેટવર્કને તોડી પાડવું જ આ કાર્યવાહીનો મુખ્ય ઉદ્દેશ્ય છે.
