ઉત્તરકાશી, 05 નવેમ્બર 2026: ગંગોત્રી નેશનલ હાઈવે પર સવારે ગંગનાની નજીક એક ઈનોવા કાર અનિયંત્રિત થઈને ભાગીરથી નદીમાં ખાબકી. ગંગોત્રી નેશનલ હાઈવે પર ગંગનાની નજીક ભાગીરથી નદીમાં એક ‘ઈનોવા’ કાર પડી જવાની ઘટના બાદ અત્યાર સુધીમાં પાંચ મૃતદેહો મળી આવ્યા છે. વાહનમાં કુલ સાત લોકો સવાર હતા.
ગુજરાતના છે મુસાફરો
પ્રારંભિક માહિતી મુજબ, તમામ મુસાફરો ગુજરાતના સાબરમતી વિસ્તારના રહેવાસી છે અને તેઓ ઉત્તરકાશીથી ગંગોત્રી ધામ તરફ જઈ રહ્યા હતા. જોકે, તેમની ઓળખ અને સરનામાંની સત્તાવાર પુષ્ટિ થવાની બાકી છે. અકસ્માત બાદ, નદીના તેજ પ્રવાહ વચ્ચે વોટર પોલીસ અને ડાઇવર્સ (ગોતાખોરો) દ્વારા ગુમ થયેલા લોકોની શોધખોળ કરવામાં આવી રહી છે.
નદીકિનારેથી ચાર વ્યક્તિઓના મૃતદેહો મળી આવ્યા
ગંગનાનીમાં ગરમ પાણીના ઝરાથી ડબરાની તરફ લગભગ 20 મીટર આગળ બનેલી આ ઘટનાની જાણ થતાં, જિલ્લા મેજિસ્ટ્રેટ પ્રશાંત આર્યના નિર્દેશો હેઠળ રાહત અને બચાવ ટીમોને કામે લગાડવામાં આવી. સ્થાનિક પોલીસ, એસડીઆરએફ (SDRF) અને 108 ઈમરજન્સી સેવાના કર્મચારીઓ તાત્કાલિક ઘટનાસ્થળે પહોંચી ગયા હતા. બચાવ ટીમોએ કામગીરી હાથ ધરીને નદીના કિનારેથી ચાર વ્યક્તિઓના મૃતદેહો બહાર કાઢ્યા.
વાહનમાં સવાર અન્ય વ્યક્તિઓની શોધખોળમાં જળ પોલીસ અને ડાઇવર્સ (ગોતાખોરો) જોડાયેલા છે. ઘટનાની ગંભીરતાને ધ્યાનમાં રાખીને, મનેરાથી NDRFની એક ટુકડીને પણ ઘટનાસ્થળે રવાના કરવામાં આવી છે.
આપત્તિ નિયંત્રણ કક્ષ અને પોલીસ તમામ મુસાફરોના નામ, સરનામાં અને ઓળખની ચકાસણી કરવા માટે કામ કરી રહ્યા છે. વહીવટી સ્તરે સમગ્ર પરિસ્થિતિ પર સતત દેખરેખ રાખવામાં આવી રહી છે.
આપત્તિ વ્યવસ્થાપન કેન્દ્ર અને તબીબી ટીમોને એલર્ટ પર રાખવામાં આવ્યા છે, જેથી બચાવ કામગીરી દરમિયાન મળી આવનાર કોઈપણ ઈજાગ્રસ્ત વ્યક્તિને તાત્કાલિક સારવાર આપી શકાય. અકસ્માતના કારણોની પણ તપાસ કરવામાં આવી રહી છે.
વધુ વાંચો: રનચેઝમાં વિરાટ કોહલીનો નવો વર્લ્ડ રેકોર્ડ! સચિન તેંડુલકર પણ પાછળ છૂટ્યા
