શિક્ષકોને યોગી સરકારની મોટી ભેટ, ટર્મ ઈન્સ્યોરન્સ અને સામાજિક સુરક્ષા ગેરંટી
લખનૌ, 9 જુલાઈ, 2026 – ઉત્તર પ્રદેશની યોગી આદિત્યનાથ સરકારે રાજ્યના શિક્ષણ જગત માટે એક ઐતિહાસિક અને અભૂતપૂર્વ પગલું ભર્યું છે. મુખ્યમંત્રી યોગી આદિત્યનાથે રાજ્યના આશરે 10 લાખ શિક્ષકો, શિક્ષણ મિત્રો, અનુદેશકો અને બિન-શૈક્ષણિક કર્મચારીઓને એક મજબૂત સામાજિક સુરક્ષા કવચ પૂરું પાડ્યું છે. ઉત્તર પ્રદેશ ભારતનું પહેલું એવું રાજ્ય બન્યું છે, જેણે પોતાના શિક્ષકોને 1 કરોડ રૂપિયાનું પર્સનલ એક્સિડન્ટ કવર, 1 કરોડ રૂપિયાનું કાયમી દિવ્યાંગતા કવર અને 1.6 કરોડ રૂપિયાનું એર એક્સિડન્ટ ઇન્સ્યોરન્સ કવર આપ્યું છે. દેશના અન્ય કોઈ પણ રાજ્યમાં શિક્ષકો માટે આવી વ્યાપક વીમા યોજના ઉપલબ્ધ નથી.
કેશલેસ સુવિધા માટે રાજ્ય સરકાર વાર્ષિક ₹450 કરોડની ચુકવણી કરશે
આ મોટી ભેટની જાહેરાત કરતા મુખ્યમંત્રીએ જણાવ્યું કે પ્રાથમિક અને માધ્યમિક શિક્ષણ વિભાગે આ માટે ભારતીય સ્ટેટ બેંક (SBI) સાથે એક મહત્ત્વપૂર્ણ કરાર કર્યો છે. સરકારે સ્પષ્ટ કર્યું છે કે તે પોતાના વચન પર અડગ છે અને શિક્ષકોને કેશલેસ તબીબી સુવિધા પૂરી પાડવા માટે દર વર્ષે 450 કરોડ રૂપિયાની વાર્ષિક ચુકવણી પોતે વહન કરશે. આ પગલું સરકારી કર્મચારીઓ અને તેમના પરિવારોને સ્વાસ્થ્યના મોરચે સંપૂર્ણપણે નચિંત કરનારું છે.
विद्यार्थियों के लिए सही मार्ग प्रशस्त करना शिक्षकों का कर्तव्य भी है और राष्ट्रीय दायित्व भी।
12 लाख शिक्षक व शिक्षणेत्तर कर्मचारियों एवं उनके आश्रितों को स्वास्थ्य सुरक्षा प्रदान करने वाली ‘मुख्यमंत्री शिक्षक कैशलेस चिकित्सा योजना’ का आज बाबा विश्वनाथ की पावन नगरी वाराणसी से… pic.twitter.com/hA18N7DcCJ
— Yogi Adityanath (@myogiadityanath) July 8, 2026
કાયમી અને કરારબદ્ધ શિક્ષકો માટે અલગ-અલગ સુરક્ષા કવચ
યોજના અંતર્ગત જે કાયમી શિક્ષકો અને કર્મચારીઓનો ચોખ્ખો માસિક પગાર 10 હજાર રૂપિયાથી વધુ છે, તેમને 10 લાખ રૂપિયાનું ગ્રુપ ટર્મ ઇન્સ્યોરન્સ કવર મળશે. આ ઉપરાંત, તેમને 1 કરોડનું પર્સનલ એક્સિડન્ટ કવર, 1 કરોડનું કાયમી દિવ્યાંગતા કવર અને 1.6 કરોડનું એર એક્સિડન્ટ કવર આપવામાં આવશે. કોઈ અણધારી ઘટનાના કિસ્સામાં બાળકોના શિક્ષણ અને પુત્રીઓના લગ્ન માટે અલગથી ‘એડ ઓન કવર’ પણ સામેલ છે. બીજી તરફ કરારબદ્ધ કર્મચારીઓને (પગાર 10 હજારથી વધુ) 30 થી 80 લાખ રૂપિયા સુધીનું એક્સિડન્ટ કવર અને 15 થી 30 લાખ રૂપિયાનું દિવ્યાંગતા કવર મળશે. ઓછો પગાર મેળવતા કર્મચારીઓને પણ એટીએમ કાર્ડના આધારે 2 લાખ રૂપિયાનું કવર મળશે.
સીએમ યોગી બોલ્યા- શિક્ષકો બાળકોનું ભવિષ્ય સુધારે, અમે તેમનું ધ્યાન રાખીશું
આ ઐતિહાસિક અવસરે મુખ્યમંત્રી યોગી આદિત્યનાથે એક ભાવુક અને કડક સંદેશ આપતા કહ્યું, “પ્રાથમિક અને માધ્યમિક શિક્ષણ વિભાગે ભારતીય સ્ટેટ બેંક સાથે કરાર કરીને દરેક શિક્ષક, શિક્ષણ મિત્ર, અનુદેશકને સામાજિક સુરક્ષાની ગેરંટી આપી છે. યુપી આને લાગુ કરનારું પ્રથમ રાજ્ય છે. તમે શિસ્તબદ્ધ વાતાવરણ બનાવીને બાળકોને મહેનત અને પ્રેમથી ભણાવીને ઘડો. દેશનું ભવિષ્ય સારું હશે તો દરેક નાગરિકનું ભવિષ્ય સારું થઈ જશે. શાળાનું વાતાવરણ સ્વચ્છ, સુંદર, શિસ્તબદ્ધ અને આધ્યાત્મિક તેજથી પરિપૂર્ણ દેખાવું જોઈએ. તમે બાળકોનું ધ્યાન રાખો, સરકાર તમારું ધ્યાન રાખશે. દરેક બાળક શાળાએ જાય, આ નાગરિકો, શિક્ષકો, શિક્ષણ મિત્રો, અનુદેશકોની જવાબદારી છે.” તેમણે ખાનગી ક્ષેત્રોને પણ પોતાના કર્મચારીઓને આવી સુરક્ષા આપવાની અપીલ કરી હતી.
મુખ્યમંત્રી શિક્ષક કેશલેસ તબીબી યોજનાનો શુભારંભ
વારાણસીની પવિત્ર ધરતી પરથી સમગ્ર રાજ્યમાં 404 સ્થળોએ એકસાથે આયોજિત આ ભવ્ય કાર્યક્રમમાં સીએમ યોગીએ ‘મુખ્યમંત્રી શિક્ષક કેશલેસ તબીબી યોજના’ ની પણ શરૂઆત કરી હતી. આનાથી રાજ્યના 12 લાખ શિક્ષકો, બિન-શૈક્ષણિક કર્મચારીઓ અને તેમના આશ્રિતોને સીધો જ સ્વાસ્થ્ય સુરક્ષાનો લાભ મળશે. સરકારનું માનવું છે કે આ યોજનાથી શિક્ષકોનું મનોબળ વધશે અને તેઓ કોઈ પણ આર્થિક ચિંતા વગર રાષ્ટ્રનિર્માણના કાર્યમાં પોતાનું યોગદાન આપી શકશે.
કરોડો વિદ્યાર્થીઓના ખાતામાં ડીબીટી દ્વારા રકમ ટ્રાન્સફર
શિક્ષકોની સાથે સાથે મુખ્યમંત્રીએ રાજ્યના 1.10 કરોડ વિદ્યાર્થીઓને પણ મોટી રાહત આપી છે. તેમણે યુનિફોર્મ, બૂટ-મોજા, સ્વેટર, સ્કૂલ બેગ અને સ્ટેશનરીની ખરીદી માટે વિદ્યાર્થી દીઠ 1200 રૂપિયા લેખે કુલ 1320 કરોડ રૂપિયાની માતબર રકમ સીધી વાલીઓના બેંક ખાતામાં (DBT) ટ્રાન્સફર કરી છે. આ બેવડા પગલાથી ઉત્તર પ્રદેશના શૈક્ષણિક માળખામાં એક મોટો અને હકારાત્મક બદલાવ જોવા મળી રહ્યો છે, જેના વખાણ સમગ્ર દેશમાં થઈ રહ્યા છે.
