નવી દિલ્હી, 18 સપ્ટેમ્બર 2026: નેશનલ ટેસ્ટિંગ એજન્સી (એનટીએ) દ્વારા યુજીસી-નેટ જૂન 2026 ના ઈંગ્લિશ, કોમર્સ અને સોશિયોલોજી વિષયોની ફાઇનલ આન્સર-કી જાહેર કરી દેવામાં આવી છે. આ વિષયો માટેની પુનઃપરીક્ષા 9 અને 10 સપ્ટેમ્બરે દેશભરના વિવિધ પરીક્ષા કેન્દ્રો પર યોજવામાં આવી હતી. પરીક્ષા આપનાર ઉમેદવારો હવે અધિકૃત વેબસાઇટ પર જઈને પોતાની ફાઇનલ આન્સર-કી ચકાસી શકે છે. એનટીએ દ્વારા બહાર પાડવામાં આવેલા નિવેદન અનુસાર, 9 સપ્ટેમ્બરે પ્રથમ શિફ્ટમાં (સવારે 9 થી બપોરે 12 વાગ્યા સુધી) ઈંગ્લિશ અને બીજી શિફ્ટમાં (બપોરે 3 થી સાંજે 6 વાગ્યા સુધી) કોમર્સ વિષયની પરીક્ષા યોજાઈ હતી. જ્યારે 10 સપ્ટેમ્બરે પ્રથમ શિફ્ટમાં સોશિયોલોજી વિષયની પરીક્ષા લેવામાં આવી હતી.
યુજીસી-નેટ જૂન 2026ની મૂળ પરીક્ષા દરમિયાન ઈંગ્લિશ, કોમર્સ અને સોશિયોલોજીના પ્રશ્નપત્રોમાં કેટલીક ભૂલો હોવાની ફરિયાદો એનટીએને મળી હતી. આ ફરિયાદોની સમીક્ષા માટે એક ખાસ સમિતિની રચના કરવામાં આવી હતી. સમિતિની ભલામણ બાદ, પરીક્ષાની પારદર્શિતા અને ત્રુટિરહિત પ્રક્રિયા જાળવી રાખવાના હેતુથી એનટીએ દ્વારા આ ત્રણેય વિષયોની ફરીથી પરીક્ષા યોજવાનો નિર્ણય લેવાયો હતો. અત્રે ઉલ્લેખનીય છે કે, આ પુનઃપરીક્ષા માટે ઉમેદવારો પાસેથી કોઈ વધારાની ફી લેવામાં આવી નહોતી, અને તેનાથી કુલ બેઠકોની સંખ્યા પર પણ કોઈ અસર પડશે નહીં.
-
87 વિષયો માટે યોજાઈ હતી પરીક્ષા
યુજીસી-નેટ જૂન 2026 ની પરીક્ષા કુલ 87 વિષયો માટે આયોજિત કરવામાં આવી હતી. જેમાંથી માત્ર આ 3 વિષયોમાં ગડબડ સામે આવ્યા બાદ તેમની પરીક્ષા ફરીથી લેવાઈ હતી, જ્યારે બાકીના 84 વિષયોની પ્રક્રિયા નિર્ધારિત સમયપત્રક મુજબ જ પૂરી કરવામાં આવી છે. ભારતની યુનિવર્સિટીઓ અને ઉચ્ચ શિક્ષણ સંસ્થાઓમાં આસિસ્ટન્ટ પ્રોફેસરની પાત્રતા, પીએચડી (Ph.D.) પ્રવેશો અને જૂનિયર રિસર્ચ ફેલોશિપ માટે યુજીસી-નેટ પરીક્ષાનું આયોજન કરવામાં આવે છે. હવે ફાઇનલ આન્સર-કી જાહેર થઈ જતાં પરિણામ પણ ટૂંક સમયમાં જાહેર થવાની શક્યતા છે.
