આઈઝોલ, 23 સપ્ટેમ્બર 2026: મિઝોરમના કોલાસિબ જિલ્લામાંથી હૃદયદ્રાવક અને ચોંકાવનારા સમાચાર સામે આવ્યા છે. દેશની રક્ષામાં ફરજ બજાવતા આસામ રેજિમેન્ટના 29 વર્ષીય સૈનિકની, રસ્તા બાબતે થયેલા વિવાદ બાદ યુવકોના એક જૂથ દ્વારા માર મારીને હત્યા કરવામાં આવી હતી. આ સૈનિક રજા પર ઘરે પરત ફરી રહ્યા હતા. આ ઘટનાને પગલે સમગ્ર વિસ્તારમાં શોક અને રોષનું વાતાવરણ ફેલાઈ ગયું છે.
પોતાનો જીવ ગુમાવનાર સૈનિકની ઓળખ ઝકરિયા લાલહ્રિયાત્લુઆંગા તરીકે કરવામાં આવી છે. તેઓ આસામ રેજિમેન્ટના સૈનિક હતા અને હાલમાં જમ્મુ-કાશ્મીરના શ્રીનગરમાં તૈનાત હતા. આ ઘટના 20 સપ્ટેમ્બરના રોજ બની હતી. ઝકરિયા લેંગપુઈ એરપોર્ટથી મિઝોરમના ન્યૂ બુઈલુમ ગામ સ્થિત તેમના ઘરે એક મિત્ર સાથે ટ્રકમાં મુસાફરી કરી રહ્યા હતા, ત્યારે નેશનલ હાઈવે-306 પર આ ભયાનક ઘટના બની હતી.
વિવાદ શરૂ થવાનું કારણ શું હતું?
હાઈવેની ખરાબ સ્થિતિને કારણે સામેની દિશામાંથી આવતું એક ટ્રક રોડની ખોટી બાજુએ ચલાવવામાં આવતું હોવાથી સામાન્ય બોલાચાલી થઈ હતી. જ્યારે ટ્રક ચલાવનાર ઝકરિયાના મિત્રએ આ બાબતે વાંધો ઉઠાવ્યો, ત્યારે પિકઅપ વાનમાં આવેલા યુવકોના એક જૂથે તેમના પર હુમલો કર્યો. પ્રત્યક્ષદર્શીઓના જણાવ્યા અનુસાર, હુમલાખોરો કવાનપુઈ (Kavanpui) નગરની હોકી ટીમ સાથે સંકળાયેલા હતા અને પિકનિક પરથી પરત ફરી રહ્યા હતા; તેઓ કથિત રીતે દારૂના નશામાં હતા.
ત્યારબાદ, જ્યારે ઝકરિયાના મિત્રએ બીજા ટ્રક ચાલક સાથે વાત કરી, ત્યારે આ યુવકોએ તેને વાહનમાંથી બહાર ખેંચી કાઢ્યો અને માર મારવાનું શરૂ કર્યું. મદદ કરવા માટે વચ્ચે પડેલા ઝકરિયા પર પણ જીવલેણ હુમલો કરવામાં આવ્યો અને તેનું ઘટનાસ્થળે જ મૃત્યુ થયું; તેની સાથે રહેલા અન્ય મિત્રો પણ ઘાયલ થયા હતા.
અત્યાર સુધીમાં આઠ લોકોની ધરપકડ
આ ઘટનાના સમાચાર બાદ ફેલાયેલા જનઆક્રોશ વચ્ચે પોલીસે ત્વરિત કાર્યવાહી કરી અને બે સગીરો સહિત કુલ આઠ આરોપીઓની ધરપકડ કરી.
દરમિયાન, આર્મી જવાન ઝકરિયાના પરિવાર પર એક મોટી દુર્ઘટના આવી પડી છે. તેમના 60 વર્ષીય માતા લાલથાજોવીએ જણાવ્યું હતું કે ઘટનાના થોડા સમય પહેલા જ તેમણે તેમના પુત્ર સાથે ફોન પર વાત કરી હતી; તેણે કહ્યું હતું કે તે સાંજે 6:30 વાગ્યા સુધીમાં ઘરે પહોંચી જશે, પરંતુ તે પાછા ફરે તે પહેલાં જ આ દુર્ઘટના ઘટી ગઈ.
વધુ વાંચો: મીરાબાઈ ચાનુએ રચ્યો ઇતિહાસ, 28 વર્ષ બાદ ભારતને વેઇટલિફ્ટિંગમાં સિલ્વર
