
અમદાવાદઃ દિલ્હીમાં વડાપ્રધાનના કાર્યાલયમાં યાને પીએમઓમાં પોતે અધિકારી હોવાની ફેક ઓળખ આપીને છેતરપિડીના બનાવો વધતા જાય છે. તાજેતરમાં કિરણ પટેલ નામનો શખસ ઝેડ કેટેગરીનું રક્ષણ મેળવીને કાશ્મીરમાં પણ ફરી આવ્યો હતો. અતે આ શખસનો ભાંડો ફુટતા હાલ પાલીસ લોકઅપની હવા ખાઈ રહ્યો છે. ત્યારે પીએમઓના અધિકારીની ખોટી ઓળખ આપનારો વધુ એક શખસ પકડાયો છે. PMO ઓફિસના અધિકારી તરીકેની ઓળખ આપી પારુલ યુનિવર્સિટી ટ્રસ્ટની સ્કૂલમાં મિત્રના બે સંતાનનાં એડમિશન કરાવ્યાં બાદ ટ્રસ્ટીઓને એજ્યુકેશનની કામગીરીની મંજૂરી અપાવવાનું જણાવી નાણાં પડાવવાનો કારસો રચનારો વડોદરાનો MCA થયેલો ભેજાબાજ શખસ સામે વાઘોડિયા પોલીસ મથકમાં ફરિયાદ નોંધાઈ છે. પોલીસે ફરિયાદના આધારે આરોપીની અટકાયત કરી આગળની તપાસ હાથ ધરી છે.
આ બનાવ અંગે વડોદરામાં નિઝામપુરા વિસ્તારમાં આવેલી ન્યૂઇરા સિનિયર સેકન્ડરી સ્કૂલમાં વહીવટી અધિકારી તરીકે ફરજ બજાવતા ચંદ્રશેખર રાધેશ્યામ દધીચએ વાઘોડિયા પોલીસ મથકમાં નોંધાવેલી ફરિયાદમાં જણાવ્યું હતું કે, અમારી સ્કૂલ સીબીએસઈ બોર્ડની માન્યતા ધરાવે છે, જે અંગ્રેજી માધ્યમની શાળા છે. સ્કૂલમાં ધોરણ 1થી 12 સુધીનો અભ્યાસ કરાવવામાં આવે છે. સ્કૂલમાં વિદ્યાર્થીઓને ખાલી જગ્યા મુજબ એડમિશન આપવામાં આવે છે. ન્યુઈરા સ્કૂલનાં ડાયરેક્ટર પ્રિયદર્શની કેલકર છે, જેઓ વડોદરા શહેર ખાતે રહે છે તેમ જ સ્કૂલમાં બાળકનું એડમિશન આપતી વખતે સ્કૂલ તરફથી બહાર પાડવામાં આવેલા નમૂના મુજબનું ફોર્મ ભરવાનું હોય છે. આ સાથે જ એક પરીક્ષા આપવાની હોય છે, જેના આધારે એડમિશન આપવામાં આવે છે.
ફરિયાદમાં જણાવ્યા મુજબ ન્યુઈરા સ્કૂલના ટ્રસ્ટી તરીકે પારુલ યુનિવર્સિટીનાં MD ડો. દેવાશુ પટેલ તથા ડો. ગીતીકા પટેલ છે. વર્ષ 2022ના માર્ચ મહિનામાં સ્કૂલમાં એડમિશનની કામગીરી ચાલુ હતી. એ દરમિયાન ભેજાબાજ મયંક તિવારીએ પોતાની ઓળખ ડાયરેકટર વ્યૂહાત્મક સલાહકાર PMO ઓફિસ તરીકે આપી તેના ફેમિલી મિત્રના દીકરાઓનાં એડમિશન માટે સંપર્ક કર્યો હતો, જેથી ડાયરેકટરે તેને સ્કૂલના ટ્રસ્ટ્રી દેવાશું પટેલને પારુલ કોલેજ લીમડા વાઘોડિયા ખાતે મળવા જણાવ્યું હતું. આ દરમિયાન ભેજાબાજ મયંક તિવારી પારુલ કોલેજમાં ડો. ગીતીકા પટેલને મળ્યો હતો અને પોતાની ઓળખ Director Strategic Advisor y @PMO તથા Director Government Advisory @ PMOની આપી હતી. આ સાથે જ પોતે દિલ્હી PMO ઓફિસમાં કામ કરતો હોવાનું જણાવ્યું હતું. તેણે એજ્યુકેશન બાબતે મોટી મોટી વાતો કરી હતી, જેમાં તેણે જણાવ્યું હતું કે એજ્યુકેશનમાં સાથે મળીને કામ કરીશું તથા ગુજરાત રાજ્યમાં રિસર્ચને લગતી કામગીરી કરીશું. તેમજ સરકારમાંથી મંજૂરી મેળવવાની કાર્યવાહી હું કરીશ, નાણાકીય ખર્ચની જવાબદારી તમારે કરવાની રહેશે. આ પ્રકારની વાતો કરી ડો.ગીતીકા પટેલને વિશ્વાસમાં લીધાં હતાં અને મોટી રકમ પડાવવા અને તેમની સાથે છેતરપિંડી કરવાનો કારસો રચ્યો હતો.