નવી દિલ્હી, 7 સપ્ટેમ્બર 2026: ભારતીય ક્રિકેટ ટીમની બેન્ચ સ્ટ્રેન્થ અને ખેલાડીઓની વિપુલતાથી આખી દુનિયા પરિચિત છે. કહેવાય છે કે ભારત પાસે એટલા ખેલાડીઓ છે કે તે એક જ દિવસે બે અલગ-અલગ આંતરરાષ્ટ્રીય મેચ રમી શકે છે. આગામી 3 ઓક્ટોબર, 2026ના રોજ આ વાત વાસ્તવિક બનવા જઈ રહી છે, જ્યારે ટીમ ઈન્ડિયા એક જ દિવસે બે અલગ-અલગ સ્થળોએ મેચ રમતી નજરે પડશે. આગામી 3 ઓક્ટોબર, 2026ના રોજ એક તરફ ટીમ ઈન્ડિયા ન્યૂ ચંદીગઢ ખાતે વેસ્ટ ઈન્ડિઝ સામે ત્રીજી અને અંતિમ વનડે મેચ રમશે, તો બીજી તરફ જાપાનમાં રમાઈ રહેલા એશિયન ગેમ્સમાં ભારતીય ટીમ ગોલ્ડ મેડલ (ફાઇનલ) મુકાબલો રમતી નજરે પડી શકે છે. ભારતીય ટીમે એશિયન ગેમ્સમાં સીધી ક્વાર્ટર ફાઇનલમાં પ્રવેશ કર્યો છે. જો ટીમ સેમિફાઇનલ જીતી જશે, તો 3 ઓક્ટોબરે ફાઇનલ મેચ રમાશે.
બંને ટીમોના ખેલાડીઓ અલગ હશે
એશિયન ગેમ્સ ટીમ: આ યુવા અને શક્તિશાળી ટીમની કમાન શ્રેયસ અય્યરના હાથમાં છે. ટીમમાં અભિષેક શર્મા, સંજુ સેમસન, વૈભવ સૂર્યવંશી, તિલક વર્મા, જસપ્રીત બુમરાહ અને અર્શદીપ સિંહ જેવા ખેલાડીઓ સામેલ છે.
વેસ્ટ ઈન્ડિઝ વનડે ટીમ: આ શ્રેણી માટે શુભમન ગિલ ટીમની કપ્તાની કરતા નજરે પડી શકે છે, જ્યારે રોહિત શર્મા, વિરાટ કોહલી, કુલદીપ યાદવ અને કે.એલ. રાહુલ જેવા અનુભવી ખેલાડીઓ આ મેચમાં રમશે.
28 વર્ષ પહેલાં પણ બની ચુકી છે આવી અદ્ભુત ઘટના
ભારતીય ક્રિકેટના ઇતિહાસમાં આવું પહેલીવાર નથી થઈ રહ્યું. આ અગાઉ 28 વર્ષ પહેલાં 12 સપ્ટેમ્બર, 1998 ના રોજ પણ આવો જ સંયોગ સર્જાયો હતો. તે સમયે સચિન તેંડુલકર અને અનિલ કુમ્બલે જેવા ખેલાડીઓ કુઆલાલંપુર કોમનવેલ્થ ગેમ્સમાં કેનેડા સામે રમ્યા હતા, જ્યારે તે જ દિવસે ટોરોન્ટોમાં અઝહરુદ્દીનની કપ્તાનીમાં સૌરવ ગાંગુલી, રાહુલ દ્રવિડ અને નવજોત સિદ્ધુ જેવા દિગ્ગજોએ પાકિસ્તાન વિરુદ્ધ ‘સહારા ફ્રેન્ડશિપ કપ’ની મેચ રમી હતી. હવે 28 વર્ષ બાદ ફરી એકવાર ક્રિકેટ જગતમાં આ રોમાંચક નજારો જોવા મળશે.
