મનિલા, 24 ઓક્ટોબર 2026: ફિલિપાઈન્સની રાજધાની મનિલાની દક્ષિણે આવેલા એક એર બેઝ પર, તાલીમી ઉડાન દરમિયાન વાયુસેનાના બે વિમાનો એકબીજા સાથે અથડાઈને દુર્ઘટનાગ્રસ્ત થયાં. લશ્કર દ્વારા શનિવારે જણાવવામાં આવ્યું હતું કે, આ અકસ્માતમાં ચાર સૈન્ય પાઈલટોના જીવ ગયા છે.
ફિલિપાઈન એર ફોર્સ (PAF) ના સત્તાવાર નિવેદન અનુસાર, આ ઘટના શુક્રવારે બાટાંગાસ પ્રાંતમાં આવેલા ફર્નાન્ડો એર બેઝ પર નિયમિત તાલીમ ઉડાન દરમિયાન બની હતી.
અકસ્માતમાં સામેલ બંને વિમાનો SF-260 મોડેલના તાલીમી વિમાનો હતા. સ્થાનિક મીડિયા અહેવાલો અનુસાર, ઉડાન ભરતી વખતે આ બંને વિમાનો હવામાં એકબીજા સાથે અથડાઈ ગયા હતા. તે એર બેઝના પરિસરમાં જ તૂટી પડ્યા હતા, જેના કારણે જમીન પર અન્ય કોઈ વ્યક્તિને નુકસાન થયું ન હતું.
તપાસ પૂર્ણ ન થાય ત્યાં સુધી તમામ SF-260 વિમાનોને ઉડાન ભરતા અટકાવી દેવામાં આવ્યા
અકસ્માત બાદ તરત જ, ફિલિપાઈન વાયુસેનાએ તેના SF-260 તાલીમી વિમાનોના સમગ્ર કાફલાને કામચલાઉ ધોરણે ઉડાન ભરતા અટકાવી દીધા છે (ગ્રાઉન્ડ કરી દીધા છે). વાયુસેનાના અધિકારીઓનું કહેવું છે કે, જ્યાં સુધી અકસ્માતના ચોક્કસ કારણોની સંપૂર્ણ તપાસ પૂર્ણ ન થાય ત્યાં સુધી આ વિમાનો ઉડાન ભરશે નહીં.
SF-260 વિમાન સાથે સંકળાયેલી આ કોઈ પહેલી દુર્ઘટના નથી. આ મોડેલના અન્ય વિમાનો પણ અકસ્માતોનો ભોગ બન્યા છે; મે મહિનામાં, ઉત્તરી ફિલિપાઇન્સના પહાડી વિસ્તારમાં એક SF-260 વિમાન દુર્ઘટનાગ્રસ્ત થયું હતું, જેમાં બે પાઇલોટ્સના મોત થયા હતા.
દરમિયાન, 2023માં એક તાલીમ ઉડાન દરમિયાન SF-260 TP માર્ચેટી (Marchetti) વિમાન અકસ્માતનો ભોગ બન્યું, જેમાં બે પાઇલોટ્સના જીવ ગયા.
વધુ વાંચો: આંધ્ર પ્રદેશમાં ગમખ્વાર દુર્ઘટના! પિકઅપમાં આગ બાદ ભયાનક વિસ્ફોટ, 5 મજૂરોના મોત
