કાઠમંડુ, 03 નવેમ્બર 2026: નેપાળમાં સવારે એક ગંભીર અકસ્માત સર્જાયો હતો. સોલુખુમ્બુ હેલિપેડ પર બે હેલિકોપ્ટર એકબીજા સાથે અથડાયાં હતાં. લેન્ડિંગ દરમિયાન થયેલી આ ટક્કરના પરિણામે, એક ભારતીય નાગરિકનું મૃત્યુ થયું છે અને અન્ય એક વ્યક્તિ ઘાયલ થઈ છે.
નેપાળ પોલીસના પ્રાથમિક અહેવાલ મુજબ, આ ઘટના સવારે બની હતી, જ્યારે ‘ફિશટેલ એર’ અને ‘ડાયનેસ્ટી એર’ના હેલિકોપ્ટરો ઉતરાણ કરતી વખતે એકબીજા સાથે અથડાઈ ગયા હતા.
પોલીસ ઇન્સ્પેક્ટર મૌસમ તામાંગે જણાવ્યું હતું કે મૃતકની ઓળખ વસંત કુમાર બલરામરામાડુ તરીકે થઈ છે, જેઓ ભારતીય નાગરિક હતા અને ‘ફિશટેલ એર’ના હેલિકોપ્ટરમાં સવાર હતા.
હેલિકોપ્ટરમાં સવાર ભારતીય મૂળના ન્યૂઝીલેન્ડના નાગરિક શૈલેષ કૃષ્ણ પટેલને આ અથડામણમાં ઈજાઓ થઈ હતી. તામાંગે જણાવ્યું કે તેમને ‘પ્રભુ હેલિકોપ્ટર’ દ્વારા કાઠમંડુની મેડિસિટી હોસ્પિટલમાં લઈ જવામાં આવ્યા હતા. બંને પાયલોટોને પણ સામાન્ય ઈજાઓ થઈ હતી અને તેમને વધુ તબીબી સારવાર માટે કાઠમંડુ લઈ જવામાં આવ્યા હતા.
ટક્કર થઈ તે સમયે બે હેલિકોપ્ટરમાં કેટલા મુસાફરો સવાર હતા, તેની હજુ સુધી પુષ્ટિ થઈ નથી. પોલીસે જણાવ્યું છે કે તેઓ આ ઘટના અંગે વધુ માહિતી એકત્ર કરી રહ્યા છે.
લેન્ડિંગ દરમિયાન હેલિકોપ્ટરો અથડાયા
ઘટનાસ્થળે હાજર અધિકારીઓએ જણાવ્યું હતું કે, આજે સવારે માઉન્ટ એવરેસ્ટ વિસ્તારના ફેરીચે (Pheriche) ખાતે બે હેલિકોપ્ટર એકબીજા સાથે અથડાયા અને દુર્ઘટનાગ્રસ્ત થયા.
અધિકારીઓએ જણાવ્યું હતું કે ફેરીચે હેલિપેડ પર ઉતરાણ કરતી વખતે ‘ફિશટેલ એર’ અને ‘એર ડાયનેસ્ટી’ના હેલિકોપ્ટર એકબીજા સાથે અથડાયા હતા. ‘ફિશટેલ એર’ના હેલિકોપ્ટરમાં સવાર એક મુસાફરનું મૃત્યુ થયું છે અને પાયલોટ (કેપ્ટન) ઘાયલ થયા છે.
‘ફિશટેલ એર’ (Fishtail Air) હેલિકોપ્ટર કેપ્ટન પ્રજ્વલ કેસી ઉડાવી રહ્યા હતા, જ્યારે ‘એર ડાયનેસ્ટી’ (Air Dynasty) હેલિકોપ્ટર કેપ્ટન રવિન્દ્ર પ્રજાપતિના નિયંત્રણ હેઠળ હતું. કેપ્ટન પ્રજાપતિને ઈજાઓ થઈ છે.
અધિકારીઓએ જણાવ્યું કે ‘સિમરિક એર’નું એક હેલિકોપ્ટર ઘટનાસ્થળે પહોંચી ગયું છે અને બચાવ કામગીરી ચાલી રહી છે.
વધુ વાંચો: યુક્રેનમાં રાહત વિતરણ કેન્દ્ર પર હુમલાથી ભારે જાનહાનિ, 24નાં મોત
