ન્યૂયોર્ક, 14 જુલાઈ 2026: અમેરિકા અને ઈરાન વચ્ચે ચાલી રહેલો તણાવ એક નવું સ્વરૂપ ધારણ કરી રહ્યો છે. યુએસ પ્રમુખ ડોનાલ્ડ ટ્રમ્પે જાહેરાત કરી છે કે અમેરિકી દળોએ વ્યૂહાત્મક રીતે અત્યંત મહત્વપૂર્ણ એવા ‘સ્ટ્રેટ ઓફ હોર્મુઝ’ સાથે જોડાયેલી ઈરાની લશ્કરી ક્ષમતાઓને લક્ષ્ય બનાવીને સૈન્ય હુમલા શરૂ કરી દીધા છે. ટ્રમ્પે સ્પષ્ટ સંકેત આપ્યા છે કે ઈરાન સામે અમેરિકાની આ લશ્કરી કાર્યવાહી હજુ પણ ચાલુ રહેશે. જો કે, આ સખત વલણ વચ્ચે પણ તેમણે એક મોટું નિવેદન આપતા કહ્યું કે, તેહરાન સાથે વાટાઘાટો અને ચર્ચા દ્વારા આ વિવાદનું કાયમી સમાધાન શક્ય છે.
અમેરિકી રાષ્ટ્રપતિના આદેશ બાદ યુએસ સેન્ટ્રલ કમાન્ડે ઈરાન પર સતત હુમલાઓ તેજ કર્યા છે. ઈરાનની આક્રમક સૈન્ય ક્ષમતાઓને નબળી પાડવી જેથી તે આંતરરાષ્ટ્રીય જળમાર્ગ પર ખતરો ન બની શકે. ટ્રમ્પે ઈરાનના બંદરો પર ફરીથી દરિયાઈ નાકાબંધી લાગુ કરવાની જાહેરાત કરી છે, જેથી ઈરાનના જહાજોની અવરજવર રોકી શકાય. આંતરરાષ્ટ્રીય તેલ અને ગેસના પરિવહન માટેના આ મુખ્ય માર્ગ પરથી પસાર થતા વેપારી જહાજો અને નિર્દોષ નાગરિકોને સુરક્ષા પૂરી પાડવી.
પ્રમુખ ડોનાલ્ડ ટ્રમ્પે મીડિયા સાથેની વાતચીતમાં જણાવ્યું હતું કે અમેરિકા ઈરાનને મોટું નુકસાન પહોંચાડવા માટે સંપૂર્ણ રીતે તૈયાર છે, પરંતુ તેઓ યુદ્ધના કાયમી ઉકેલ માટે હજુ પણ એક કરાર કરવા તૈયાર છે. ટ્રમ્પે ભારપૂર્વક કહ્યું કે જો ઈરાન વાટાઘાટોના ટેબલ પર આવે તો રાજદ્વારી રીતે આ સંકટનો ઉકેલ લાવી શકાય છે.
સ્ટ્રેટ ઓફ હોર્મુઝ એ ઓમાન અને ઈરાનની વચ્ચે આવેલો એક સાંકડો પણ વૈશ્વિક સ્તરે અતિ મહત્વનો જળમાર્ગ છે. વિશ્વના કુલ તેલ અને ગેસના પુરવઠાનો આશરે પાંચમો ભાગ આ જળમાર્ગ દ્વારા જ સમગ્ર વિશ્વમાં સપ્લાય થાય છે. ઈરાન દ્વારા આ માર્ગ પર અંકુશ મેળવવાના પ્રયાસો અને અમેરિકાની જવાબી કાર્યવાહીને કારણે વૈશ્વિક બજારમાં ક્રૂડ ઓઈલના ભાવમાં પણ મોટો ઉછાળો જોવા મળ્યો છે.
