નવી દિલ્હી, 30 જુલાઈ, 2026 – ભારતની હોકી ટીમના ડ્રેસનો રંગ બદલાયો છે. જોકે આ અંગે લોકોના મિશ્ર પ્રતિભાવ આવી રહ્યા છે. મોટાભાગના લોકોએ તેને આવકાર્યો છે તો કેટલાક તેની ટીકા પણ કરી રહ્યા છે.
આવતા મહિને અર્થાત ઓગસ્ટમાં નેધરલેન્ડ્સ અને બેલ્જિયમમાં યોજાનારા FIH વર્લ્ડ કપમાં ભારતીય પુરુષ અને મહિલા હોકી ટીમો તેમની પરંપરાગત વાદળી કિટને બદલે કેસરી જર્સીમાં જોવા મળશે. આ અંગેની જાહેરાત હોકી ઈન્ડિયાના સત્તાવાર એક્સ હેન્ડલ ઉપર કરવામાં આવી છે. પોસ્ટની સાથે મૂકવામાં આવેલા વીડિયોમાં જર્સીના મહત્ત્વના પાસાને હાઈલાઈટ કરીને પણ દર્શાવવામાં આવ્યા છે.
અલબત્ત, તમામને આવો ફેરફાર પસંદ નથી આવ્યો. ભૂતપૂર્વ હોકી કેપ્ટન વિરેન રાસ્કીન્હાએ સવાલો ઉઠાવ્યા છે. હોકી ઇન્ડિયાએ તેના સોશિયલ મીડિયા પેજ પર નવી જર્સી રજૂ કરતા જણાવ્યું હતું કે જર્સીની ડિઝાઇન અને રંગ “એક દૃષ્ટિકોણ રજૂ કરવા” અને “ભારતનું ગૌરવ” દર્શાવવા માટે છે. હોકી ઇન્ડિયાએ કહ્યું કે કેસરી રંગ સાહસ, ત્યાગ અને વિજયનું પ્રતીક છે. સંસ્થાએ કહ્યું, “ભારતીય રાષ્ટ્રધ્વજ અને ઉગતા સૂરજથી પ્રેરિત આ જર્સી નવી શરૂઆત દર્શાવે છે.” વર્લ્ડ કપ 15 થી 30 ઓગસ્ટ સુધી ચાલશે.
Presenting the new India jersey! 🇮🇳
Every stitch tells a story. Every pattern, every colour carries India’s pride.
Our teams are ready to once again do the country proud at the FIH Hockey World Cup Belgium & Netherlands 2026.
🎥: Select 2 (SD+HD)+ Khel & JioHotstar
🗓️: August… pic.twitter.com/8GvwbByapq— Hockey India (@TheHockeyIndia) July 27, 2026
જર્સીમાં ‘મંડલા’થી પ્રેરિત પેટર્ન પણ છે જે ભારતની સાંસ્કૃતિક વિરાસતની ઉજવણી કરે છે. હોકી ઇન્ડિયાએ કહ્યું કે ઘેરા નેવી બ્લૂ રંગના ભાગો અશોક ચક્રથી પ્રેરિત છે, જે પ્રગતિ, શાંતિ અને ફોકસનું પ્રતીક છે. હોકી ઇન્ડિયાએ જણાવ્યું હતું કે છાતી પર બનેલો ગ્રાફિક સુદર્શન ચક્રનું આધુનિક રૂપ છે, જે “શક્તિ, એકતા અને ગતિ”નું પ્રતીક છે. ખાંધા અને બાજુઓ પર ત્રિરંગા રંગની પાઇપિંગ પણ છે, જે “રાષ્ટ્રીય ગૌરવને વધુ વધારે છે.”
જર્સીની સામે ‘INDIA’ ને ખાસ ‘દેવનાગરી’ લિપિમાં લખવામાં આવ્યું છે જેથી “ભાષાકીય અને સાંસ્કૃતિક વિવિધતા પ્રદર્શિત કરી શકાય.”
હોકી ઇન્ડિયાએ જર્સી લૉન્ચ વીડિયોમાં કહ્યું, “નવી જર્સીની ડિઝાઇન ‘એક ભારત, શ્રેષ્ઠ ભારત’ની ભાવના દર્શાવે છે.” કેસરી ઉપરાંત, ભારતીય ટીમોની કિટમાં સફેદ જર્સી પણ હશે, જેમાં આ જ નવી ડિઝાઇન હશે. મુખ્ય જર્સીનો રંગ વાદળીમાંથી બદલીને કેસરી કરવાનો નિર્ણય ભારતના પૂર્વ કેપ્ટન વિરેન રાસ્કીન્હાને પસંદ આવ્યો નથી.
ઓલિમ્પિક ગોલ્ડ ક્વેસ્ટના CEO રાસ્કીન્હાએ ‘X’ પર લખ્યું, “મારે કહેવું પડશે કે @TheHockeyIndia એ ઘણા સારા કામ કર્યા છે… પરંતુ આ શરમજનક છે. ભારતીય ટીમની ઓળખ અને વિરાસત હંમેશા વાદળી રંગ રહી છે. મેં ઘણા વર્ષો સુધી ગૌરવ સાથે વાદળી જર્સી પહેરી છે. ફેન્સ આપણી ભારતીય ટીમને વાદળી રંગમાં જોવા માંગે છે. નારંગી રંગનો શું લોજિક છે?”
“મારી સીધી અને નમ્ર વાત ગૌરવ, ઓળખ અને વિરાસત વિશે છે.” પરંતુ નેશનલ ફેડરેશને આ નિર્ણયનો બચાવ કરતા કહ્યું કે કેસરી રંગ પસંદ કરવામાં કંઈ ખોટું નથી, કારણ કે તે “આપણા ત્રિરંગાનો જ એક ભાગ” છે.
હોકી ઇન્ડિયાના એક સિનિયર અધિકારીએ PTI ને જણાવ્યું, “આમાં કંઈ પણ રાજકીય નથી. કેસરી રંગની પહેલી જર્સી હોવામાં શું ખરાબી છે? કેસરી આપણા ત્રિરંગાનો ભાગ છે. આ સિવાય, ફેરફારનું હંમેશા સ્વાગત કરવામાં આવે છે.”
તેમણે એમ પણ કહ્યું કે વાદળી હોકી ટર્ફ પર વાદળી જર્સી પહેરવાથી ફેન્સ અને બ્રોડકાસ્ટર્સ માટે ખેલાડીઓને સ્પષ્ટપણે જોઈ શકવાનું મુશ્કેલ બની જાય છે. તેમણે દલીલ કરી, “આનાથી કોન્ટ્રાસ્ટ ઓછો થઈ જાય છે, જેનાથી ખેલાડીઓ પિચના રંગમાં ભળી જાય છે. વાદળી ટર્ફ પર વાદળી જર્સી પહેરવાથી દર્શકો માટે ખેલાડીઓ પર નજર રાખવી મુશ્કેલ બની શકે છે.”
હોકી ઇન્ડિયાની નવી જર્સીમાં શું-શું છે:
કેસરી રંગ: પરંપરાગત વાદળી જર્સીની જગ્યાએ હવે કેસરી રંગની જર્સી હશે. હોકી ઇન્ડિયાનું કહેવું છે કે આ રંગ સાહસ, ત્યાગ અને વિજયનું પ્રતીક છે અને તે ભારતીય રાષ્ટ્રધ્વજ તથા ઉગતા સૂરજથી પ્રેરિત છે.
“એક ભારત, શ્રેષ્ઠ ભારત” થીમ: નવી જર્સીની ડિઝાઇનનો હેતુ “એક ભારત, શ્રેષ્ઠ ભારત”ની ભાવના દર્શાવવાનો અને રાષ્ટ્રીય ગૌરવ પ્રદર્શિત કરવાનો છે.
મંડલા-પ્રેરિત પેટર્ન: જર્સીમાં મંડલા-શૈલીના ગ્રાફિક્સ છે જે ભારતની સાંસ્કૃતિક વિરાસતની ઉજવણી કરે છે.
અશોક ચક્રના તત્વો: ઘેરા નેવી-બ્લૂ રંગના ભાગો અશોક ચક્રથી પ્રેરિત છે, જે પ્રગતિ, શાંતિ અને એકાગ્રતાનું પ્રતિનિધિત્વ કરે છે.
સુદર્શન ચક્ર ગ્રાફિક: છાતી પર સુદર્શન ચક્રનું આધુનિક રૂપ બનેલું છે, જે તાકાત, એકતા અને ગતિનું પ્રતીક છે.
ત્રિરંગાની ડિટેલિંગ: ખાંધા અને બાજુઓ પર ત્રિરંગા રંગની પાઇપિંગ છે જે રાષ્ટ્રીય ઓળખ અને ગૌરવને વધુ મજબૂત કરે છે.
સ્ટાઇલિશ ‘INDIA’ બ્રાન્ડિંગ: દેશની ભાષાકીય અને સાંસ્કૃતિક વિવિધતાની ઉજવણી કરવા માટે “INDIA” ને દેવનાગરી-પ્રેરિત સ્ટાઇલિશ ડિઝાઇનમાં લખવામાં આવ્યું છે.
વૈકલ્પિક સફેદ કિટ: કેસરી જર્સીની સાથે સાથે, ભારતીય ટીમો પાસે એક સફેદ જર્સી પણ હશે જેમાં આ જ ડિઝાઇન તત્વો હશે.
