તેહરાન, 09 સપ્ટેમ્બર 2026: મધ્ય પૂર્વમાં ફરી એકવાર તણાવ વધી ગયો છે. બુધવારે યુએસ સેન્ટ્રલ કમાન્ડ દ્વારા ઈરાનના પાંચ ઓઈલ ટેન્કરોને નષ્ટ કરવામાં આવ્યા બાદ તેહરાને વળતો જવાબ આપ્યો છે. ઈરાની મીડિયાના અહેવાલ મુજબ, IRGCની નૌકાદળે પર્સિયન ગલ્ફમાં 10 જહાજો (જેમાં બે યુએસ જહાજોનો પણ સમાવેશ થાય છે) પર અને હોર્મુઝની સામુદ્રધુની નજીક અન્ય 10 જહાજો પર હુમલો કર્યો હતો.
તેહરાને જોર્ડનમાં આવેલા અમેરિકી સૈન્ય મથકને નિશાન બનાવીને પણ અનેક મિસાઇલો છોડી હતી. જોકે, જોર્ડને જણાવ્યું હતું કે તેની હવાઈ સુરક્ષા પ્રણાલીએ 20માંથી 18 મિસાઇલોને આંતરીને નિષ્ફળ બનાવી દીધી હતી.
ઈરાને આપી હતી ચેતવણી
સોમવારે અગાઉ, ઈરાનના સરકારી મીડિયાએ જણાવ્યું હતું કે તેહરાનની નવી ‘કાસેમ બશીર’ બેલિસ્ટિક મિસાઈલ તેની લશ્કરી નીતિમાં આવેલા બદલાવને દર્શાવે છે; સાથે જ તેમણે ચેતવણી પણ આપી હતી કે ઈરાન કોઈપણ જોખમ સામે પગલાં લેશે.
ઈરાનની સર્વોચ્ચ રાષ્ટ્રીય સુરક્ષા પરિષદના વડા મોહસેન રેઝાઈએ દાવો કર્યો હતો કે આ મિસાઈલનું પરીક્ષણ અમેરિકી યુદ્ધજહાજ સામે કરવામાં આવ્યું હતું, જોકે તે સ્પષ્ટ નહોતું કે પરીક્ષણ કરાયેલું શસ્ત્ર ખરેખર ‘કાસેમ બશીર’ જ હતું કે નહીં. ઈરાની મીડિયાએ ‘કાસેમ બશીર’ને એક મોટી સફળતા ગણાવી હતી. આ મિસાઈલનું અનાવરણ ગયા વર્ષે કરવામાં આવ્યું હતું અને તેની રેન્જ (મારક ક્ષમતા) ઓછામાં ઓછી 1200 કિલોમીટર હોવાનું જણાવાયું હતું.
