T20 વર્લ્ડ કપ 2026ના હીરો સંજુને ICC પ્લેયર ઓફ ધ મંથનો એવોર્ડ
દુબઈ, 14 એપ્રિલ 2026: આંતરરાષ્ટ્રીય ક્રિકેટ કાઉન્સિલએ માર્ચ મહિના માટેના સર્વશ્રેષ્ઠ ખેલાડીઓના નામની જાહેરાત કરી દીધી છે. ભારતને તાજેતરમાં જ ટી20 વર્લ્ડ કપ 2026નો ખિતાબ જીતાડવામાં મહત્વની ભૂમિકા ભજવનાર સ્ટાર બેટ્સમેન સંજુ સેમસનને માર્ચ મહિનાનો ‘પ્લેયર ઓફ ધ મંથ’ જાહેર કરવામાં આવ્યો છે. મહિલા વર્ગમાં ન્યૂઝીલેન્ડની ઓલરાઉન્ડર અમેલિયા કરને આ સન્માન મળ્યું છે.
સંજુ સેમસને ટી 20 વર્લ્ડ કપ 2026માં બેટ વડે તરખાટ મચાવ્યો હતો. ટૂર્નામેન્ટની શરૂઆતમાં પ્લેઈંગ ઈલેવનની બહાર રહ્યા બાદ, તેણે સુપર-8માં મળેલા મોકાને બંને હાથે ઝડપી લીધો હતો. સેમસન આ ટૂર્નામેન્ટમાં ‘પ્લેયર ઓફ ધ ટુર્નામેન્ટ’ પણ રહ્યો હતો. માર્ચ મહિનામાં રમાયેલી ત્રણ મહત્વની મેચોમાં તેણે 137.50ની સરેરાશ અને 199.27ના સ્ટ્રાઈક રેટથી કુલ 275 રન ફટકાર્યા હતા.
ટી-20 વિશ્વકપમાં વેસ્ટ ઈન્ડિઝ સામેની મેચમાં સંજુએ 97 રન ફટકાર્યાં હતા. આવી જ રીતે વાનખેડે ખાતે ઈંગ્લેન્ડ સામેની મેચમાં 89 રન બનાવ્યાં હતા. જ્યારે ફાઈનલમાં 89 રનની આક્રમ ઈનિંગ રમી હતી. હાલ આઈપીએલ 2026માં ચેન્નાઈ સુપર કિંગ્સ તરફથી રમી રહેલા સંજુએ આ ખુશી વ્યક્ત કરતા જણાવ્યું કે, “આઈસીસી પ્લેયર ઓફ ધ મંથ બનવું મારા માટે ખૂબ જ ખાસ છે. વર્લ્ડ કપ જીતવામાં યોગદાન આપવું એ મારું સપનું હતું. હું મારા સાથી ખેલાડીઓ અને કોચિંગ સ્ટાફનો આભાર માનું છું જેમણે મારા પર ભરોસો મૂક્યો.”
સંજુ સેમસન આ એવોર્ડ જીતનાર પ્રથમ ભારતીય (છેલ્લા 5 મહિનામાં) બન્યો છે. રસપ્રદ વાત એ છે કે છેલ્લા પાંચ મહિનાથી દર વખતે અલગ-અલગ દેશના ખેલાડીઓ આ એવોર્ડ જીતી રહ્યા છે, જેમાં સાયમન હાર્મર (દક્ષિણ આફ્રિકા), મિચેલ સ્ટાર્ક (ઓસ્ટ્રેલિયા), ડેરીલ મિચેલ (ન્યૂઝીલેન્ડ) અને સાહિબઝાદા ફરહાન (પાકિસ્તાન)નો સમાવેશ થાય છે. ન્યૂઝીલેન્ડની અમેલિયા કરને મહિલા વર્ગમાં આ એવોર્ડ મળ્યો છે. તેણે માર્ચ મહિનામાં ઝિમ્બાબ્વે સામેની વનડે શ્રેણીમાં બેટિંગ અને બોલિંગ બંનેમાં શાનદાર પ્રદર્શન કરીને પોતાની ટીમને જીત અપાવી હતી.
આ પણ વાંચોઃ મુંબઈઃ લાઈવ કોન્સર્ટ બાદ બે વિદ્યાર્થીઓના મોત, ડ્રગ્સ ઓવરડોઝની આશંકા
