નવી દિલ્હીઃ સોમવારના મોટા ઘટાડા બાદ એશિયન બજારોમાંથી મળેલા સંકેતોને કારણે મંગળવારના ટ્રેડિંગ સેશનની શરૂઆત ભારતીય શેરબજારમાં જોરદાર ઉછાળા સાથે થઈ હતી. સેન્સેક્સમાં 1100 પોઈન્ટ અને નિફ્ટીમાં 300 પોઈન્ટથી વધુનો ઉછાળો જોવા મળ્યો હતો. પરંતુ બપોરે યુરોપિયન માર્કેટમાં ઘટાડો અને ભારતીય બજારોમાં વેચવાલીથી શેરબજારનો સંપૂર્ણ ફાયદો ખોવાઈ ગયો હતો. બેન્કિંગ અને મિડકેપ શેરોમાં સૌથી વધુ વેચવાલી જોવા મળી હતી. આજના કારોબારના અંતે BSE સેન્સેક્સ 166 પોઈન્ટ ઘટીને 78,593 અને નેશનલ સ્ટોક એક્સચેન્જનો નિફ્ટી 65 પોઈન્ટ ઘટીને 23992 પોઈન્ટની સપાટીએ બંધ રહ્યો હતો.
આજના ટ્રેડિંગમાં વધતા શેરોમાં ગોદરેજ પ્રોપર્ટીઝ 3.49 ટકાના વધારા સાથે, બ્રિટાનિયા 2.81 ટકાના વધારા સાથે, Ipca લેબ 2.69 ટકાના વધારા સાથે, IGL 1.40 ટકાના વધારા સાથે બંધ થયા છે. આ સિવાય JSW સ્ટીલ 2.41 ટકા, ટેક મહિન્દ્રા 2.07 ટકા, L&T 1.62 ટકા, HUL 1.55 ટકા, ટાટા સ્ટીલ 0.97 ટકાના વધારા સાથે બંધ થયા છે. ઘટતા શેરોમાં મેરિકો 6.49 ટકા, LIC હાઉસિંગ ફાઇનાન્સ 5 ટકા, પાવર ફાઇનાન્સ 4.82 ટકા, HDFC લાઇફ 4.40 ટકા, બાટા ઇન્ડિયા 2.70 ટકાના ઘટાડા સાથે બંધ થયા છે.
આજે પણ બપોર બાદ બજારમાં ઘટાડાથી રોકાણકારોને નુકશાની વેઠવી પડી છે. BSE પર લિસ્ટેડ શેરોનું માર્કેટ કેપિટલાઇઝેશન રૂ. 440.27 લાખ કરોડ પર બંધ થયું હતું, જે છેલ્લા સત્રમાં રૂ. 441.84 લાખ કરોડ હતું. આજના સત્રમાં રોકાણકારોને 1.57 લાખ કરોડ રૂપિયાનું નુકસાન થયું છે. આમ રોકાણકારોને બે સત્રમાં 17 લાખ કરોડ રૂપિયાથી વધુનું નુકસાન થયું છે.
બજારમાં બેન્કિંગ શેર્સમાં પ્રોફિટ-બુકિંગના કારણે બેન્કિંગ સેક્ટરમાં ઘટાડો જોવા મળ્યો હતો, આ સિવાય ઓટો, ફાર્મા, એનર્જી, કન્ઝ્યુમર ડ્યુરેબલ્સ, હેલ્થકેર અને ઓઈલ એન્ડ ગેસ સેક્ટરના શેરો ઘટાડા સાથે બંધ થયા હતા. જ્યારે આઈટી, મીડિયા, રિયલ એસ્ટેટ, મેટલ્સ, એફએમસીજી શેરો ઉછાળા સાથે બંધ થયા છે. આજના કારોબારમાં મિડકેપ અને સ્મોલકેપ શેરોમાં વેચવાલી ચાલુ રહી હતી. બીએસઈ પર 4028 શેરમાં ટ્રેડિંગ થયું હતું જેમાં 1592 શેરો લાભ સાથે અને 2344 શેર નુકસાન સાથે બંધ થયા હતા.
