યુદ્ધની તૈયારી કરી રહી છે ઉત્તર કોરિયાની સેના,તાનાશાહ કિમ જોંગ ઉનના નિશાના પર આ દેશ
દિલ્હી:ઉત્તર કોરિયાના તાનાશાહ કિમ જોંગ ઉન હંમેશા પોતાના નિર્ણયોને લઈને હેડલાઈન્સમાં રહે છે. રશિયા-યુક્રેન યુદ્ધની વચ્ચે ઉત્તર કોરિયાના નેતા કિમ જોંગ ઉને ફરી એકવાર મોટો નિર્ણય લઈને બધાને ચોંકાવી દીધા છે.કિમ જોંગે પોતાની સેનાને યુદ્ધ અભ્યાસ અને યુદ્ધની તૈયારીઓને મજબૂત કરવાનો આદેશ આપ્યો છે.આનું કારણ અમેરિકા સાથેનો તણાવ વધી રહ્યો હોવાનું માનવામાં આવે છે.ઉત્તર કોરિયાની સત્તાવાર કોરિયન સેન્ટ્રલ ન્યૂઝ એજન્સીએ મંગળવારે અહેવાલ આપ્યો કે,કિમ જોંગ-ઉને સોમવારે સત્તાધારી વર્કર્સ પાર્ટીના સેન્ટ્રલ મિલિટરી કમિશનની બેઠકની અધ્યક્ષતા કરી અને સશસ્ત્ર દળોને વિકાસનો નવો તબક્કો ખોલવા હાકલ કરી.
તેમની સેનાને ‘વિજયી કારનામા’ કરવા અને ‘અતુલનીય સૈન્ય કૌશલ’ દર્શાવવા પ્રોત્સાહિત કર્યા. એજન્સીએ જણાવ્યું હતું કે કમિશનના સભ્યોએ સૈન્યમાં પરિવર્તન લાવવાના હેતુથી સંખ્યાબંધ ક્રિયાઓની ચર્ચા કરી હતી.આમાં ‘સતત વિસ્તરણ અને સઘન ઓપરેશનલ અને કોમ્બેટ એક્સરસાઇઝ’ અને ‘વધુ જોરશોરથી યુદ્ધની તૈયારીઓ હાથ ધરવા’નો સમાવેશ થાય છે.
કોરિયન પીપલ્સ આર્મીની 75મી સ્થાપના વર્ષગાંઠ નિમિત્તે ઉત્તર કોરિયા બુધવારે રાજધાની પ્યોંગયાંગમાં એક વિશાળ સૈન્ય પરેડની તૈયારી કરી રહ્યું હોવાના સંકેતો વચ્ચે આ બેઠક આવી છે.કિમ તેના વધતા પરમાણુ શસ્ત્રો અને મિસાઇલ પ્રોગ્રામમાંથી નવીનતમ હાર્ડવેર પ્રદર્શિત કરવા માટે ઇવેન્ટનો ઉપયોગ કરી શકે છે.અમેરિકા અને એશિયામાં તેના સહયોગી દેશો માટે આ ચિંતાનું કારણ છે.
ગયા અઠવાડિયે, ઉત્તર કોરિયાએ તેના અત્યાર સુધીના સૌથી ભારે પરમાણુ બળ સાથે યુએસનો સામનો કરવાની ધમકી આપી હતી.યુ.એસ. દક્ષિણ કોરિયા સાથે સંયુક્ત કવાયતોનું વિસ્તરણ કરી રહ્યું છે અને આ ક્ષેત્રમાં વધુ અદ્યતન લશ્કરી સંપત્તિઓ જેમ કે બોમ્બર અને એરક્રાફ્ટ કેરિયર્સ તૈનાત કરી રહ્યું છે.ઉત્તર કોરિયાએ આ યોજનાઓની નિંદા કરી છે.તે જાણીતું છે કે વર્ષ 2022માં ઉત્તર કોરિયાએ 70થી વધુ બેલેસ્ટિક મિસાઈલો છોડી હતી.દક્ષિણ કોરિયામાં લક્ષ્યો પર હુમલો કરવા અથવા યુએસ મેઇનલેન્ડ સુધી પહોંચવા માટે રચાયેલ સંભવિત પરમાણુ-સક્ષમ હથિયાર પણ સામેલ છે.
