ઉનાળામાં ટ્રાય કરો પહાડી ટ્વિસ્ટ સાથેનું રિફ્રેશિંગ અનાનસ રાયતું, જાણો રેસીપી
ઉનાળાની સિઝનમાં જમવાની થાળીમાં જો ઠંડુગાર રાયતું હોય તો ભોજનનો આનંદ બમણો થઈ જાય છે. સામાન્ય રીતે મોટાભાગના ઘરમાં બુંદી, દૂધી કે કાકડીનું રાયતું બનતું જ હોય છે, પરંતુ જો તમે આ વખતે કંઈક નવું અને ચટાકેદાર ટ્રાય કરવા માંગતા હોવ તો ‘અનાનસનું રાયતું’ બેસ્ટ ઓપ્શન છે. આ પહાડી સ્ટાઈલની રેસીપી સ્વાદમાં જેટલી અદભૂત છે, બનાવવામાં એટલી જ સરળ છે. આ રાયતામાં ફળોની મીઠાશ, દહીંની ખટાશ અને પહાડી મસાલાનો તીખો સ્વાદ એક અનોખું કોમ્બિનેશન બનાવે છે. ગરમાગરમ પરાઠા, પૂરી કે ચોખા સાથે આ રાયતું પીરસવાથી તે ઉનાળાની બપોરે એક રિફ્રેશિંગ ટ્રીટ સાબિત થાય છે.
-
જરૂરી સામગ્રી
મુખ્ય: 2 કપ ઠંડુ દહીં, 1 નંગ અનાનસ (ઝીણું સમારેલું)
પહાડી મસાલા માટે: અડધો કપ ફુદીનો, એક ઝૂડી કોથમીર, 3-4 લીલાં મરચાં, 1 ચમચી જીરું, 1 ચમચી રાઈ.
અન્ય મસાલા: 1 ચમચી શેકેલું જીરું પાવડર, 1 ચમચી લાલ મરચું, અડધી ચમચી કાશ્મીરી લાલ મરચું, અડધી ચમચી હિંગ, મીઠું સ્વાદ મુજબ.
વઘાર માટે: 1 ચમચી સરસવનું તેલ, 10-12 મીઠા લીમડાના પાન.
- બનાવવાની રીત
સૌથી પહેલા અનાનસને ધોઈ, છોલીને તેના બિલકુલ ઝીણા ટુકડા કરી લો. હવે ખલ-દસ્તામાં ફુદીનો, કોથમીર, જીરું, રાઈ અને લીલા મરચાં ઉમેરી તેને અધકચરું વાટી લો. યાદ રાખો કે આ મસાલાને મિક્સરમાં પીસવાને બદલે વાટવાથી તેનો અસલી પહાડી સ્વાદ જળવાઈ રહેશે. એક મોટા બાઉલમાં ઠંડુ દહીં લો અને તેને બરાબર ફેંટી લો. હવે તેમાં તૈયાર કરેલો પહાડી મસાલો અને અનાનસના ટુકડા ઉમેરો. આ મિશ્રણમાં મીઠું, લાલ મરચું અને શેકેલું જીરું પાવડર ઉમેરી બરાબર મિક્સ કરો. એક વઘારિયામાં સરસવનું તેલ ગરમ કરો. તેમાં હિંગ અને મીઠો લીમડો નાખી વઘાર તૈયાર કરો. આ ગરમાગરમ વઘારને રાયતામાં રેડીને તરત જ ઢાંકી દો, જેથી વઘારની સુગંધ રાયતામાં બરાબર ભળી જાય. જો અનાનસ વધારે ખાટું હોય તો સ્વાદને બેલેન્સ કરવા માટે એક ચમચી ખાંડ ઉમેરી શકાય છે. જો તમને અનાનસનો ક્રંચ (કડકપણું) ઓછો પસંદ હોય, તો ટુકડાને હળવા સ્ટીમ કરી શકાય છે. આ રાયતું બનાવીને 10 મિનિટ સેટ થવા દો અને પછી ઠંડુ પીરસો.
