રિવોઈ ન્યૂઝ, 26 ઓગસ્ટ, 2026 – અમેરિકાએ આખા વિશ્વમાં વિઝા એપોઈન્ટમેન્ટ સ્થગિત કરી દીધી હોવાના અહેવાલ છે. પ્રમુખ ડોનાલ્ડ ટ્રમ્પની સરકારના આ પગલાથી ભારત સહિત અનેક દેશોના લોકો ચિંતામાં પડી ગયા છે કે તેમણે અરજી કરેલી હોય તેમનું શું થશે? અહીં એવા તમામ પ્રશ્નોના જવાબ આપવાનો પ્રયાસ કરવામાં આવ્યો છે.
અમેરિકી વિદેશ મંત્રાલયે વિશ્વભરના અમેરિકી એમ્બેસીઓ અને કોન્સ્યુલેટ્સ ખાતે ઇમિગ્રન્ટ વિઝા એપોઇન્ટમેન્ટ્સને સ્થગિત કરી દીધી છે અથવા તેનું પુનર્ગઠન કર્યું છે, જેના કારણે અમેરિકામાં કાયમી વસવાટ કરવા ઇચ્છતા અરજદારો માટે અનિશ્ચિતતા ઊભી થઈ છે.
અમેરિકાના વિદેશ મંત્રાલયે આ પગલાને કોન્સ્યુલર અધિકારીઓ માટેના વૈશ્વિક તાલીમ કાર્યક્રમના ભાગરૂપે વર્ણવ્યું છે. આ પ્રોગ્રામનો હેતુ અધિકારીઓ વિઝા અરજદારોનું મૂલ્યાંકન કેવી રીતે કરે છે તેને મજબૂત બનાવવાનો છે, જેમાં અરજદાર યુએસમાં પ્રવેશ્યા પછી પબ્લિક ચાર્જ એટલે કે સરકારી સહાય પર નિર્ભર બની શકે છે કે કેમ તેનો પણ સમાવેશ થાય છે.
અન્ય કેટેગરી ઉપર કોઈ પ્રભાવ નહીં
આ તાજેતરના પગલાથી તમામ યુએસ વિઝા કેટેગરીઝને બદલે મુખ્યત્વે ઇમિગ્રન્ટ વિઝા એપોઇન્ટમેન્ટ્સ પ્રભાવિત થઈ છે. જે અરજદારોના ઇન્ટરવ્યુ પહેલેથી જ શિડ્યુલ હતા, તેઓને જાણ કરવામાં આવી છે કે તેમની એપોઇન્ટમેન્ટ્સ રદ કરવામાં આવી છે અથવા રિશિડ્યુલ કરવામાં આવી રહી છે અને તેઓને નવી તારીખો વિશે માહિતી મળશે. અલબત્ત, વિદેશ મંત્રાલયે સામાન્ય એપોઇન્ટમેન્ટ શિડ્યુલિંગ ક્યારે શરૂ થશે તેની કોઈ સમયસીમા આપી નથી.
આ નિર્ણયથી કોણ પ્રભાવિત થયું છે?
આની તાત્કાલિક અસર યુએસ કોન્સ્યુલર પ્રોસેસિંગ દ્વારા ઇમિગ્રન્ટ વિઝા માટે અરજી કરનારા વિદેશી નાગરિકો પર પડી છે. આમાં ફેમિલી-બેઝ્ડ ઇમિગ્રેશન હેઠળના અરજદારો, જેમ કે યુએસ નાગરિકો અને કાયદેસરના કાયમી નિવાસીઓના સગાં-સંબંધીઓ, તેમજ રોજગાર આધારિત ઇમિગ્રન્ટ વિઝા મેળવવા માંગતા લોકોનો સમાવેશ થાય છે.
આ નિર્ણય ખાસ કરીને તે અરજદારો માટે વધુ મહત્વપૂર્ણ છે જેમણે ઇમિગ્રેશન પ્રક્રિયાનો મોટાભાગનો ભાગ પૂરો કરી લીધો હતો અને તેમના અંતિમ કોન્સ્યુલર ઇન્ટરવ્યુની રાહ જોઈ રહ્યા હતા.
ફાઇનાન્શિયલ ટાઇમ્સના અહેવાલ મુજબ, શિડ્યુલ ઇન્ટરવ્યુ ધરાવતા અરજદારોને ઇમેઇલ મળ્યા છે જેમાં જણાવવામાં આવ્યું છે કે તેમની એપોઇન્ટમેન્ટ્સ રિશિડ્યુલ કરવામાં આવી છે અને નવી તારીખો તથા સમય વિશે વધુ વિગતો પછીથી આપવામાં આવશે.
આ ઘટનાક્રમને દરેક યુએસ વિઝા કેટેગરીના સંપૂર્ણ વિલંબ અથવા સસ્પેન્શન તરીકે ન જોવો જોઈએ. નોન-ઇમિગ્રન્ટ વિઝા, જેમાં એચ-1બી અને ટુરિસ્ટ વિઝાનો સમાવેશ થાય છે, તે અલગ નિયમો અને પ્રક્રિયાઓ દ્વારા સંચાલિત થાય છે.
અમેરિકા આવું શા માટે કરી રહ્યું છે?
યુએસના વિદેશ મંત્રાલયે એપોઇન્ટમેન્ટના ફેરફારોને અધિકારીઓની તાલીમ કાર્યક્રમ સાથે જોડ્યા છે. મંત્રાલયના એક પ્રવક્તાએ જણાવ્યું હતું કે કોન્સ્યુલર અધિકારીઓ અરજદારોનું વ્યાપક અને સુસંગત મૂલ્યાંકન કરી શકે તે સુનિશ્ચિત કરવા સરકારે ઓગસ્ટમાં ગ્લોબલ ટ્રેનિંગ ઇનિશિયેટિવ શરૂ કર્યું હતું.
પબ્લિક ચાર્જનો અર્થ શું થાય છે?
આ મૂલ્યાંકનમાં અરજદારની નાણાકીય સ્થિતિ, ઉંમર, આરોગ્ય, કૌશલ્ય અને કૌટુંબિક પરિસ્થિતિ સહિતના અનેક પાસાઓનો સમાવેશ થઈ શકે છે. ટ્રમ્પ વહીવટીતંત્રે પબ્લિક-ચાર્જ તપાસને વધુ કડક બનાવવા વધારાના પગલાં લીધાં છે. વિદેશ મંત્રાલયે એક પાઇલટ પ્રક્રિયાની જાહેરાત કરી હતી જેના હેઠળ કેટલાક ઇમિગ્રન્ટ વિઝા અરજદારોએ યુએસ સિટીઝનશિપ એન્ડ ઇમિગ્રેશન સર્વિસીસ દ્વારા પબ્લિક ચાર્જ બોન્ડ મેળવવો જરૂરી બની શકે છે.
વહીવટીતંત્રે ગ્રીન-કાર્ડ અરજદારો માટે પબ્લિક-ચાર્જ નિયમને પુનર્જીવિત કરવા માટે પણ પગલાં લીધાં છે. તે નિયમ 18 સપ્ટેમ્બરથી અમલમાં આવવાનો છે અને તે માટે અરજદારોએ સાબિત કરવું પડશે કે તેઓ યુનાઇટેડ સ્ટેટ્સ પર બોજ બનવાની સંભાવના ધરાવતા નથી.
પહેલેથી જ શિડ્યુલ થયેલા ઇન્ટરવ્યુનું શું થશે?
જે અરજદારોને ઇન્ટરવ્યુની એપોઇન્ટમેન્ટ્સ પહેલેથી જ મળી ચૂકી હતી તેમની એપોઇન્ટમેન્ટ હાલ મોકૂફ રહેશે. મંત્રાલયે સંકેત આપ્યો છે કે પ્રભાવિત અરજદારોને નવી એપોઇન્ટમેન્ટની માહિતી મળશે. જો કે આ અંગે કોઈ સમયપત્રક આપવામાં આવ્યું ન હોવાથી અરજદારો હજુ સુધી જાણતા નથી કે તેમણે કેટલો સમય રાહ જોવી પડી શકે છે.
આ વિલંબ એવા લોકોને અસર કરી શકે છે જેમણે ઇન્ટરવ્યુ સ્ટેજ સુધી પહોંચતા પહેલા પૂરતા પ્રમાણમાં પેપરવર્ક, તબીબી તપાસ અને અન્ય જરૂરિયાતો પહેલેથી જ પૂરી કરી લીધી છે.
હાલમાં એવા કોઈ સંકેત નથી કે એપોઇન્ટમેન્ટ સ્થગિત થવાને કારણે અરજીઓ આપમેળે રદ કરવામાં આવી રહી છે, અર્થાત અગાઉથી કરી દીધેલી અરજી રદ નહીં થાય એવું માનવાને કારણ છે.
શું આ 75 દેશોના વિઝા સસ્પેન્શન જેવું જ છે?
ના. વિશ્વવ્યાપી એપોઇન્ટમેન્ટ સ્થગિત કરવાનો નિર્ણય એવા સમયે આવી છે જ્યારે હજુ થોડા સમય પહેલા જ 75 દેશોના અરજદારો માટે ઇમિગ્રન્ટ વિઝા પ્રોસેસિંગને અસર કરતી ટ્રમ્પ વહીવટીતંત્રની એક અલગ નીતિને ફેડરલ જજ દ્વારા રદ કરવામાં આવી હતી.
યુએસ ડિસ્ટ્રિક્ટ જજ જીનેટ વર્ગાસે 21 ઓગસ્ટે ચુકાદો આપ્યો હતો કે આ નીતિ વિદેશમંત્રી માર્કો રુબિયોના વૈધાનિક અધિકારથી પર હતી. અગાઉના પગલામાં રાષ્ટ્રીયતાના આધારે કડક નિયંત્રણો લાદવામાં આવ્યા હતા, જેને કારણે બ્રાઝિલ, કોલંબિયા, પાકિસ્તાન અને બાંગ્લાદેશ તેમજ આફ્રિકા, મધ્ય પૂર્વ અને કેરેબિયન દેશોના અરજદારોને અસર કરી હતી.
અરજદારોએ આગળ શું અપેક્ષા રાખવી જોઈએ?
હાલ પૂરતું રદ થયેલા ઇન્ટરવ્યુ વાળા અરજદારોએ નવી તારીખની માહિતી માટે રાહ જોવી પડશે. સૌથી મોટો પ્રશ્ન સમયનો છે. વિદેશ મંત્રાલયે એ નથી કહ્યું કે તાલીમ કાર્યક્રમ કેટલો સમય ચાલશે અથવા રદ થયેલી એપોઇન્ટમેન્ટ્સ માટે ક્યારે ફરી નવી તારીખો આપવામાં આવશે. તેથી અરજદારો તેમના ઇન્ટરવ્યુના સમય અને પબ્લિક-ચાર્જ સ્ક્રીનિંગ તેમના કેસને કેવી રીતે અસર કરી શકે છે તે બંને અંગે અનિશ્ચિતતાનો સામનો કરી રહ્યા છે.
