દિગ્ગજ અભિનેતા વિક્રમ ગોખલેનું 82 વર્ષની વયે નિધન,પૂણેની હોસ્પિટલમાં લીધા અંતિમ શ્વાસ
મુંબઈ:દિગ્ગજ અભિનેતા વિક્રમ ગોખલેનું 82 વર્ષની વયે નિધન થયું છે.અભિનેતાએ 26 નવેમ્બરે બપોરે પુણેની એક હોસ્પિટલમાં અંતિમ શ્વાસ લીધા હતા.આજે સાંજે પૂણેના વૈકુંઠ સ્મશાનગૃહમાં તેમના અંતિમ સંસ્કાર કરવામાં આવશે.છેલ્લા કેટલાક દિવસોથી એવા અહેવાલો હતા કે અભિનેતા પુણેની દીનાનાથ હોસ્પિટલમાં દાખલ છે.તેની સારવાર ચાલી રહી હતી. હાલત થોડી નાજુક હતી.જો કે, ડોકટરો તેને રિવાઈવ કરવા માટેના તમામ પ્રયાસો કરી રહ્યા હતા.
બુધવારે અભિનેતાના નિધનના સમાચાર સોશિયલ મીડિયા પર આગની જેમ ફેલાઈ ગયા.જે બાદ તેમની પત્ની વૃષાલી ગોખલેએ ગુરુવારે સવારે આ સમાચારને અફવા ગણાવી હતી. લોકોને લેટેસ્ટ અપડેટ આપવાની સાથે માહિતી પણ આપવામાં આવી હતી. એવું કહેવામાં આવ્યું હતું કે તે કોમામાં છે. અભિનેતાના મૃત્યુના સમાચાર સાંભળ્યા પછી, ઘણી હસ્તીઓએ પણ સોશિયલ મીડિયા પર અભિનેતાને શ્રદ્ધાંજલિ આપી હતી.
વિક્રમ ગોખલેએ વર્ષ 1971માં અમિતાભ બચ્ચનની ફિલ્મ ‘પરવાના’થી પોતાના કરિયરની શરૂઆત કરી હતી. વિક્રમ ગોખલેએ હિન્દી અને મરાઠી ફિલ્મોમાં શાનદાર અભિનય કર્યો હતો.તેણે ‘ભૂલ ભુલૈયા’, ‘મિશન મંગલ’, ‘દે દના દન’, ‘હિચકી’, ‘નિકમ્મા’, ‘અગ્નિપથ’ અને હમ દિલ દે ચૂકે સનમ જેવી શાનદાર ફિલ્મો કરી છે.વિક્રમ ગોખલેના કેટલાક પાત્રો હંમેશા યાદ રહેશે.વિક્રમ ગોખલે છેલ્લે શિલ્પા શેટ્ટી અને અભિમન્યુ દસાની સાથે ફિલ્મ ‘નિકમ્મા’માં જોવા મળ્યા હતા.
વિક્રમ ગોખલે વર્ષ 2010માં આવેલી મરાઠી ફિલ્મ ‘અનુમતિ’માં જોવા મળ્યા હતા, જેમાં તેમના શાનદાર અભિનયથી બધાનું દિલ જીતી લીધું હતું.આ ફિલ્મ માટે વિક્રમ ગોખલેને સર્વશ્રેષ્ઠ અભિનેતાનો રાષ્ટ્રીય પુરસ્કાર પણ એનાયત કરવામાં આવ્યો હતો. દિગ્ગજ અભિનેતા વિક્રમ ગોખલે મરાઠી થિયેટર અને ફિલ્મ અભિનેતા ચંદ્રકાંત ગોખલેના પુત્ર હતા.વિક્રમ ગોખલેએ માત્ર હિન્દી જ નહીં,રીઝનલ ફિલ્મ ઇન્ડસ્ટ્રીઝમાં પણ સારું કામ કર્યું છે.
