અમદાવાદ, 10 ફેબ્રુઆરી 2026: ગુજરાતમાં હાલ હવામાનનો મિજાજ એકાએક બદલાયો છે, જેના કારણે રાજ્યવાસીઓ ‘બેવડી ઋતુ’ (Double Season) નો અનુભવ કરી રહ્યા છે. હવામાન વિભાગના જણાવ્યા અનુસાર, ઉત્તર-પૂર્વના પવનો ફૂંકાતા સવારે હળવી ઠંડીનો અહેસાસ થાય છે, પરંતુ સૂર્યપ્રકાશ વધતાની સાથે જ બપોરના સમયે ગરમીનો આકરો મિજાજ જોવા મળે છે.
છેલ્લા કેટલાક દિવસોમાં રાજ્યના લઘુત્તમ તાપમાનમાં 3 થી 5 ડીગ્રી સુધીનો વધારો નોંધાયો છે, જે ફેબ્રુઆરી મહિનાના સામાન્ય સરેરાશ તાપમાન કરતા નોંધપાત્ર રીતે ઊંચું છે. ખાસ કરીને અમદાવાદ, સુરત અને રાજકોટ જેવા મહાનગરોમાં તાપમાનનો પારો 30 થી 34 ડીગ્રી ની આસપાસ પહોંચી રહ્યો છે. હવામાન નિષ્ણાતોના મતે, પવનની દિશામાં થયેલા ફેરફાર અને ઉત્તર ભારતમાં વેસ્ટર્ન ડિસ્ટર્બન્સની અસરે ઠંડીનું જોર ઘટાડ્યું છે.
એક જ દિવસમાં ઠંડી અને ગરમીના મિશ્ર વાતાવરણને કારણે વાયરલ ઇન્ફેક્શન, શરદી અને ઉધરસના કેસોમાં પણ વધારો જોવા મળી રહ્યો છે. આગામી એક સપ્તાહ સુધી રાજ્યમાં આવું જ સૂકું અને મિશ્ર વાતાવરણ યથાવત્ રહેવાની શક્યતા છે.
વધુ વાંચોઃ રાજકોટથી દુબઈ અને બેંગકોકની ફ્લાઇટ્સ શરૂ કરવા રજૂઆત કરાઈ
