જામનગર, 27 ફેબ્રુઆરી, 2026 – Arjun Tendulkar’s pre-wedding દિગ્ગજ ક્રિકેટર સચિન તેંડુલકરના પુત્ર અર્જુનના લગ્ન 5 માર્ચના રોજ થવાના છે. આ લગ્ન માટે પ્રી-વેડિંગ ફંક્શન્સ શરૂ થઈ ગયા છે. ગયા વર્ષે અર્જુનની સગાઈ સોનિયા ચંડોક સાથે થઈ હતી. સચિન તેંડુલકર પોતાની પત્ની અને અર્જુન-સોનિયા સાથે અંબાણી પરિવાર સાથે પ્રી-વેડિંગ માટે જામનગર પહોંચ્યા હતા. આ પ્રસંગનો એક વીડિયો મુંબઈ ઈન્ડિયન્સે સોશિયલ મીડિયા પર શેર કર્યો છે. આ ફંક્શન દરમિયાન સચિન તેંડુલકરે એક ઈમોશનલ સ્પીચ આપી હતી જે સોશિયલ મીડિયા પર ખૂબ વાયરલ થઈ રહી છે.
તેંડુલકર પરિવારે પૂજા સાથે પ્રી-વેડિંગ સેલિબ્રેશનની શરૂઆત કરી હતી. બધા જાણે છે કે આ જ સ્થળે અનંત અંબાણી અને રાધિકા મર્ચન્ટના લગ્ન થયા હતા. આ પ્રસંગે સચિનનો આખો પરિવાર હાજર હતો. તેની સાથે જ સોનિયા ચંડોકનો પરિવાર પણ ત્યાં હાજર રહ્યો હતો. સચિન તેંડુલકરે આ પ્રસંગે અંબાણી પરિવારનો આભાર માન્યો હતો. તેમણે કહ્યું કે, “અમે આ યુગલને આગળની સફર માટે આશીર્વાદ આપવા માટે આનાથી વધુ સારી જગ્યા અને વધુ સારા લોકોની પસંદગી ન કરી શક્યા હોત. અમને અહીં આમંત્રિત કરવા બદલ તમારો ખૂબ ખૂબ આભાર.”
સચિન તેંડુલકરે અર્જુન વિશે કહ્યું…
આ સાથે જ સચિને અર્જુન તેંડુલકર અને સોનિયાના પ્રેમ વિશે પણ વાત કરી હતી. તેમણે કહ્યું કે, “જ્યારે પુત્ર કોઈ છોકરીને ઘરે લાવીને પરિચય કરાવે છે, ત્યારે લાગે છે કે પુત્ર મોટો થઈ ગયો છે. તેઓ એકબીજાના પ્રેમમાં પાગલ દેખાઈ રહ્યા છે. અર્જુન, મારે કહેવું પડશે કે મને તારા પર ખૂબ ગર્વ છે. તને કોઈ એવી ખાસ વ્યક્તિ મળી છે જે તને એટલો જ પ્રેમ કરે છે જેટલો તું તેને કરે છે.” સચિનની આ સ્પીચનો વીડિયો સોશિયલ મીડિયા પર ખૂબ જ વાયરલ થઈ રહ્યો છે.
પ્રી-વેડિંગ સેલિબ્રેશન દરમિયાન નીતા અંબાણીએ શું કહ્યું? જુઓ વીડિયો
નીતા અંબાણીએ આ સેલિબ્રેશન દરમિયાન કહ્યું કે, “અમે અહીં એ જ જગ્યાએ એકઠા થયા છીએ જ્યાં 2 વર્ષ પહેલા અનંત અને રાધિકાના લગ્ન થયા હતા. સચિન અને અંજલિ, તમે હંમેશા અમારા પરિવારની જેમ રહ્યા છો અને આજે તમારી ખુશીમાં સામેલ થઈને અમને આનંદ થાય છે. મારા વ્હાલા અર્જુન, મેં તને અમારી શાળાના એક નાનકડા છોકરાથી લઈને અત્યારે અહીં ઊભેલા, પોતાની જિંદગીની સૌથી સુંદર પાર્ટનરશિપ શરૂ કરવા માટે તૈયાર થતા જોયો છે.”
