કેરળમાં ચોમાસાનું સત્તાવાર આગમન: ભારે વરસાદનું ઓરેન્જ એલર્ટ
તિરુવનંતપુરમ, 4 જૂન 2026: ભારતીય હવામાન વિભાગના જણાવ્યા અનુસાર, દક્ષિણ-પશ્ચિમ ચોમાસાએ કેરળમાં સત્તાવાર રીતે દસ્તક આપી દીધી છે. કેરળના ઘણા ભાગોમાં ગઈકાલ રાતથી જ ભારે વરસાદ પડી રહ્યો છે. હવામાન વિભાગે સ્પષ્ટ કર્યું છે કે, ભારતમાં ચોમાસાનો પ્રવેશ થઈ ચૂક્યો છે. કેરળમાં ચોમાસાના આગમનની સત્તાવાર જાહેરાત સાથે જ હવે સૌની નજર એ વાત પર મંડાયેલી છે કે દિલ્હી-NCR અને દેશના અન્ય હિસ્સાઓમાં કાળઝાળ ગરમીથી ક્યારે રાહત મળશે. આ અંગે હવામાન વિભાગે રાહતરૂપ આગાહી કરી છે કે આગામી બે-ચાર દિવસમાં ઉત્તર પ્રદેશ, દિલ્હી સહિત દેશના અન્ય ભાગોમાં પણ ગરમીથી આંશિક રાહત મળવાની સંભાવના છે.
દક્ષિણ-પશ્ચિમ ચોમાસાની આગળની ગતિવિધિ અંગે માહિતી આપતા હવામાન વિભાગે જણાવ્યું કે, આગામી 3 થી 4 દિવસમાં ચોમાસું કર્ણાટક તટ થઈને ગોવા સુધી આગળ વધશે. ચોમાસાને આગળ વધવા માટે જે પ્રકારની સાનુકૂળ હવામાન પરિસ્થિતિઓ હોવી જોઈએ, તે તમામ હાલમાં જોવા મળી રહી છે. જોકે, હવામાન વૈજ્ઞાનિકોનું એવું પણ અનુમાન છે કે 10 જૂન બાદ ચોમાસાની પ્રગતિ થોડી ધીમી પડી શકે છે.
ચોમાસાના આગમન સાથે હવામાન વિજ્ઞાન વિભાગે કેરળના ત્રણ જિલ્લાઓ – અલપ્પુઝા, કોટ્ટાયમ અને એર્નાકુલમ માટે ‘ઓરેન્જ એલર્ટ’ જાહેર કર્યું હતું. હવામાન એજન્સીએ રાજ્યના કેટલાક ભાગોમાં ગાજવીજ સાથે ભારે વરસાદની સંભાવના વ્યક્ત કરી છે. ઓરેન્જ એલર્ટનો અર્થ એ છે કે આ વિસ્તારોમાં 11 થી 20 સેન્ટિમીટર સુધીનો અતિ ભારે વરસાદ પડી શકે છે.
હવામાન વિભાગના જણાવ્યા મુજબ, વરસાદ અને વાદળોના ગડગડાટ દરમિયાન 40 કિલોમીટર પ્રતિ કલાકની ઝડપે પવન ફૂંકાઈ શકે છે. તિરુવનંતપુરમ, કોલ્લમ, પથાનમથિટ્ટા, ઇડુક્કી અને ત્રિશૂર જિલ્લાઓમાં પણ મધ્યમ વરસાદની આગાહી છે. આ જિલ્લાઓમાં પણ પવનની ઝડપ 40 કિમી/કલાકની રહી શકે છે. ઉલ્લેખનીય છે કે અગાઉ હવામાન વિભાગે ગુરુવાર માટે આઠ જિલ્લાઓમાં ઓરેન્જ એલર્ટ જાહેર કર્યું હતું.
