નવી દિલ્હી, 4 સપ્ટેમ્બર 2026: પાકિસ્તાન સરહદના દક્ષિણી હિસ્સા પાસે ભારતીય વાયુસેના (IAF) દ્વારા એક મોટા સૈન્ય અભ્યાસનું આયોજન કરવામાં આવ્યું છે, જેના માટે સરકારે એરસ્પેસ રિઝર્વ કરવા અંગેની નોટિફિકેશન જારી કરી દીધી છે. રાજસ્થાનના જેસલમેર, બાડમેર, ફલોદી અને જોધપુર આસપાસના હવાઈ ક્ષેત્રમાં નિર્ધારિત સમય દરમિયાન સામાન્ય હવાઈ ટ્રાફિક પર પ્રતિબંધ રહેશે. જારી કરાયેલા NOTAM મુજબ, આ એરસ્પેસ રિઝર્વેશન 21 સપ્ટેમ્બરથી 7 ઓક્ટોબર 2026 સુધી અમલમાં રહેશે.
આ અભ્યાસ દરમિયાન પાકિસ્તાનના જેકાબાદ, સુક્કુર, નવાબશાહ, કરાચી, મુલ્તાન અને બહાવલપુર સામેના ભારતીય ક્ષેત્રમાં વાયુસેનાની આક્રમક ગતિવિધિઓ જોવા મળશે. અભ્યાસ માટે એરસ્પેસની ઉપલી સીમા 27,000 ફૂટથી લઈને 49,000 ફૂટ સુધીની રાખવામાં આવી છે, જે દર્શાવે છે કે આકાશમાં ઊંચાઈ પર ફાઈટર જેટ્સ અને અન્ય વિમાનોની મોટી કવાયત થશે.
- આ એરસ્પેસ રિઝર્વેશનનું સમયપત્રક ભારતીય સમય (IST) મુજબ નીચે મુજબ રહેશે:
21 થી 24 સપ્ટેમ્બર દરમિયાન સવારે 9 થી બપોરે 1 વાગ્યા સુધી અને સાંજે 8 થી રાત્રે 12 વાગ્યા સુધી.
28 થી 30 સપ્ટેમ્બર દરમિયાન સવારે 9 થી બપોરે 1 વાગ્યા સુધી અને સાંજે 8 થી રાત્રે 12 વાગ્યા સુધી.
1 ઓક્ટોબરના રોજ સવારે 9 થી બપોરે 1 વાગ્યા સુધી અને સાંજે 8 થી રાત્રે 12 વાગ્યા સુધી.
5 થી 7 ઓક્ટોબર દરમિયાન સવારે 9 થી બપોરે 1 વાગ્યા સુધી અને સાંજે 8 થી રાત્રે 12 વાગ્યા સુધી.
આ એરસ્પેસ રિઝર્વેશન ભારત-પાકિસ્તાન આંતરરાષ્ટ્રીય સરહદના અત્યંત સંવેદનશીલ ક્ષેત્રો જેવા કે નાલ-બિકાનેર, જેસલમેર, બાડમેર અને ઉતરાલાઈની આસપાસ છે, જેને સુરક્ષાની દ્રષ્ટિએ ખૂબ જ મહત્વપૂર્ણ માનવામાં આવી રહ્યું છે.
