કાબુલ, 21 સપ્ટેમ્બર 2026: અફઘાનિસ્તાનના ઉત્તર-પૂર્વીય પ્રાંત કુનારને નિશાન બનાવીને પાકિસ્તાની વાયુસેના દ્વારા કરવામાં આવેલા હવાઈ હુમલામાં ઓછામાં ઓછા ૩ લોકોના મોત નીપજ્યા છે અને અનેક લોકો ગંભીર રીતે ઘાયલ થયા છે. અફઘાન મીડિયા ‘ટોલો ન્યૂઝ’ દ્વારા પ્રાંતીય અધિકારીઓને ટાંકીને આ અંગેની પુષ્ટિ કરવામાં આવી છે. ઉત્તર-પશ્ચિમ પાકિસ્તાનમાં એક પોલીસ સ્ટેશન પર થયેલા આત્મઘાતી બોમ્બ વિસ્ફોટના જવાબમાં પાકિસ્તાને આ સૈન્ય કાર્યવાહી કરી હોવાનું માનવામાં આવે છે, જેના કારણે બંને પડોશી દેશો વચ્ચે સ્થિતિ વધુ વણસી છે.
તાલિબાન શાસનના મુખ્ય પ્રવક્તા ઝબીહુલ્લાહ મુજાહિદે ઇસ્લામાબાદને સ્પષ્ટ શબ્દોમાં ચેતવણી આપતા જણાવ્યું છે કે, “જો પાકિસ્તાન યુએન ચાર્ટરના આર્ટિકલ 51 નો દુરુપયોગ કરીને અફઘાનિસ્તાનની જમીનની સંપ્રભુતાનું ઉલ્લંઘન કરશે, તો કાબુલ પોતાની ભૂમિનું રક્ષણ કરવા માટે આકરી લશ્કરી જવાબી કાર્યવાહી કરશે.” તાજેતરમાં ફેબ્રુઆરી મહિનામાં પણ બંને દેશો વચ્ચે ભારે સૈન્ય અથડામણ જોવા મળી હતી.
પાકિસ્તાન તરફથી અફઘાનિસ્તાનની ધરતી પરથી ‘તહરીક-એ-તાલિબાન પાકિસ્તાન’ (TTP) અને બલૂચ વિદ્રોહી જૂથો સક્રિય હોવાના આરોપો લગાવવામાં આવ્યા છે. ‘અલ અરેબિયા ઇંગ્લિશ’ સાથેની મુલાકાતમાં આ આરોપોને સખત શબ્દોમાં ફગાવતા મુજાહિદે જણાવ્યું હતું કે, તાલિબાન સરકાર અફઘાનિસ્તાનની ભૂમિનો ઉપયોગ અન્ય કોઈ દેશ વિરુદ્ધ કરવા દેતી નથી. તેમણે ઉમેર્યું કે TTP અને બલૂચ હિંસાની સમસ્યા 2021 માં તાલિબાન સત્તા પર આવ્યું તે પહેલાંથી જ પાકિસ્તાનની આંતરિક સમસ્યા રહી છે, જેથી પાકિસ્તાને પોતાની આંતરિક સુરક્ષા પર ધ્યાન આપવું જોઈએ.
-
શાંતિ વાટાઘાટો અને સાઉદી અરેબિયાની મધ્યસ્થતાનો પ્રસ્તાવ
હવાઈ હુમલા અને સૈન્ય તણાવ છતાં, તાલિબાન પ્રવક્તાએ સંકેત આપ્યો હતો કે કાબુલ હજુ પણ ઇસ્લામાબાદ સાથે ટેબલ પર ચર્ચા કરવા માટે તૈયાર છે. સીમા સુરક્ષા અને આતંકવાદ સામે લડવા માટે વધુ સારી ‘ઇન્ટેલિજન્સ શૅરિંગ’ વ્યવસ્થા સ્થાપિત કરવાનો પ્રસ્તાવ મૂકવામાં આવ્યો છે. આ ઉપરાંત, બંને દેશો વચ્ચેના વિવાદને સુલઝાવવા માટે સાઉદી અરેબિયાની મધ્યસ્થતા સ્વીકારવાની પણ અફઘાનિસ્તાને તૈયારી દર્શાવી છે.
