નવી દિલ્હી, 24 સપ્ટેમ્બર 2026: વડાપ્રધાન નરેન્દ્ર મોદીએ જણાવ્યું છે કે સેવાભાવ જે જીવનનો મુખ્ય ઉદ્દેશ્ય છે તે દરેક વ્યક્તિમાં સહજ હોવો જોઈએ. તેમણે ઉમેર્યું કે રાજકારણમાં પણ, સર્વોચ્ચ પદ પ્રાપ્ત કર્યા પછી સેવા જ માર્ગદર્શક સિદ્ધાંત બની રહેવો જોઈએ.
વડાપ્રધાને આજે વડનગરથી વારાણસીની યાત્રા કરી રહેલા ‘સેવા યાત્રીઓ’ (સેવાભાવી સ્વયંસેવકો) સાથે વીડિયો કોન્ફરન્સ દ્વારા સંવાદ સાધ્યો. તેમણે જણાવ્યું હતું કે ‘સેવા પરમો ધર્મઃ’ એટલે કે સેવા એ સર્વોચ્ચ કર્તવ્ય છે તે દેશની પ્રગતિ પાછળનું સૌથી મોટું પ્રેરક બળ બની શકે છે.
વડાપ્રધાને જણાવ્યું હતું કે PM-કિસાન અને PM સૂર્ય ઘર યોજના જેવી અનેક યોજનાઓએ એવી પહેલ તરીકે પોતાની ઓળખ બનાવી છે જે સુનિશ્ચિત કરે છે કે સેવાઓ છેવાડાના માનવી સુધી પહોંચે. તેમણે નોંધ્યું હતું કે સેવાના આ જ ભાવને કારણે ચાર કરોડ ગરીબ પરિવારો કાયમી આવાસ મેળવી શક્યા છે.
મોદીએ કહ્યું કે જ્યારે દેશની નીતિઓમાં સેવાભાવનો સમાવેશ કરવામાં આવે છે, ત્યારે એવી યોજનાઓ અસ્તિત્વમાં આવે છે જેમણે 25 કરોડ લોકોને ગરીબીમાંથી બહાર આવવામાં મદદ કરી છે.
વડાપ્રધાને જણાવ્યું હતું કે રાજકારણ, ચૂંટણીઓ અને શાસનનું પોતાનું મહત્વ હોવા છતાં, રાષ્ટ્રનિર્માણ માટે સૌએ સાથે મળીને કામ કરવું જોઈએ. તેમણે વિકસિત ભારતનાં નિર્માણમાં યુવાનોની મહત્વપૂર્ણ ભૂમિકાને વધુ સક્ષમ બનાવવાનું આહ્વાન કર્યું હતું. મોદીએ ઉલ્લેખ કર્યો હતો કે આજની યુવા પેઢી વિકસિત ભારતના ઘડવૈયા અને તેના મુખ્ય લાભાર્થીઓ એમ બંને હશે.
યાત્રાના સહભાગીઓએ વડાપ્રધાન સાથે તેમના અનુભવો વહેંચ્યા. તેમણે જણાવ્યું કે આ અભિયાનના ભાગરૂપે વૃક્ષારોપણ અને સ્વચ્છતા અભિયાનો હાથ ધરવામાં આવ્યા હતા. તેમણે એ પણ જણાવ્યું કે યાત્રા દરમિયાન તેઓ લોકો સાથે સંવાદ સાધતા હતા અને વિવિધ સરકારી યોજનાઓના લાભો અંગે સકારાત્મક પ્રતિસાદ મેળવતા હતા.
વધુ વાંચો: DRI અને BSFની મોટી કાર્યવાહી, બાંગ્લાદેશથી તસ્કરી કરાયેલું 12 કિલો સોનું જપ્ત
