ઘૂસણખોરી રોકવા અસમ સરકારનો મોટો નિર્ણય: 18 વર્ષથી વધુ ઉંમરના લોકો માટે નવું આધાર કાર્ડ મેળવવા પર લાગ્યો પ્રતિબંધ

ગુવાહાટી, 13 જૂન 2026: ગેરકાયદેસર ઘૂસણખોરી પર લગામ લગાવવા માટે એક મોટું અને નિર્ણાયક પગલું ભરતાં અસમ સરકારે 18 વર્ષથી વધુ ઉંમરના લોકો માટે આધાર કાર્ડ જારી કરવા પર પ્રતિબંધ મૂકવાનો નિર્ણય કર્યો છે. અસમના મુખ્યમંત્રી હિમંતા બિસ્વા સરમાએ શનિવારે કેબિનેટ બેઠક બાદ આ અંગે સત્તાવાર જાહેરાત કરી હતી. મુખ્યમંત્રીએ જણાવ્યું કે, રાજ્ય મંત્રીમંડળે નિર્ણય લીધો છે કે હવેથી 18 વર્ષથી વધુ ઉંમરની વ્યક્તિઓને સામાન્ય પ્રક્રિયા હેઠળ નવા આધાર કાર્ડ જારી કરવામાં આવશે નહીં, જેથી ગેરકાયદેસર સ્થળાંતર કરનારાઓ આ મહત્વપૂર્ણ દસ્તાવેજ મેળવી ન શકે.

• ગેરકાયદેસર બાંગ્લાદેશી નાગરિક આ દસ્તાવેજ મેળવી નહીં શકે

મુખ્યમંત્રીના જણાવ્યા અનુસાર, જો કોઈ વિશેષ પરિસ્થિતિ ઊભી થાય, તો સંબંધિત જિલ્લાના ડેપ્યુટી કમિશનરએ રાજ્ય સરકારને દરખાસ્ત મોકલવી પડશે. રાજ્ય સરકાર આ મામલાની ઝીણવટભરી તપાસ કર્યા પછી જ નક્કી કરશે કે સંબંધિત વ્યક્તિ આ કાર્ડ મેળવવા માટે પાત્ર છે કે નહીં, અને ત્યારબાદ જ મંજૂરી આપવામાં આવશે. સીએમ હિમંતા બિસ્વા સરમાએ જણાવ્યું કે, “રાજ્યમાં આધાર કાર્ડ જારી કરવાની પ્રક્રિયા લગભગ તેની અંતિમ સીમા પર પહોંચી ગઈ છે. કેટલાક જિલ્લાઓમાં તો કવરેજ 100 ટકા કરતા પણ વધુ નોંધાયું છે. અમારે હવે એ શોધવું પડશે કે આ વધારાના કાર્ડ મેળવનારા લોકો કોણ છે.” તેમણે સ્પષ્ટ કર્યું કે આ કડક પગલું ખાસ કરીને એ સુનિશ્ચિત કરવા માટે લેવામાં આવ્યું છે કે કોઈ પણ ગેરકાયદેસર બાંગ્લાદેશી નાગરિક આ દસ્તાવેજ મેળવી ન શકે.

મુખ્યમંત્રીએ માહિતી આપી હતી કે હાલ પૂરતું ચાના બગીચાના શ્રમિક સમુદાય અને અનુસૂચિત જનજાતિના લોકોને આ કાર્ડ જારી કરવાનું ચાલુ રાખવામાં આવશે, કારણ કે આ સમુદાયોના ઘણા લોકો પાસે હજી પણ આ દસ્તાવેજ ઉપલબ્ધ નથી. જો કે, આ છૂટછાટ પણ મર્યાદિત સમયગાળા માટે જ રહેશે. હિમંતા બિસ્વાએ જણાવ્યું હતું કે, “1 એપ્રિલ 2027 થી આ વિશેષ છૂટછાટ પણ સમાપ્ત થઈ જશે. તે તારીખ પછી આ સમુદાયોના 18 વર્ષથી વધુ ઉંમરના લોકો માટે પણ સામાન્ય પ્રક્રિયા બંધ કરી દેવામાં આવશે.” રાજ્ય સરકારે સ્પષ્ટતા કરી છે કે 18 વર્ષથી ઓછી ઉંમરના બાળકો અને કિશોરો માટે આ કાર્ડ જારી કરવાની પ્રક્રિયા પહેલાની જેમ જ સામાન્ય રીતે ચાલુ રહેશે. ઉલ્લેખનીય છે કે, અસમ સરકાર લાંબા સમયથી બાંગ્લાદેશી ઘૂસણખોરી રોકવા માટે દસ્તાવેજીકરણની પ્રક્રિયાને વધુ કડક બનાવવા પર વિચાર કરી રહી હતી, જેનો અમલ હવે શરૂ કરી દેવામાં આવ્યો છે.