કોલકાતામાં આજે ભાજપની વિશાળ રેલી, ગૃહમંત્રી અમિત શાહ આપશે હાજરી,જાણો સંપૂર્ણ કાર્યક્રમ
કોલકાતા:બંગાળ ભાજપના પ્રદેશ અધ્યક્ષ અને સાંસદ ડૉ. સુકાંત મજુમદારાએ કહ્યું છે કે બુધવારે કોલકાતામાં કેન્દ્રીય ગૃહમંત્રી અમિત શાહને સાંભળવા માટે લોકોમાં ભારે ઉત્સાહ છે. બુધવારની રેલી માટે મંગળવાર સાંજથી જ બંગાળના વિવિધ ભાગોમાંથી લોકો કોલકાતા પહોંચવા લાગ્યા છે. તેમણે કહ્યું કે, ગેરુઆ સુનામી બુધવારે કોલકાતામાં ત્રાટકશે.પશ્ચિમ બંગાળ હવે બદલાઈ ગયું છે. અહીંના લોકો હવે મમતા બેનર્જી સરકારથી કંટાળી ગયા છે અને ભ્રષ્ટ સરકારથી આઝાદી ઈચ્છે છે. તેઓ અહીં ધર્મતલામાં બુધવારની રેલી સ્થળની સમીક્ષા કર્યા બાદ બોલી રહ્યા હતા. ઉલ્લેખનીય છે કે મનરેગા અંતર્ગત સો દિવસીય કાર્ય યોજનાના અમલીકરણમાં થતી ગેરરીતિઓના વિરોધમાં આ વિશાળ રેલીનું આયોજન કરવામાં આવી રહ્યું છે.
સુકાંતે કહ્યું, બંગાળ હવે બદલાઈ ગયું છે. બંગાળના લોકો બદલાવા લાગ્યા છે. હવે ભાજપને લોકોનું ભરપૂર સમર્થન મળવા લાગ્યું છે. બંગાળના લોકો મમતા બેનર્જીની સરકારના ભ્રષ્ટાચારથી સંપૂર્ણપણે કંટાળી ગયા છે. તેઓ તેનાથી મુક્તિ ઈચ્છે છે. બુધવારે જ્યારે કેન્દ્રીય પ્રધાન અમિત શાહ અહીં ધર્મતલા આવશે, ત્યારે તમે જોશો કે કેવી રીતે કેસરી સુનામી આખા કોલકાતાને લપેટમાં લેશે. મંગળવાર સાંજથી જ લોકો આવવા લાગ્યા છે. બુધવારે એક લાખથી વધુ લોકો કોલકાતા પહોંચી રહ્યા છે.
એક પ્રશ્નના જવાબમાં તેમણે કહ્યું કે જો તૃણમૂલના બદમાશો બીજેપીના કોઈપણ કાર્યકર્તાને અહીં આવતા અટકાવશે અથવા કોઈપણ પ્રકારનું નુકસાન પહોંચાડવાનો પ્રયાસ કરશે તો તે કોર્ટની અવમાનના ગણાશે. કારણ કે કોર્ટના આદેશ બાદ જ અહીં રેલી માટે પરવાનગી આપવામાં આવી છે. બીજી તરફ તૃણમૂલના ગુંડા કંઈ પણ કરે તો અમારા કાર્યકરો પણ ચૂપ નહીં બેસે.
સૂત્રો પાસેથી મળેલી માહિતી મુજબ કેન્દ્રીય ગૃહમંત્રી બપોરે લગભગ 1.15 વાગ્યે કોલકાતા એરપોર્ટ પહોંચશે. ત્યારબાદ ત્યાંથી વાયુસેનાનું એક સ્પેશિયલ હેલિકોપ્ટર લગભગ 1:35 કલાકે રેસકોર્સ મેદાન પર પહોંચશે. રેસકોર્સ મેદાનમાં પહોંચ્યા બાદ કેન્દ્રીય ગૃહમંત્રી બપોરે 1.45 કલાકે ધર્મતલા પહોંચશે.કેન્દ્રીય ગૃહમંત્રી બપોરે 1:45 થી 3:15 સુધી ધર્મતલા સભા સ્થળે રહેશે. ત્યારબાદ અમિત શાહ બપોરે 3.20 કલાકે રેસકોર્સ મેદાનથી હેલિકોપ્ટર દ્વારા કોલકાતા એરપોર્ટ જવા રવાના થશે. કેન્દ્રીય ગૃહમંત્રી બપોરે 3.45 કલાકે એરફોર્સના વિશેષ વિમાન દ્વારા દિલ્હી પરત ફરશે.
આ દરમિયાન માહિતી પ્રાપ્ત થઈ છે કે સત્તારૂઢ તૃણમૂલ કોંગ્રેસે ભાજપની રેલીમાં ભાગ લેવા માટે કેન્દ્રીય ગૃહ પ્રધાન અમિત શાહના કોલકાતામાં આગમનના દિવસને બ્લેક ડે તરીકે ઉજવવાનું નક્કી કર્યું છે. પાર્ટીના સૂત્રોએ જણાવ્યું કે બંગાળમાં પાર્ટીના ધારાસભ્યો બુધવારે કાળા કપડા પહેરીને વિધાનસભાના શિયાળુ સત્રમાં હાજરી આપશે.
