ઉનાળાની લૂ અને ગરમીથી બચવા માટે વરિયાળીનું શરબત છે આશીર્વાદ સમાન: જાણો બનાવવાની રીત

ગુજરાતમાં ઉનાળાનો પારો સતત વધી રહ્યો છે, ત્યારે ગરમી અને લૂથી બચવા માટે લોકો કુદરતી અને દેશી ઉપાયો તરફ વળી રહ્યા છે. આ કાળઝાળ ગરમીમાં શરીરને અંદરથી ઠંડક આપવા માટે ‘વરિયાળીનું શરબત’ એક રામબાણ ઈલાજ માનવામાં આવે છે. વરિયાળીની તાસીર ઠંડી હોવાથી તે માત્ર તરસ જ નથી છિપાવતી, પરંતુ એસિડિટી, ગેસ અને પેટની બળતરા જેવી સમસ્યાઓમાં પણ તાત્કાલિક રાહત આપે છે. ઘરે શુદ્ધ રીતે બનાવવામાં આવતું આ શરબત બજારના કેમિકલયુક્ત ઠંડા પીણાં કરતા અનેકગણું હેલ્ધી અને સ્વાદિષ્ટ હોય છે.

• સામગ્રી

વરિયાળી: 2 મોટી ચમચી
ખાંડ: 2-3 મોટી ચમચી (સ્વાદ મુજબ) અથવા સાકર
પાણી: 1 ગ્લાસ ઠંડું પાણી
ફુદીનાના પાન: 4-5 (વૈકલ્પિક)
લીંબુનો રસ: 1 નાની ચમચી
બરફના ટુકડા: જરૂર મુજબ

• બનાવવાની રીત

સૌ પ્રથમ વરિયાળીને સાફ કરી એક વાસણમાં 2-3 કલાક માટે પાણીમાં પલાળી રાખો. જો તમારી પાસે સમય હોય, તો તેને આખી રાત પલાળી રાખવાથી તેનો સ્વાદ અને ગુણધર્મો વધુ ખીલી ઉઠે છે. પલાળેલી વરિયાળીને તે જ પાણી સાથે મિક્સર જારમાં નાખો અને એકદમ સ્મૂધ પેસ્ટ બને ત્યાં સુધી પીસી લો. હવે આ મિશ્રણને ગરણી અથવા ચોખ્ખા કપડાની મદદથી ગાળી લો, જેથી વરિયાળીનું અર્કયુક્ત પાણી અલગ થઈ જાય. આ ગાળેલા પાણીમાં સ્વાદ મુજબ ખાંડ, લીંબુનો રસ અને ફુદીનાના પાન ઉમેરો. ખાંડ ઓગળે ત્યાં સુધી તેને બરાબર હલાવો. એક ગ્લાસમાં બરફના ટુકડા નાખો અને તેમાં તૈયાર કરેલું ઠંડું-ઠંડું વરિયાળીનું શરબત રેડો. ઉપરથી ફુદીનાના પાનથી ગાર્નિશ કરી પીરસો.

• વરિયાળીના શરબતના ફાયદા

તે શરીરના તાપમાનને નિયંત્રિત રાખે છે અને લૂ લાગવાથી બચાવે છે.
જમ્યા પછી આ શરબત પીવાથી પાચનક્રિયા ઝડપી બને છે.
આ કુદરતી ડિટોક્સ ડ્રિંક લોહીને શુદ્ધ કરવામાં પણ મદદરૂપ થાય છે.