રાજ્યસભા ચૂંટણીની જાહેરાત, 10 રાજ્યોની 37 બેઠક માટે 16 માર્ચે થશે મતદાન
નવી દિલ્હી, 18 ફેબ્રુઆરી, 2026 – Rajya Sabha elections announced ભારતના ચૂંટણી પંચે 10 રાજ્યોની ખાલી થઈ રહેલી 37 રાજ્યસભા બેઠકો માટે દ્વિવાર્ષિક રાજ્યસભા ચૂંટણીની જાહેરાત કરી છે. મતદાનની તારીખ 16 માર્ચ 2026 છે અને મતગણતરી એ દિવસે જ કરવામાં આવશે.
આગામી એપ્રિલ-2026માં મહારાષ્ટ્ર, ઓડિશા, તેલંગાણા, તમિલનાડુ, છત્તીસગઢ, પશ્ચિમ બંગાળ, આસામ, હરિયાણા, હિમાચલ પ્રદેશ અને બિહારની ખાલી થઈ રહેલી રાજ્યસભા બેઠકો પર ચૂંટણી યોજવામાં આવશે.
આ પણ વાંચોઃ AI ઈમ્પેક્ટ સમિટનો આજે ત્રીજો દિવસ, મહત્ત્વના મુદ્દાઓ પર થશે ચર્ચા-વિચારણા
ચૂંટણી પંચના જણાવ્યા અનુસાર, આ બેઠકો એપ્રિલ મહિનામાં અલગ-અલગ તારીખોએ ખાલી થઈ રહી છે. રાજ્યસભાનો કાર્યકાળ 6 વર્ષનો હોય છે, પરંતુ દર બે વર્ષે એક તૃતીયાંશ બેઠકો માટે દ્વિવાર્ષિક ચૂંટણી યોજવામાં આવે છે. સૌથી મોટી વાત એ છે કે લોકસભાની જેમ રાજ્યસભા ક્યારેય ભંગ થતી નથી, તેથી તેને કાયમી ગૃહ કહેવામાં આવે છે.
ચૂંટણીનો કાર્યક્રમ
જાહેરનામું બહાર પાડવાની તારીખ: 18 ફેબ્રુઆરી 2026
ઉમેદવારી પત્ર ભરવાની છેલ્લી તારીખ: 25 ફેબ્રુઆરી 2026
મતદાન અને મતગણતરી: 16 માર્ચ 2026
આ બેઠકો એપ્રિલ 2026 માં સભ્યોનો કાર્યકાળ પૂર્ણ થવાને કારણે ખાલી પડી રહી છે. રાજ્યસભાના નિયમ મુજબ, દર 2 વર્ષે 1/3 સભ્યો નિવૃત્ત થાય છે અને તેટલી જ બેઠકો પર નવેસરથી ચૂંટણી યોજાય છે.
આ ચૂંટણી પ્રક્રિયા અંતર્ગત મહારાષ્ટ્રની 6, તમિલનાડુની 6 અને બિહારની 6 બેઠકો પર મતદાન થશે. આ ઉપરાંત પશ્ચિમ બંગાળની 5, આસામની 3, ઓડિશાની 3 અને તેલંગાણાની 3 બેઠકો માટે ઉમેદવારો પસંદ કરવામાં આવશે. છત્તીસગઢ અને હરિયાણામાં 2-2 બેઠકો જ્યારે હિમાચલ પ્રદેશમાં 1 બેઠક પર ચૂંટણી યોજાશે.
