RBI: નાણાકીય વર્ષ FY27 માટે GDP ગ્રોથનું અનુમાન વધારીને 6.7 ટકા કરાયું

નવી દિલ્હી, 5 ઓગસ્ટ 2026: વૈશ્વિક સ્તરે ચાલી રહેલી આર્થિક અનિશ્ચિતતાઓ અને ભૌગોલિક તણાવ વચ્ચે દેશ માટે સારા સમાચાર સામે આવ્યા છે. રિઝર્વ બેંક ઓફ ઈન્ડિયા (RBI) ની મોનેટરી પોલિસી કમિટી (MPC) ની બેઠક બાદ ગવર્નર સંજય મલ્હોત્રાએ નાણાકીય વર્ષ FY27 માટે દેશના આર્થિક વિકાસ દરનું અનુમાન સુધારીને 6.7% જાહેર કર્યું છે, જે અગાઉની બેઠકના 6.6% ના અનુમાન કરતાં 10 બેસિસ પોઈન્ટ (bps) વધુ છે. RBI ગવર્નરે સ્પષ્ટ કર્યું કે ભારત વર્તમાન સમયમાં વૈશ્વિક સ્તરે સૌથી ઝડપથી વિકસતી અર્થવ્યવસ્થા બની રહી છે, જે ઘરેલુ બજારની મજબૂતાઈ દર્શાવે છે.

• ત્રિમાસિક (Quarter-wise) GDP ગ્રોથના અંદાજો

ગવર્નર સંજય મલ્હોત્રા દ્વારા આગામી ક્વાર્ટર માટે વિકાસદરના આંકડાઓ નીચે મુજબ જાહેર કરવામાં આવ્યા છે:

પ્રથમ ક્વાર્ટર (Q1 FY27): 7.0%

બીજો ક્વાર્ટર (Q2 FY27): 6.4%

ત્રીજો ક્વાર્ટર (Q3 FY27): 6.5%

ચોથો ક્વાર્ટર (Q4 FY27): 6.8%

• વિકાસ અને ફુગાવા અંગે મહત્વના મુદ્દાઓ

પશ્ચિમ એશિયાની સ્થિતિ અને ઊર્જા બજાર: જૂન 2026 પછી પશ્ચિમ એશિયાના સંઘર્ષમાંથી સપ્લાય-સાઇડનું દબાણ થોડું ઓછું થયું હતું, પરંતુ જુલાઈના પ્રથમ સપ્તાહથી સંઘર્ષ ફરી વકરતા ઊર્જાના ભાવમાં અસ્થિરતા અને સપ્લાય ચેઈનમાં નવી અનિશ્ચિતતાઓ ઊભી થઈ છે.

ઘરેલુ અર્થવ્યવસ્થાની મજબૂતાઈ: વૈશ્વિક પડકારો છતાં Q1 ના હાઈ-ફ્રિક્વન્સી ઈન્ડિકેટર્સ દર્શાવે છે કે ઘરેલુ આર્થિક પ્રવૃત્તિઓ અત્યંત સ્થિતિસ્થાપક છે. મેન્યુફેક્ચરિંગ સેક્ટરમાં પ્રારંભિક કોર્પોરેટ પરિણામો પણ ઉત્સાહજનક રહ્યા છે. મજબૂત ઘરેલુ માંગ, સેવા ક્ષેત્રનો વિસ્તાર અને મજબૂત નિકાસ અર્થતંત્રને ટેકો આપી રહ્યા છે.

મોંઘવારીનું ચિત્ર: ખાદ્ય અને ઇંધણના પુરવઠા પરના દબાણને કારણે હેડલાઇન ઇન્ફ્લેશન વધી શકે છે. જો કે, કિંમતી ધાતુઓ સિવાયનું કોર ઇન્ફ્લેશન હજુ પણ નિયંત્રણમાં છે અને Q3 માં ટોચ પર પહોંચ્યા બાદ તેમાં ઘટાડો થવાની અપેક્ષા છે.

આગામી જોખમો: દક્ષિણ-પશ્ચિમ ચોમાસુ, અલ નિવો, વૈશ્વિક વેપાર નીતિઓ અને ભૌગોલિક પરિસ્થિતિઓને કારણે આર્થિક ચિત્ર હજુ પણ સાવચેતી માંગી લે તેવું છે. ગવર્નરે જણાવ્યું હતું કે કોઈપણ મોટા નીતિગત નિર્ણય લેતા પહેલા ફુગાવા અને તેની દિશા અંગે વધુ સ્પષ્ટતાની રાહ જોવામાં આવશે.