આર્થિક સંકટનો સામનો કરી રહેલા પાકિસ્તાનના લોકોને મળી મોટી રાહત,પેટ્રોલ-ડીઝલ થયું સસ્તુ
દિલ્હી : આર્થિક અને રાજકીય સંકટનો સામનો કરી રહેલા પાકિસ્તાનના લોકોને મોટી રાહત મળી છે. પાકિસ્તાનની જનતાને મોંઘવારીના મોરચે રાહત મળી છે. સરકારે પેટ્રોલના ભાવમાં પ્રતિ લીટર (પાકિસ્તાન પેટ્રોલ પ્રાઈઝ) 12 રૂપિયાનો મોટો ઘટાડો કર્યો છે. આ ઉપરાંત ડીઝલ પણ સસ્તું થયું છે. પાકિસ્તાનના નાણા મંત્રી ઈશાક ડારે સોમવારે જાહેરાત કરી હતી કે આગામી 15 દિવસ સુધી પેટ્રોલના ભાવમાં 12 રૂપિયા અને ડીઝલના ભાવમાં 30 રૂપિયા પ્રતિ લીટરનો ઘટાડો કરવામાં આવશે.
સોમવારે તેમના ટેલિવિઝન સંબોધનમાં, તેમણે કહ્યું કે વડા પ્રધાન શાહબાઝ શરીફ અને તેમની સરકારે આંતરરાષ્ટ્રીય બજારમાં કિંમતોના આધારે જનતાને મહત્તમ રાહત આપવાનો પ્રયાસ કર્યો છે. ડારે કહ્યું કે આજે રાત્રે 12 વાગ્યા પછી પેટ્રોલની કિંમતમાં આગામી 15 દિવસ માટે 12 રૂપિયાનો ઘટાડો કરવામાં આવી રહ્યો છે, જેના કારણે હવે પેટ્રોલની નવી કિંમત 270 રૂપિયા પ્રતિ લીટર થઈ જશે.
નાણામંત્રીએ કહ્યું કે 30 રૂપિયાના ઘટાડા બાદ હવે ડીઝલની કિંમત 258 રૂપિયા થઈ જશે. આ ઉપરાંત કેરોસીન તેલના ભાવમાં પણ 12 રૂપિયાનો ઘટાડો કરવામાં આવ્યો છે. આ સાથે કેરોસીન તેલની નવી કિંમત 164.07 રૂપિયા અને લાઇટ ડીઝલ તેલની કિંમત 12 રૂપિયા ઘટીને 152.68 રૂપિયા પ્રતિ લીટર થશે. ગયા મહિને, પાકિસ્તાનનું કુલ તેલ વેચાણ વાર્ષિક ધોરણે 47 ટકા ઘટીને 1.171 મિલિયન ટન થયું હતું, જ્યારે નાણાકીય વર્ષ 2023ના જુલાઈ-એપ્રિલના સમયગાળા માટે કુલ વેચાણ 24 ટકા ઘટીને 13.970 મિલિયન ટન થયું હતું.
પાકિસ્તાન સરકારે છેલ્લા કેટલાક મહિનામાં સતત ઈંધણના ભાવમાં વધારો કર્યો હતો. આર્થિક સંકટનો સામનો કરી રહેલા પાકિસ્તાનના વિદેશી મુદ્રા ભંડારમાં મોટો ઘટાડો થયો છે. જેના કારણે તે તમામ જરૂરી વસ્તુઓની આયાત કરી શકતી નથી. પાકિસ્તાનમાં લોટ, ચોખા અને ડુંગળી જેવી રોજબરોજની વસ્તુઓના ભાવ આસમાને છે.
