મોસ્કો, 24 ઓગસ્ટ 2026: વિદેશ મંત્રી એસ. જયશંકરે સોમવારે મોસ્કો ખાતે રશિયાના રાષ્ટ્રપતિ વ્લાદિમીર પુતિન સાથે મહત્ત્વપૂર્ણ મુલાકાત કરી હતી. આ બેઠક દરમિયાન વિદેશ મંત્રીએ વ્લાદિમીર પુતિનને વડાપ્રધાન નરેન્દ્ર મોદી તરફથી એક વિશેષ સંદેશ સુપરત કર્યો હતો. જયશંકરે વાતચીતની શરૂઆત કરતા જણાવ્યું હતું કે, “હું વડાપ્રધાન નરેન્દ્ર મોદીની શુભેચ્છાઓ પાઠવીને મારી વાત શરૂ કરવા માંગું છું. તેમણે તમને આપવા માટે મને એક વ્યક્તિગત સંદેશ આપ્યો છે, જે હું આપને સોંપવા માંગુ છું.”
વિદેશ મંત્રીએ જણાવ્યું કે, બંને દેશો વચ્ચે આંતર-સરકારી આયોગની બેઠક સફળ રહી છે અને ભારત તથા રશિયા વચ્ચેનો આર્થિક સહયોગ ખૂબ જ ઝડપથી આગળ વધી રહ્યો છે. તેમણે ઉમેર્યું હતું કે વેપાર, ઉર્જા, ખાતર, પરમાણુ અને અન્ય ક્ષેત્રોમાં પણ આપણી ભાગીદારી સતત મજબૂત થઈ રહી છે. આગામી ઉચ્ચ સ્તરીય મુલાકાતો વિશે વાત કરતા જયશંકરે જણાવ્યું કે વડાપ્રધાન મોદી એસસીઓ શિખર સંમેલનમાં પુતિનને મળવા અને ત્યારબાદ બ્રિક્સ શિખર સંમેલન માટે ભારતમાં તેમનું સ્વાગત કરવા ઉત્સુક છે. ત્યારબાદ અનુકૂળ સમયે વાર્ષિક શિખર સંમેલનનું આયોજન પણ કરવામાં આવશે.
રશિયાના પ્રથમ ઉપ પ્રધાનમંત્રી સાથે બેઠક
રશિયાના બે દિવસીય સત્તાવાર પ્રવાસે પહોંચેલા વિદેશ મંત્રી એસ. જયશંકરે મોસ્કોમાં ભારત-રશિયા વેપાર, આર્થિક, વૈજ્ઞાનિક, તકનીકી અને સાંસ્કૃતિક સહયોગ પરના આંતર-સરકારી આયોગ (IRIGC-TEC) ના 27 મા સત્રની સહ-અધ્યક્ષતા કરી હતી. તેમણે રશિયાના પ્રથમ ઉપ પ્રધાનમંત્રી ડેનિસ મંટુરોવ સાથે દ્વિપક્ષીય વ્યાપારિક અને આર્થિક સહયોગને વધુ વિસ્તૃત કરવા અંગે વિસ્તૃત ચર્ચા કરી હતી. જયશંકરે જણાવ્યું હતું કે જટિલ આંતરરાષ્ટ્રીય પરિસ્થિતિઓ વચ્ચે પણ ભારત-રશિયાની ભાગીદારીએ સતત મજબૂતાઈ અને પરસ્પર વિશ્વાસનું ઉત્તમ ઉદાહરણ પૂરું પાડ્યું છે.
