નવી દિલ્હી, 25 સપ્ટેમ્બર 2026: જાપાનના નાગોયામાં યોજાયેલી એશિયન ગેમ્સમાં આજે ભારતના કમલજીત અને સુરુચિ સિંહે મિક્સ્ડ ટીમ 10 મીટર એર પિસ્તોલ સ્પર્ધામાં સુવર્ણ ચંદ્રક જીત્યો. ભારતીય જોડીએ ફાઇનલમાં 484.6 પોઈન્ટ્સ મેળવ્યા અને દક્ષિણ કોરિયાની સુ-હ્યોન હોંગ અને ગા-ઉન ચુની જોડી કરતાં 6.6 પોઈન્ટ્સની સરસાઈ સાથે વિજય મેળવ્યો. દક્ષિણ કોરિયાએ રજત ચંદ્રક જીત્યો, જ્યારે ઈરાને કાંસ્ય ચંદ્રક હાંસલ કર્યો.
કમલજીત અને સુરુચિએ 29 ‘ઇનર-10’ (inner-10s) સહિત 587ના સ્કોર સાથે ક્વોલિફિકેશન રાઉન્ડમાં પ્રથમ સ્થાન મેળવ્યું.
દરમિયાન, પુરુષોની 50 મીટર રાઈફલ થ્રી-પોઝિશન ટીમ સ્પર્ધામાં રુદ્રાંક્ષ પાટિલ, ઐશ્વર્ય પ્રતાપ સિંહ તોમર અને નીરજ કુમારની બનેલી ભારતીય ટીમે સિલ્વર મેડલ જીત્યો. ભારતે 94 ‘X’ સાથે 1762 પોઈન્ટ્સ મેળવ્યા હતા. ચીને 95 ‘X’ અને 1766 પોઈન્ટ્સ સાથે ગોલ્ડ મેડલ જીત્યો, જ્યારે દક્ષિણ કોરિયાએ બ્રોન્ઝ મેડલ મેળવ્યો.
ભારત હવે 19 મેડલ સાથે મેડલ ટેલીમાં 12મા સ્થાને છે. તેમાં 2 ગોલ્ડ, 8 સિલ્વર અને 9 બ્રોન્ઝ મેડલનો સમાવેશ થાય છે.
ભારતની પુરુષ કબડ્ડી ટીમે થાઈલેન્ડને 66-28થી હરાવીને એશિયન ગેમ્સની ફાઇનલમાં સ્થાન મેળવ્યું છે.
આ અગાઉ, ભારતીય બોક્સર સચિન સિવાચે જોર્ડનના મોહમ્મદ અદનાન અબુને એક સંઘર્ષપૂર્ણ મુકાબલામાં હરાવીને પુરુષોની 60 કિગ્રા વર્ગની ક્વાર્ટર-ફાઇનલમાં સ્થાન મેળવ્યું હતું.
રાષ્ટ્રપતિ દ્રૌપદી મુર્મુએ એશિયન ગેમ્સમાં 10 મીટર એર પિસ્તોલ મિક્સ્ડ ટીમ ઈવેન્ટમાં સુવર્ણ ચંદ્રક જીતવા બદલ ભારતીય શૂટર્સ કમલજીત અને સુરુચિ ઈન્દર સિંહને અભિનંદન પાઠવ્યા છે. સોશિયલ મીડિયા પોસ્ટમાં રાષ્ટ્રપતિએ જણાવ્યું હતું કે બંને ખેલાડીઓએ ઉત્કૃષ્ટ નિશાનબાજી અને અદભૂત તાલમેલનું પ્રદર્શન કર્યું હતું.
યુવા બાબતો અને રમતગમત મંત્રી ડૉ. મનસુખ માંડવિયાએ પણ બંને શૂટર્સને સુવર્ણ ચંદ્રક જીતવા બદલ અભિનંદન પાઠવ્યા છે.
વધુ વાંચો: UNGAના અવસરે જયશંકરે એસ્ટોનિયા સહિત પાંચ દેશોના વિદેશ મંત્રીઓ સાથે મુલાકાત કરી
