નવી દિલ્હી, 23 ઓક્ટોબર 2026: એર ક્વોલિટી મોનિટરિંગ પ્લેટફોર્મના અહેવાલ મુજબ, શુક્રવારે પાકિસ્તાનનું લાહોર શહેર દુનિયાનું સૌથી વધુ પ્રદૂષિત શહેર બની ગયું છે. અહીં હવાની ગુણવત્તા અત્યંત ખતરનાક સ્તરે પહોંચી ગઈ છે અને એર ક્વોલિટી ઇન્ડેક્સ (એક્યુઆઈ) 410 ના સ્તરે સ્પર્શી ગયો છે. સ્વિસ મોનિટરિંગ પ્લેટફોર્મ ‘આઈક્યુએર’ના ધોરણો મુજબ 300 થી ઉપરની રીડિંગને ‘ખતરનાક’ શ્રેણીમાં ગણવામાં આવે છે.
એક્યુઆઈએ વાયુ પ્રદૂષણને માપવાનું એક મહત્વપૂર્ણ માધ્યમ છે. તેમાં જેટલો વધારે આંકડો હોય, હવાની ગુણવત્તા એટલી જ કથળેલી અને સ્વાસ્થ્ય માટે જોખમી સાબિત થાય છે. રિપોર્ટ અનુસાર, લાહોરમાં પીએમ2.5 પ્રદૂષકોની માત્રા વિશ્વ આરોગ્ય સંસ્થાના વાર્ષિક માર્ગદર્શિકામાં નક્કી કરેલી મર્યાદા કરતાં 45.2 ગણી વધારે હતી. પીએમ2.5 એ હવામાં રહેલા અતિ સૂક્ષ્મ કણો છે, જે ફેફસાંમાં ઊંડે સુધી ઉતરીને રક્તપ્રવાહમાં પ્રવેશી શકે છે અને લાંબા ગાળે ગંભીર સ્વાસ્થ્ય સમસ્યાઓ સર્જી શકે છે.
આ વૈશ્વિક પ્રદૂષણ યાદીના ટોપ-10 શહેરોમાં ભારતના ત્રણ મહત્ત્વપૂર્ણ શહેરો પણ સ્થાન પામ્યા છે. આ યાદીમાં પશ્ચિમ બંગાળની રાજધાની કોલકાતા ચોથા ક્રમે, દેશની રાજધાની નવી દિલ્હી પાંચમા ક્રમે અને દેશની આર્થિક રાજધાની મુંબઈ છઠ્ઠા ક્રમે છે.
-
દર વર્ષે સર્જાય છે સ્મોગની ગંભીર સમસ્યા
પ્રાંતીય સરકારના જણાવ્યા અનુસાર, દર વર્ષે ખાસ કરીને ઓક્ટોબરથી ફેબ્રુઆરી વચ્ચે લાહોર અને પાકિસ્તાનના પંજાબ પ્રાંતના અન્ય વિસ્તારોમાં સ્મોગની સમસ્યા વિકરાળ સ્વરૂપ ધારણ કરે છે. વધતું પ્રદૂષણ અહીંના જાહેર સ્વાસ્થ્ય અને પર્યાવરણ માટે મોટો પડકાર બની ગયું છે. આરોગ્ય નિષ્ણાતોએ નાગરિકોને ગંભીર સ્મોગ દરમિયાન ખાસ સાવચેતી રાખવાની અપીલ કરી છે. એક્યુએર દ્વારા નાગરિકોને બહાર કસરત કરવાનું ટાળવા, પ્રદૂષિત હવાને ઘરમાં પ્રવેશતી અટકાવવા માટે બારીઓ બંધ રાખવા, બહાર નીકળતી વખતે પ્રોટેક્ટિવ માસ્ક પહેરવા અને ઘરમાં એર પ્યુરિફાયરનો ઉપયોગ કરવાની સલાહ આપવામાં આવી છે. લાહોરમાં વારંવાર સર્જાતી આ ખતરનાક સ્થિતિ દર્શાવે છે કે પર્યાવરણીય પ્રદૂષણને નિયંત્રિત કરવા માટે વધુ નક્કર પગલાં ભરવા અનિવાર્ય છે.
