અમદાવાદઃ શહેરના રિલીફ રોડ વિસ્તારમાં આવેલા એક કોમ્પલેક્ષમાં અચાનક આગ લાગતા નાસભાગ મચી ગઈ હતી. આ બનાવની જાણ થતા ફાયરબ્રિગેડની ટીમ તાત્કાલિક સ્થળ પર દોડી ગઈ હતી. સદનસીબે આગની આ ઘટનામાં જોઈ જાનહાની નહીં થઈ હોવાનું જાણવા મળે છે. આગની લપેટમાં છ જેટલી દુકાનો આવી હોવાનું જાણવા મળે છે. આગની આ ઘટના શોર્ટસરકીટના કારણે લાગી હોવાનું જાણવા મળે છે.
પ્રાપ્ત માહિતી અનુસાર શહેરના રિલીફ રોડ વિસ્તારમાં એક કોમ્પલેક્સમાં આજે આગની ઘટના બની હતી. ગણતરિની મિનિટોમાં જ આગે વિકરાટ સ્વરૂપ ધારણ કરી લીધું હતું અને આગની લપેટમાં છ જેટલી દુકાનો આવી ગઈ હતી. દુકાન પર લાગેલા બેનરોના કારણે પણ આગ વધુ વિકરાળ બની હતી. આગ લાગતા આસપાસના રહિશોમાં ભયનો માહોલ ફેલાયો હતો. આ બનાવની જાણ થતા જ ફાયરબ્રિગેડની છ જેટલી ગાડીઓ સ્થળ પર દોડી ગઈ હતી. ફાયરબ્રિગેડના અધિકારીઓ પણ સ્થળ પર દોડી ગયા હતા. ફાયરબ્રિગેડના જવાનોએ પાણીનો મારો ચલાવીને ભારે જહેમત બાદ આગ ઉપર કાબુ મેળવ્યો હતો. સદનસીબે આગની આ ઘટનામાં કોઈ જાનહાની નહીં થઈ હોવાનું જાણવા મળે છે. આગ શોર્ટ સરકીટના કારણે લાગી હોવાનું મનાઈ રહ્યું છે. જો કે, આગનું ચોક્કસ કારણ જાણવા માટે ફાયરબ્રિગેડે તપાસ શરૂ કરી હતી.
