અમદાવાદ, 14 ઓગસ્ટ 2026 – એર માર્શલ પી.વી. શિવાનંદ દ્વારા ઐતિહાસિક ‘સમુદ્ર પ્રદક્ષિણા‘ અભિયાનની મહિલા અધિકારીઓનું સન્માન કરવામાં આવ્યું હતું. SWACના હેડક્વાર્ટર ખાતે 14 ઓગસ્ટ 2026ના રોજ યોજવામાં આવેલા એક સમારંભ દરમિયાન, એર માર્શલ પી.વી. શિવાનંદ, AVSM,VM, એર ઓફિસર કમાન્ડિંગ-ઇન-ચીફ, દક્ષિણ પશ્ચિમી એર કમાન્ડ (SWAC) દ્વારા ભારતીય સેના, ભારતીય નૌકાદળ અને ભારતીય વાયુસેનાનાં નવ મહિલા અધિકારીઓનું સન્માન કરવામાં આવ્યું હતું.
આ મહિલા અધિકારીઓએ ભારતીય સેના સેઇલિંગ વેસલ (IASV) ત્રિવેણી પર સવાર થઈને પ્રથમ વખત યોજાયેલા ‘સમુદ્ર પ્રદક્ષિણા’ નામના ત્રિ-સેવા તમામ મહિલા પરિક્રમા સેઇલિંગ અભિયાનને સફળતાપૂર્વક પૂરું કર્યું છે. આ સન્માન સમારંભમાં ભારતીય સેના, ભારતીય નૌકાદળ, ભારતીય તટરક્ષક, કેન્દ્રીય રિઝર્વ પોલીસ દળ (CRPF), સીમા સુરક્ષા દળ (BSF), નાગરિક વહીવટીતંત્રના વરિષ્ઠ અધિકારીઓ તેમજ વિવિધ શાળાઓનાં બાળકો ઉપસ્થિત રહ્યા હતા.
આ નવ મહિલા અધિકારીઓએ 314 દિવસના આ અભિયાનમાં ચાર મહાસાગરોમાં લગભગ 25,500 નોટિકલ માઇલનો પ્રવાસ ખેડ્યો હતો, જેમાં ક્રૂને શારીરિક અને માનસિક પડકારોનો સામનો કરવો પડ્યો હતો. સફળતાપૂર્વક પૂરી કરેલી આ સફર તેમની હિંમત, મક્કમતા, ટીમવર્ક અને મિશન પ્રત્યેની અતૂટ પ્રતિબદ્ધતા દર્શાવે છે.
ત્રિ-સેવામાં પારસ્પરિક તાલમેલનું તેજસ્વી ઉદાહરણ
અધિકારીઓ સાથે વાતચીત કરતાં એર માર્શલ પી.વી. શિવાનંદ, AVSM, VM એ તેમની સિદ્ધિની પ્રશંસા કરી હતી અને આ અભિયાનને નારી શક્તિ અને ત્રિ-સેવામાં પારસ્પરિક તાલમેલનું તેજસ્વી ઉદાહરણ ગણાવ્યું હતું. મહિલા અધિકારીઓને અભિયાન દરમિયાન તેમની સમક્ષ આવેલા પડકારો વખતે જે પ્રકારે અસાધારણ દૃઢ નિશ્ચય, નેતૃત્વ અને માનસિક મક્કમતા બતાવી તે બદલ તેમણે ટીમની પ્રશંસા કરી હતી અને ભારપૂર્વક કહ્યું હતું કે જો દૃઢ નિશ્ચય અને સામૂહિક પ્રયાસ સાથે આગળ વધવામાં આવે તો કોઈપણ પ્રયાસમાં સફળતા પ્રાપ્ત થાય છે.
અધિકારીઓએ તેમના આ સાહસ સંદર્ભે પોતાના અનુભવો જણાવ્યા હતા જેમાં તેમણે કેવા પડકારોનો સામનો કર્યો અને કેવી રીતે ટીમવર્ક, નેતૃત્વ તેમજ દૃઢતામાં વિવિધ બોધપાઠ શીખ્યા તેના પર પ્રકાશ પાડ્યો હતો. તેમનું આ સાહસ સશસ્ત્ર દળોમાં પડકારજનક ઓપરેશનલ અને અભિયાનની ભૂમિકાઓમાં મહિલાઓની વધતી સહભાગીતાનું ઉદાહરણ આપે છે.
એર ઓફિસર કમાન્ડિંગ-ઇન-ચીફે અધિકારીઓને તેમની ઉત્કૃષ્ટ સિદ્ધિ બદલ અભિનંદન પાઠવ્યા હતા અને કહ્યું હતું કે તેમની સિદ્ધિ સમગ્ર દેશની યુવતીઓને પડકારજનક લક્ષ્યો પ્રાપ્ત કરવા અને પરંપરાગત અવરોધોને તોડવા માટે પ્રેરણા આપશે.
