જમ્મુ-કાશ્મીરમાં ગુમ થયેલા બંને એસપીઓના મૃતદેહ મળ્યા, સર્વિસ હથિયાર પણ ગુમ

જમ્મુ, 12 નવેમ્બર 2026: જમ્મુ-કાશ્મીરના કિશ્તવાડ જિલ્લામાંથી ગુમ થયેલા જમ્મુ-કાશ્મીર પોલીસના બે સ્પેશિયલ પોલીસ ઓફિસર (એસપીઓ)ના મૃતદેહ મળી આવતાં સમગ્ર વિસ્તારમાં ખળભળાટ મચી ગયો છે. બુધવારે પેટ્રોલિંગ દરમિયાન ગુમ થયેલા બંને જવાનોના મૃતદેહ ગુરુવારે વહેલી સવારે દુર્ગમ દચ્છન વિસ્તારમાંથી મળી આવ્યા હતા. ઘટનાસ્થળેથી બંને જવાનોના સર્વિસ હથિયારો પણ મળી આવ્યા નથી. આથી આતંકવાદીઓની સંડોવણી હોવાની આશંકા વ્યક્ત કરવામાં આવી રહી છે. બંને પોલીસ કર્મચારીઓની ગોળી મારીને હત્યા કરવામાં આવી હતી.

મૃતક જવાનોની ઓળખ બાબી ચંદ (ઉંમર 57 વર્ષ) અને રશપાલ કુમાર (ઉંમર 45 વર્ષ) તરીકે થઈ છે. બંને કિશ્તવાડ જિલ્લાના દચ્છન વિસ્તારમાં આવેલા કિયાર ગામ ખાતે સ્થાનિક પોલીસના સ્પેશિયલ ઓપરેશન ગ્રુપ (એસઓજી)માં ફરજ બજાવતા હતા. પ્રાપ્ત વિગતો અનુસાર, બંને જવાનો બુધવારે કિયાર ગામ સ્થિત પોતાના કેમ્પમાંથી ધરના-મરવાહ વિસ્તારમાં આવેલી સેનાની ચોકી તરફ ફરજ પર જવા નીકળ્યા હતા. જોકે, તેઓ નિર્ધારિત સ્થળે પહોંચ્યા નહોતા. લાંબા સમય સુધી બંનેનો સંપર્ક ન થતાં સુરક્ષા એજન્સીઓમાં ચિંતા ફેલાઈ હતી. શરૂઆતમાં તેમના મોબાઇલ ફોન ચાલુ હતા, પરંતુ થોડા સમય બાદ બંને ફોન બંધ થઈ ગયા હતા.

બંને જવાનો ગુમ થયાની જાણ થતાં જ પોલીસ, સેના અને અન્ય સુરક્ષા દળોએ સંયુક્ત રીતે વ્યાપક શોધખોળ અભિયાન શરૂ કર્યું હતું. દચ્છનના દુર્ગમ પહાડી વિસ્તારો, ગાઢ જંગલો અને આસપાસના સંવેદનશીલ વિસ્તારોમાં સુરક્ષા દળોની વિશેષ ટીમો તહેનાત કરવામાં આવી હતી. શોધખોળ માટે ડ્રોન અને સ્નિફર ડોગ્સની પણ મદદ લેવામાં આવી હતી. ગુરુવારે વહેલી સવારે શોધખોળ દરમિયાન બંને જવાનોના મૃતદેહ મળી આવ્યા હતા. પ્રાથમિક વિગતો અનુસાર, બંનેના શરીર પર ગોળી વાગ્યાના નિશાન મળી આવ્યા છે. સૌથી ચિંતાજનક બાબત એ છે કે બંને જવાનો પોતાની સાથે લઈ ગયેલા સર્વિસ હથિયારો પણ ઘટનાસ્થળેથી ગાયબ છે.

• સુરક્ષામાં કરાયો વધારો

હથિયારો ગાયબ હોવાના કારણે સુરક્ષા એજન્સીઓ આતંકવાદી હુમલાની શક્યતાને પણ ધ્યાનમાં રાખીને તપાસ કરી રહી છે. જોકે, આ હુમલા પાછળ કોણ જવાબદાર છે અને બંને જવાનોની હત્યા કયા સંજોગોમાં કરવામાં આવી તે અંગે સત્તાવાર તપાસ બાદ જ સ્પષ્ટતા થઈ શકશે. ઘટનાને પગલે સમગ્ર વિસ્તારમાં સુરક્ષા વ્યવસ્થા વધુ કડક બનાવવામાં આવી છે. સુરક્ષા દળોએ હુમલાખોરોની શોધખોળ તેજ કરી છે અને સંભવિત આતંકવાદી ઠેકાણાંઓને ધ્યાનમાં રાખીને તપાસનો વ્યાપ વધાર્યો છે. કિશ્તવાડનો દચ્છન વિસ્તાર ભૌગોલિક રીતે અત્યંત દુર્ગમ અને ગાઢ જંગલોથી ઘેરાયેલો હોવાથી સુરક્ષા દળો માટે શોધખોળ અભિયાન પડકારજનક બની રહ્યું છે. બે પોલીસ કર્મચારીઓના મૃતદેહ મળી આવવાની આ ઘટનાએ ફરી એકવાર જમ્મુ-કાશ્મીરના પર્વતીય વિસ્તારોમાં સુરક્ષાની સ્થિતિ અંગે ચિંતા ઊભી કરી છે.