સરકારી કર્મચારીઓના DAમાં બે ટકાનો વધારો, કેબિનેટનો નિર્ણય
નવી દિલ્હી, 18 એપ્રિલ, 2026 – સરકારી કર્મચારીઓના DAમાં બે ટકાનો વધારો કરવાનો કેબિનેટ દ્વારા નિર્ણય લેવામાં આવ્યો છે. તે સાથે દેશના 1.19 કરોડ કર્મચારીઓ અને પેન્શનરો જેની 3 મહિનાથી વધુ સમયથી રાહ જોઈ રહ્યા હતા, તે સારા સમાચાર આજે શનિવાર, 18 એપ્રિલના રોજ આવી ગયા છે. કેન્દ્રીય કેબિનેટે કર્મચારીઓ માટે મોંઘવારી ભથ્થા (DA) અને પેન્શનરો માટે મોંઘવારી રાહત (DR) માં 2% ના વધારાને મંજૂરી આપી દીધી છે.
આ નિર્ણય સાથે જ મોંઘવારી ભથ્થું મૂળ પગારના 58% થી વધીને 60% થઈ ગયું છે. કર્મચારીઓ અને પેન્શનરો માટે વધેલું મોંઘવારી ભથ્થું 1 જાન્યુઆરી 2026 થી જ અમલી ગણાશે અને તેમને એપ્રિલ મહિના ઉપરાંત જાન્યુઆરી, ફેબ્રુઆરી અને માર્ચ એમ 3 મહિનાનું એરિયર્સ (બાકી રકમ) પણ મળશે.
આ પણ વાંચોઃ અમૃતા ફડણવીસનો દાવો: એક્સિસ બેંકમાં પણ TCS જેવું જ થયું હતું
દેશના આશરે 49 લાખથી વધુ કેન્દ્રીય કર્મચારીઓ અને 68 લાખથી વધુ પેન્શનરો મોંઘવારી ભથ્થામાં વધારા (DA-DR Hike) ની રાહ જોઈ રહ્યા હતા. નાણાકીય વર્ષ 2025-26 નો આ અંતિમ DA વધારો છે, જેની જાહેરાતમાં વિલંબને કારણે કર્મચારીઓ અને પેન્શનરો મૂંઝવણમાં હતા. કર્મચારીઓ અને પેન્શનરો સાથે જોડાયેલા અનેક સંગઠનો આ વિલંબનો સતત વિરોધ પણ કરી રહ્યા હતા.
કેટલાક સંગઠનોએ આ બાબતે સરકારને પત્ર પણ લખ્યો હતો. તો વળી, ગુરુવારે અનેક વિભાગોના કર્મચારીઓએ લંચ અવરમાં પ્રદર્શન પણ કર્યું હતું. હવે જ્યારે કેન્દ્રીય કેબિનેટે DA માં 2% વધારાની મંજૂરી આપી દીધી છે, ત્યારે કર્મચારીઓ અને પેન્શનરોમાં ખુશીનો માહોલ છે.
આ પણ વાંચોઃ કલ્પક્કમનો ઐતિહાસિક પ્રોટોટાઇપ ફાસ્ટ બ્રિડર રિએક્ટર (PFBR) માં “ક્રિટિકલિટી” શું છે?
કર્મચારી સંગઠનો પોતાની માંગણીઓ પર મજબૂતીથી ઊભા રહ્યા હતા, જેનું આ સકારાત્મક પરિણામ આવ્યું છે. આ વધારાથી કર્મચારીઓના આર્થિક આયોજનમાં નવી ઊર્જા આવશે. જોકે, વિલંબને કારણે જે રીતે વિરોધ પ્રદર્શનો થયા, તેને સંગઠનોએ વહીવટી તંત્રની ગુનાઈત નિષ્કાળજી ગણાવી હતી. આ પ્રક્રિયામાં કોઈપણ પ્રકારના ગેરકાયદે વિલંબ વગર સમયસર નિર્ણયો લેવાય તેવી અપેક્ષા પણ વ્યક્ત કરવામાં આવી છે.
