હનીટ્રેપમાં ફસાયેલા ભારતીય વાયુસેનાના અધિકારીની જાસુસીના આરોપ હેઠળ ધરપકડ
નવી દિલ્હી, 8 ઓગસ્ટ, 2026: હનીટ્રેપમાં ભારતીય વાયુદળ (IAF) ના વિંગ કમાન્ડરની દિલ્હી પોલીસ દ્વારા સંરક્ષણને લગતી સંવેદનશીલ માહિતી લીક કરવાના આરોપમાં ધરપકડ કરવામાં આવી છે. હનીટ્રેપમાં ફસાયેલા આ અધિકારી પર ઘણી ગોપનીય માહિતી લીક કરવાનો આરોપ છે. પોલીસે ઓફિશિયલ સીક્રેટ્સ એક્ટ હેઠળ કેસ નોંધ્યો છે. હાલમાં વાયુસેનાનો વિંગ કમાન્ડર જ્યુડિશિયલ કસ્ટડીમાં છે. દિલ્હી પોલીસના સૂત્રોના જણાવ્યા અનુસાર, આ કેસ એક મોટા જાસૂસી નેટવર્ક તરફ ઈશારો કરે છે જેનો હેતુ સ્ટ્રેટેજિક મિલિટરી ઈન્ટેલિજન્સ એકઠી કરવાનો હતો.
ડિજિટલ માધ્યમો દ્વારા સંવેદનશીલ દસ્તાવેજો મોકલવાનો આરોપ
પોલીસ સૂત્રોએ જણાવ્યું કે આરોપી અધિકારી એક ફિલ્ડ યુનિટમાં તૈનાત હતો. એક મહિલાએ સોશિયલ મીડિયા દ્વારા આરોપીને હનીટ્રેપમાં ફસાવ્યો અને વિડિયો કોલ પર તેની સાથે વાતચીત કરવા લાગી. સૂત્રોના જણાવ્યા મુજબ, મહિલાએ વાયુસેનાના આ અધિકારી પાસે મિલિટરી મૂવમેન્ટ અને ટ્રૂપ ડિપ્લોયમેન્ટ (સૈન્યની અવરજવર અને જવાનોની તૈનાતી) અંગેની માહિતી, તેમજ ફોટો, વિડિયો અને બીજો સંવેદનશીલ ડેટા માંગ્યો હતો. પોલીસ સૂત્રોનું કહેવું છે કે વિંગ કમાન્ડરે ડિજિટલ માધ્યમો દ્વારા મહિલાને સંવેદનશીલ દસ્તાવેજો અને ડેટા મોકલ્યા હતા.
31 મેની રાત્રે થઈ હતી વિંગ કમાન્ડરની ધરપકડ
IAF ની ઈન્ટેલિજન્સ વિંગ દ્વારા દિલ્હી પોલીસને કેસ સંબંધિત ચોક્કસ માહિતી આપ્યા બાદ ઓફિસરની 31 મેની રાત્રે ધરપકડ કરવામાં આવી હતી. તપાસ બાદ 30/07/2026 ના રોજ સક્ષમ કોર્ટમાં ચાર્જશીટ રજૂ કરી દેવામાં આવી છે અને આ કેસ હાલ વિચારાધીન છે.
ભારતીય વાયુસેનાએ ‘ઝીરો ટોલરન્સ’ની નીતિ દોહરાવી
બીજી તરફ ભારતીય વાયુસેનાએ ઓફિશિયલ સીક્રેટ્સ એક્ટ હેઠળ આવા ગુનાઓ માટે પોતાની ‘ઝીરો ટોલરન્સ’ નીતિ દોહરાવી હતી. IAF અધિકારીઓએ જણાવ્યું કે, “ધરપકડ કરાયેલ વિંગ કમાન્ડર સક્રિય સર્વેલન્સ (નિરીક્ષણ) હેઠળ હતો અને તેને યોગ્ય કાયદા અમલીકરણ એજન્સીઓને સોંપી દેવામાં આવ્યો હતો. પ્રોએક્ટિવ પગલાંના કારણે તેને પકડી પાડવામાં આવ્યો. IAF આવી પ્રવૃત્તિઓ માટે ઝીરો ટોલરન્સ ધરાવે છે.”
પાકિસ્તાની ઈન્ટેલિજન્સ ઓપરેટિવ્સના હનીટ્રેપનો ભોગ બન્યો
સૂત્રોના જણાવ્યા અનુસાર, IAF ઓફિસર કથિત રીતે પાકિસ્તાની ઈન્ટેલિજન્સ ઓપરેટિવ્સ દ્વારા રચવામાં આવેલા હનીટ્રેપનો ભોગ બન્યો હતો. તેના પર સહકર્મીના મોબાઈલ ફોનમાં ડેટા ચોરી કરતું સોફ્ટવેર ઈન્સ્ટોલ કરવાનો પણ આરોપ છે, જેથી ઉપકરણ પર નિયંત્રણ મેળવવાનો પ્રયાસ કરી શકાય. સૂત્રોએ જણાવ્યું કે IAF ઈન્ટેલિજન્સ વિંગે દિલ્હી પોલીસ સાથે કેસ સંબંધિત મહત્વના ઈનપુટ્સ શેર કર્યા હતા, જેના પછી અધિકારીની ધરપકડ કરવામાં આવી હતી. આગળની તપાસ ચાલી રહી છે. ઉલ્લેખનીય છે કે પાકિસ્તાની જાસૂસી એજન્સીઓ દ્વારા ભારતીય સેના, વાયુસેના અને નૌસેનાના અધિકારીઓ તથા જવાનોને ફસાવવા માટે હનીટ્રેપના હથિયારનો ખૂબ ઉપયોગ કરવામાં આવી રહ્યો છે, તેથી અત્યંત સતર્ક રહેવાની જરૂર છે.
આ પહેલાં અલવરના એક નિવાસીની પાકિસ્તાનની જાસૂસી એજન્સી ISI માટે જાસૂસી કરવાના આરોપમાં ધરપકડ કરવામાં આવી હતી. રાજસ્થાન પોલીસે જણાવ્યું કે ‘ઓપરેશન સિંદૂર’ પછી રાજ્યમાં એક સર્વેલન્સ ઓપરેશન ચલાવવામાં આવી રહ્યું હતું. અલવરના કેન્ટોનમેન્ટ વિસ્તારમાં સર્વેલન્સ ઓપરેશન દરમિયાન મંગત સિંહની પ્રવૃત્તિઓ શંકાસ્પદ જણાતી હતી. પોલીસે જણાવ્યું કે આરોપીને કથિત રીતે ઈશા શર્મા નામની એક મહિલા પાકિસ્તાની હેન્ડલરે હનીટ્રેપમાં ફસાવ્યો હતો, જેણે સહયોગના બદલામાં તેને પૈસા આપવાની ઓફર કરી હતી. તેમણે જણાવ્યું કે તે છેલ્લા બે વર્ષથી સોશિયલ મીડિયા પ્લેટફોર્મ દ્વારા પાકિસ્તાની હેન્ડલર્સના સંપર્કમાં હતો.
