ગુવાહાટી, 15 સપ્ટેમ્બર 2026: ભારતના પૂર્વોત્તર રાજ્યોમાં લાંબા સમયથી ચાલી રહેલી આંતરિક અશાંતિ અને સરહદી સુરક્ષાના મુદ્દે અત્યંત સકારાત્મક પરિવર્તન જોવા મળ્યું છે. સંરક્ષણ મંત્રાલયના વાર્ષિક અહેવાલ 2025-26 મુજબ, વર્ષ 2025 દરમિયાન પૂર્વોત્તર ક્ષેત્રમાં ઉગ્રવાદી હિંસા સંબંધિત ઘટનાઓમાં 77 ટકાનો જંગી ઘટાડો નોંધાયો છે. ભારતીય સેના, અસમ રાઇફલ્સ અને સ્થાનિક સુરક્ષા એજન્સીઓના સંયુક્ત અભિયાનોના પરિણામે સમગ્ર વિસ્તારમાં સુરક્ષા અને વિકાસ માટે અનુકૂળ વાતાવરણ ઊભું થયું છે.
સંરક્ષણ મંત્રાલયના રિપોર્ટ અનુસાર, સુરક્ષાદળો દ્વારા ચલાવવામાં આવેલા કાઉન્ટર-ઇન્સર્જન્સી અને આતંકવિરોધી ઓપરેશન્સમાં ઉગ્રવાદી સંગઠનોનું કમરતોડ નાકાબંધી કરવામાં આવી છે. વર્ષ 2025 દરમિયાન સમગ્ર ક્ષેત્રમાંથી 33 જેટલા ઉગ્રવાદીઓને ઠાર કરવામાં આવ્યા હતા, જ્યારે 1,066 ઉગ્રવાદીઓની અટકાયત કરવામાં આવી છે અને 117 સભ્યોએ આત્મસમર્પણ કર્યું છે. આ અભિયાનો દરમિયાન સુરક્ષા દળોએ 4,336 જેટલા અત્યાધુનિક શસ્ત્રો અને દારૂગોળો જપ્ત કરીને હિંસક પ્રવૃત્તિઓને મોટો ફટકો આપ્યો છે.
રિપોર્ટમાં મણિપુર રાજ્યની સ્થિતિમાં નોંધપાત્ર સુધારાનો વિશેષ ઉલ્લેખ કરવામાં આવ્યો છે. 13 ફેબ્રુઆરી 2025 ના રોજ રાષ્ટ્રપતિ શાસન લાગુ કરવામાં આવ્યા બાદ રાજ્યમાં સ્થિતિ ઝડપથી સામાન્ય થઈ રહી છે. શાંતિ અને જનજીવન પાટા પર આવવાના પુરાવારૂપે રાજ્યમાં આયોજિત મોટા ઉત્સવો અને કાર્યક્રમો શાંતિપૂર્ણ રીતે સંપન્ન થયા હતા. જેમાં શિરૂઈ લીલી ફેસ્ટિવલ (20-25 મે 2025), ડૂરાન્ડ કપ (30 જુલાઈ-12 ઓગસ્ટ 2025), વડાપ્રધાન નરેન્દ્ર મોદીની સત્તાવાર મુલાકાત (13 સપ્ટેમ્બર 2025) અને સંગાઈ ફેસ્ટિવલ (21-30 નવેમ્બર 2025) નો સમાવેશ થાય છે.
-
ભારત-મ્યાનમાર સરહદ પર કડક મોનિટરિંગ: 12.6 કિમી ફિન્સિંગ પૂર્ણ
આ ઉપરાંત મણિપુરમાં શાંતિ પ્રક્રિયાને આગળ ધપાવવા માટે 4 સપ્ટેમ્બર 2025 ના રોજ યુનાઈટેડ પીપલ્સ ફ્રન્ટ (UPF) અને કુકી નેશનલ ઓર્ગેનાઈઝેશન (KNO) સાથે સસ્પેન્શન ઓફ ઓપરેશન્સ (SoO) કરારનું રિન્યુઅલ કરવામાં આવ્યું હતું. 2 વર્ષ બાદ આ કરારનું નવીનીકરણ થવું એ રાજ્યમાં કાયમી સ્થિરતા લાવવા તરફનું મહત્વનું પગલું માનવામાં આવે છે.
બીજી તરફ, મ્યાનમારની આંતરિક સેના અને વિદ્રોહી જૂથો વચ્ચે ચાલી રહેલા સંઘર્ષને કારણે ભારત-મ્યાનમાર સરહદ પર સુરક્ષા પડકારો હજુ પણ સંવેદનશીલ બનેલા છે. ગેરકાયદેસર ઘૂસણખોરી રોકવા અને અવરજવરને નિયંત્રિત કરવા માટે ફ્રી મુવમેન્ટ રિજીમ હેઠળ 20 બોર્ડર ક્રોસિંગ પોઈન્ટ્સ બનાવવામાં આવ્યા છે. સરહદી સુરક્ષા મજબૂત કરવાના ભાગરૂપે 2025 માં 12,590 મીટર (આશરે 12.6 કિલોમીટર) લાંબી ફિન્સિંગનું નિર્માણ પૂરું કરવામાં આવ્યું છે.
સૈન્ય સ્તરે રાજદ્વારી સંબંધો સુધારવાના પ્રયાસરૂપે મ્યાનમાર સૈન્ય સાથે સતત બેઠકો યોજવામાં આવી રહી છે. આ પ્રયાસોના સકારાત્મક પરિણામ તરીકે 14 ઓક્ટોબર 2025 ના રોજ 25 મ્યાનમાર નાગરિકોને તા મૂ સરહદ મારફતે સુરૂપ પરત મોકલવામાં આવ્યા હતા. સમગ્ર પૂર્વોત્તરમાં ચીન અને મ્યાનમાર સરહદે ઈન્ફ્રાસ્ટ્રક્ચર અને સેનાની લોજિસ્ટિક તૈયારીઓને વધુ વેગ આપવામાં આવી રહ્યો છે.
