નવી દિલ્હી, 29 જુલાઈ 2026: ‘Lakshmi Yojana’ approved દિલ્હી સરકારે ‘દિલ્હી લક્ષ્મી યોજના’ને મંજૂરી આપી છે. આ યોજનાનો ઉદ્દેશ્ય મહિલાઓને આર્થિક રીતે સશક્ત બનાવવાનો અને તેમને સામાજિક સુરક્ષા પૂરી પાડવાનો છે. મુખ્યમંત્રી રેખા ગુપ્તાની અધ્યક્ષતામાં દિલ્હી સચિવાલય ખાતે યોજાયેલી કેબિનેટની બેઠકમાં આ નિર્ણય લેવામાં આવ્યો હતો.
આ યોજના હેઠળ, પાત્ર મહિલાઓને દર મહિને 2,500ની આર્થિક સહાય મળશે. વર્ષ 2026-27ના બજેટમાં આ યોજના માટે 5,110 કરોડની જોગવાઈ કરવામાં આવી છે.
દિલ્હીના મુખ્યમંત્રી રેખા ગુપ્તાએ જાહેરાત કરી કે આ યોજના માટેનું રજીસ્ટ્રેશન પોર્ટલ 1 ઓગસ્ટના રોજ ખુલશે. તેમણે જણાવ્યું હતું કે 21 થી 60 વર્ષની વયની અને વાર્ષિક પારિવારિક આવક 2.5 લાખ સુધીની હોય તેવી મહિલાઓ આ યોજનાનો લાભ મેળવવા માટે પાત્ર રહેશે.
મુખ્યમંત્રીએ જણાવ્યું હતું કે આ યોજનાનો ઉદ્દેશ્ય માત્ર આર્થિક સહાય પૂરી પાડવાનો જ નથી, પરંતુ મહિલાઓમાં શિક્ષણ, સ્વાસ્થ્ય, કૌશલ્ય વિકાસ, બચત અને વ્યાપક સામાજિક ભાગીદારીને પ્રોત્સાહન આપવાનો પણ છે. તેમણે વિશ્વાસ વ્યક્ત કર્યો હતો કે આ પહેલથી 17 લાખથી વધુ મહિલાઓને લાભ થશે અને તેમને સ્વાવલંબી તથા સશક્ત બનાવવામાં મદદ મળશે.
