દિલ્હી : ચીનના રાષ્ટ્રપતિ શી જિનપિંગે ગુરુવારે સાઉદી અરેબિયાના રાજા સલમાન બિન અબ્દુલ અઝીઝ અલ સાઉદ અને ક્રાઉન પ્રિન્સ મોહમ્મદ બિન સલમાન સાથે મુલાકાત કરી હતી.આ દરમિયાન, બંને દેશોના વડાઓએ યુક્રેન પરના યુદ્ધને કારણે રશિયા પર લાદવામાં આવેલા કડક પ્રતિબંધો વચ્ચે ઊર્જાના અવિરત પુરવઠા અને પરસ્પર હિતના અન્ય મહત્વપૂર્ણ મુદ્દાઓ પર ચર્ચા કરી.
2020ની શરૂઆતથી જિનપિંગની આ ત્રીજી વિદેશ યાત્રા છે.આ મુલાકાત એવા સમયે થઈ રહી છે જ્યારે ચીનના રાષ્ટ્રપતિને ઓક્ટોબરમાં દેશના નેતા તરીકેનો રેકોર્ડ ત્રીજો પાંચ વર્ષનો કાર્યકાળ આપવામાં આવ્યો હતો.જિનપિંગ બુધવારે સાઉદી અરેબિયાની ત્રણ દિવસની મુલાકાતે પહોંચ્યા હતા.કોવિડ-19ના કડક પ્રતિબંધોને કારણે સુસ્ત પડી ગયેલી પોતાની અર્થવ્યવસ્થાને બેઇજિંગ પુનઃજીવિત કરવાનો પ્રયાસ કરી રહ્યું છે અને ચીનના ઊર્જા પુરવઠાના સંદર્ભમાં અરબ દેશો ખૂબ જ મહત્વપૂર્ણ છે.
જિનપિંગના આગમન પર સાઉદી અરેબિયાની રાજધાની રિયાધમાં સાઉદી અને ચીનના ધ્વજ લહેરાવામાં આવ્યા હતા.ચીનના રાષ્ટ્રપતિએ એરપોર્ટ પર સાઉદી અધિકારીઓ સાથે હાથ મિલાવ્યા.આ મુલાકાત એવા સમયે થઈ રહી છે જ્યારે યુક્રેન પર રશિયાના આક્રમણ અને મોસ્કો સામે કડક પશ્ચિમી સ્થિતિએ આરબ દેશોને ચીન સાથેના સંબંધો મજબૂત કરવા માટે પ્રેરિત કર્યા છે.
જિનપિંગની આ મુલાકાત એવા સમયે થઈ રહી છે જ્યારે સાઉદી અરેબિયા અને અમેરિકા વચ્ચેના સંબંધો સારા નથી ચાલી રહ્યા.આ મુલાકાત દરમિયાન રાષ્ટ્રપતિ શી જિનપિંગ ચીન-અરબ દેશો સમિટ અને ગલ્ફ કોઓપરેશન કાઉન્સિલમાં હાજરી આપે તેવી શક્યતા છે.આમાં સાઉદી અરેબિયા ઉપરાંત બહેરીન, કુવૈત, ઓમાન, કતાર અને સંયુક્ત આરબ અમીરાતનો સમાવેશ થશે.
