ફિલિપિઈન્સમાં 7.8ની તીવ્રતાનો પ્રચંડ ધરતીકંપ, ભારે નુકસાનઃ જુઓ Video
મનિલા, 8 જૂન 2026: ફિલિપાઈન્સમાં આજે સોમવારે સવારે 7.8ની તીવ્રતાનો પ્રચંડ ધરતીકંપ આવ્યો હતો. દેશના દક્ષિણ ભાગમાં આવેલા આ ભૂકંપના કારણે ગણતરીની સેકન્ડોમાં જ ઇમારતો હલવા લાગી હતી, દિવાલોમાં તિરાડો પડી ગઈ હતી અને કેટલીક જગ્યાએ આખેઆખી બિલ્ડિંગો ધરાશાયી થઈ ગઈ હતી, જેમાં એક શાળા પણ સામેલ છે. ભૂકંપની તબાહીનાં દૃશ્યો અત્યંત ભયાનક હતાં.
એક સ્થાનિક અધિકારીના જણાવ્યા અનુસાર, આ આપત્તિમાં ઓછામાં ઓછા 5 લોકોનાં મૃત્યુ થયાના સમાચાર છે. આ ભૂકંપ એટલો શક્તિશાળી હતો કે આસપાસના દેશોમાં પણ સુનામીનું એલર્ટ જાહેર કરવું પડ્યું હતું અને સમગ્ર વિસ્તારમાં દહેશત ફેલાઈ ગઈ હતી.
ફિલિપાઈન્સમાં શું સ્થિતિ સર્જાઈ?
યુએસ જીઓલોજિકલ સર્વે (USGS) ના જણાવ્યા અનુસાર, સોમવારે ફિલિપાઈન્સના દક્ષિણ ભાગમાં આવેલા મિંડાનાઓ ક્ષેત્રમાં 7.8 ની તીવ્રતાનો ભૂકંપ આવ્યો હતો. આ આંચકા બાદ દેશમાં તથા પડોશી દેશો ઇન્ડોનેશિયા અને જાપાનમાં સુનામીની ચેતવણી જાહેર કરવામાં આવી હતી. સમાચાર સંસ્થા એપી (AP) ના અહેવાલ મુજબ ફિલિપાઈન્સમાં 3 ફૂટ સુધીના સુનામીનાં મોજાં ઉછળ્યા હતા.
આ પણ વાંચોઃ TMC નેતા જહાંગીર ખાન ઉર્ફે પુષ્પા નેપાળ સરહદથી ઝડપાયો
બીજી તરફ, ઇન્ડોનેશિયામાં ઓછામાં ઓછી 9 જગ્યાએ સુનામીનાં નાનાં મોજાં નોંધાયાં હતાં, જેમાં સૌથી ઊંચાં મોજા સાંગિહે ટાપુ પર 0.75 મીટરના નોંધાયા હતા. જો કે, બાદમાં ઇન્ડોનેશિયાએ આ ચેતવણી હટાવી લીધી હતી.
જનરલ સેન્ટોસ શહેરમાંથી સામે આવેલી તસવીરો અને વીડિયોમાં દુકાનો તથા ઇમારતોને ભૂકંપ બાદ પત્તાના મહેલની જેમ ધરાશાયી થતી જોઈ શકાય છે. ખાસ વાત એ હતી કે આ તીવ્ર ભૂકંપ એ જ દિવસે આવ્યો જ્યારે અહીંની સરકારી શાળાઓમાં નવું શૈક્ષણિક વર્ષ શરૂ થઈ રહ્યું હતું. ભૂકંપના કારણે મિંડાનાઓની એક શાળાની ઇમારત પણ તૂટી પડી હતી. રાહતની વાત એ રહી કે ભૂકંપ દરમિયાન વિદ્યાર્થીઓને કોઈ નુકસાન થયું નહોતું, કારણ કે શાળાને પહેલાથી જ ખાલી કરાવી દેવામાં આવી હતી.
જુઓ વીડિયોઃ
સોશિયલ મીડિયા પર આ ઘટનાના બે વીડિયો સામે આવ્યા છે. એક વીડિયોમાં ડરથી ધ્રૂજતા પ્રાઈમરી સ્કૂલના ડઝનબંધ બાળકો દેખાય છે, જેઓ ખુલ્લા મેદાનમાં જમીન પર બેઠા હતા અને તેમની નીચેની ધરતી જોરજોરથી હલી રહી હતી. જ્યારે અન્ય એક વીડિયોમાં જોવા મળ્યું કે દાવાઓ ડેલ સુરની એક હાઈસ્કૂલની છત એ જ સમયે તૂટી પડી જ્યારે બાળકો શાળાના રમતના મેદાનમાં લાઈનમાં ઉભા હતા. સારી વાત એ છે કે આ બંને ઘટનાઓમાં કોઈના ઘાયલ થવાના સમાચાર નથી.
નુકસાનની સૌથી વધુ તસવીરો સરંગાની પ્રાંતમાંથી સામે આવી છે, જ્યાં આશરે 5,80,000 લોકો રહે છે. રોઇટર્સના અહેવાલ મુજબ, ભૂકંપના તરત જ બાદ અહીંના પોલીસ ભવનમાં પણ મોટી તિરાડો પડી ગઈ હતી. આ આંચકો એ સમયે આવ્યો જ્યારે ત્યાં ધ્વજવંદન (ઝંડો ફરકાવવાની પ્રક્રિયા) થઈ રહી હતી.
