ચોમાસામાં ઓઇલી સ્કિન અને ચીકણાશની સમસ્યાથી રાહત મેળવવા અજમાવો આ ઘરેલું નુસખાઓ

ચોમાસાની ઋતુ આપણને ઉનાળાની કાળઝાળ ગરમીથી રાહત ચોક્કસ આપે છે, પરંતુ આ સિઝનમાં વાતાવરણમાં વધતા ભેજ અને ઉમસને કારણે ત્વચા સંબંધિત અનેક સમસ્યાઓ પણ શરૂ થઈ જાય છે. ખાસ કરીને જે લોકોની ત્વચા તૈલી (ઓઇલી સ્કિન) છે, તેમને ચોમાસા દરમિયાન સૌથી વધુ મુશ્કેલીઓનો સામનો કરવો પડે છે. વરસાદના દિવસોમાં ત્વચા પર જામતો પરસેવો અને ધૂળ-માટી જ્યારે કુદરતી તેલ સાથે ભળે છે, ત્યારે ચહેરા પર અતિશય ચીકણાશ અને ભારેપણું અનુભવાય છે. નિષ્ણાતોના જણાવ્યા અનુસાર, ચોમાસામાં વાતાવરણમાં રહેલા અતિશય ઉમસને કારણે ત્વચામાં રહેલી સેબેસિયસ ગ્રંથિઓ વધુ સક્રિય થઈ જાય છે, જેના લીધે સીબમ એટલે કે વધારાના તેલનું પ્રોડક્શન વધી જાય છે. આ સમસ્યાથી બચવા અને ચોમાસામાં પણ ત્વચાને સ્વસ્થ રાખવા માટે કેટલાક સરળ અને કુદરતી ઘરેલું ઉપાયો ખૂબ જ કારગત સાબિત થઈ શકે છે.

ઓઇલી સ્કિનથી છુટકારો મેળવવા માટે મુલતાની માટીનો ઉપયોગ એ સદીઓ જૂનો અને શ્રેષ્ઠ વિકલ્પ માનવામાં આવે છે. મુલતાની માટીમાં ત્વચામાંથી વધારાનું તેલ સોષી લેવાના અદ્ભુત ગુણો રહેલા છે. આ માટે મુલતાની માટીના પાવડરમાં થોડું ગુલાબજળ મિક્સ કરીને પેસ્ટ બનાવી ચહેરા પર લગાવી શકાય છે, જે ત્વચાને તરોતાજા રાખે છે. આ ઉપરાંત, ત્વચાની યોગ્ય સંભાળ માટે ચંદન પાવડરની મદદ પણ લઈ શકાય છે. બે ચમચી ચંદન પાવડરની અંદર બે ચમચી કાચું દૂધ મેળવીને બનાવેલી પેસ્ટને ચહેરા પર લગાવી, દસ મિનિટ બાદ સામાન્ય પાણીથી ધોઈ નાખવાથી ત્વચાની તમામ ચીકણાશ દૂર થાય છે અને ચહેરા પર એક સરસ કુદરતી ગ્લો આવે છે.

• એલોવેરાનો શ્રેષ્ઠ ઉપયોગ

ચોમાસાના દિવસોમાં રસોડામાં સરળતાથી મળી રહેતો બેસન (ચણાનો લોટ)નો નુસખો પણ અત્યંત ફાયદાકારક નીવડે છે, કારણ કે ચણાના લોટમાં તેલને કુદરતી રીતે જ સોષી લેવાનો ગુણ હોય છે. એક વાસણમાં ત્રણ ચમચી ચણાનો લોટ લઈ, તેમાં એક ચપટી હળદર અને ત્રણ ચમચી દહીં મેળવીને પેસ્ટ તૈયાર કરી શકાય છે. આ ફેસપેક ચહેરા પર લગાવવાથી ઓઇલ કંટ્રોલ થવાની સાથે-સાથે ચહેરાના કાળા ડાઘ પણ ઝડપથી ઓછા થાય છે. આ સિવાય, ભારતીય ઘરોમાં ઓલરાઉન્ડર ગણાતા એલોવેરા (કુંવારપાઠું)નો ઉપયોગ પણ શ્રેષ્ઠ પરિણામ આપે છે. સવારે સ્નાન કરવાના 10 મિનિટ પહેલાં ચહેરા પર ફ્રેશ એલોવેરા જેલ લગાવી, તે સુકાઈ ગયા બાદ સામાન્ય પાણીથી સાફ કરી લેવાથી તેના મોઇશ્ચરાઇઝિંગ ગુણો ત્વચાને અંદરથી રિપેર કરે છે અને તેલનું સંતુલન જાળવી રાખે છે.