અભ્યાસ તરંગ શક્તિ 2026: “પાર્ટનરશિપમાં પાવર”

• ભારતીય વાયુસેનાએ જોધપુર ખાતે ઓપરેશનલ ફેઝનો પ્રારંભ કર્યો

નવી દિલ્હી, 27 સપ્ટેમ્બર, 2026: Abhyas Tarang Shakti 2026 ભારતીય વાયુસેના (IAF) એર ફોર્સ સ્ટેશન જોધપુર ખાતે ‘અભ્યાસ તરંગ શક્તિ 2026’ ના ઓપરેશનલ તબક્કાની શરૂઆત કરવા માટે તૈયાર છે. 26 સપ્ટેમ્બરથી 12 ઓક્ટોબર 2026 દરમિયાન યોજાઈ રહેલા આ બહુપક્ષીય હવાઈ અભ્યાસની થીમ “પાર્ટનરશિપમાં પાવર” (ભાગીદારીમાં શક્તિ) રાખવામાં આવી છે, જે સહયોગી વાયુસેનાઓ વચ્ચે એકસાથે કામ કરવા, જ્ઞાન અને કૌશલ્યની આપ-લે કરવા તથા આંતર-કાર્યક્ષમતા (ઈન્ટરઓપરેબિલિટી) કેળવવાની તાકાત પર ભાર મૂકે છે.

આ અભ્યાસમાં સાત મિત્ર દેશો — ઓસ્ટ્રેલિયા, યુનાઇટેડ સ્ટેટ્સ ઓફ અમેરિકા, યુનાઇટેડ આરબ અમીરાત (UAE), ફ્રાન્સ, જર્મની, શ્રીલંકા અને બાંગ્લાદેશ ભાગ લઈ રહ્યા છે. ભાગ લેનારા વિદેશી વિમાનોમાં F-35 લાઈટનિંગ II, રાફેલ, F-16, A400M, MRTT, C-130, C-130J અને KC-30A નો સમાવેશ થાય છે, જે લડાકુ, એરલિફ્ટ અને હવામાં ઈંધણ પૂરવાની વિવિધ ક્ષમતાઓનું પ્રદર્શન કરશે.

વર્ષ 2024 માં યોજાયેલી પ્રથમ સફળ આવૃત્તિ બાદ, અભ્યાસ તરંગ શક્તિ 2026 ભાગ લેનારી વાયુસેનાઓને અદ્યતન સંયુક્ત તાલીમ, ઓપરેશનલ જ્ઞાનની આપ-લે અને વ્યાવસાયિક અનુભવને વધુ મજબૂત બનાવવાની તક પૂરી પાડે છે. ભાગ લેનારી ટુકડીઓ ભારતીય વાયુસેના સાથે મળીને વિવિધ મિશનો દરમિયાન અગ્રણી લડાકુ પ્લેટફોર્મ અને સહાયક ઘટકોનો ઉપયોગ કરશે. આ ઉપરાંત, અન્ય કેટલાક મિત્ર દેશો પણ નિરીક્ષક (ઓબ્ઝર્વર) તરીકે ભાગ લેશે.

આ અભ્યાસ આંતર-કાર્યક્ષમતા, પરસ્પર શીખવાની પ્રક્રિયા, એરોસ્પેસ સુરક્ષા અને ઓપરેશનલ પદ્ધતિઓની ઊંડી સમજ પર ભાર મૂકવાની સાથે એરક્રૂ, મિશન પ્લાનર્સ અને ઓપરેશનલ સપોર્ટ સ્ટાફ વચ્ચે વ્યાવસાયિક સંવાદને સરળ બનાવશે. આ સંવાદ ભાગ લેનાર દળોને એકસાથે કામ કરવાની, અનુભવો શેર કરવાની અને એકબીજાની ક્ષમતાઓ તથા ઓપરેશનલ સિદ્ધાંતોને વધુ સારી રીતે સમજવાની તક પૂરી પાડશે.

તરંગ શક્તિની આ આવૃત્તિ માત્ર વિમાન ઉડાન પૂરતી સીમિત ન રહેતા વધુ વ્યાપક છે, જેમાં અભ્યાસ દરમિયાન વ્યાવસાયિક, સાંસ્કૃતિક અને જનસંપર્ક પ્રવૃત્તિઓનું આયોજન કરવામાં આવ્યું છે. જેમાં વિશેષ સેમિનાર, ભાગ લેનાર વિદેશી ટુકડીઓ માટે ઔદ્યોગિક પ્રવાસ, શેખોં મેરાથોન, ઐતિહાસિક વારસાનો પ્રવાસ (હેરિટેજ ટૂર) અને યોગ સત્રોનો સમાવેશ થાય છે. આ પ્રવૃત્તિઓ વ્યાવસાયિક આપ-લે, ભારતના એરોસ્પેસ અને ઔદ્યોગિક માળખાનો પરિચય, અને ભાગ લેનાર દળો વચ્ચે વધુ ગાઢ સંબંધો અને બંધુત્વ કેળવવાની તકો પૂરી પાડશે.

અભ્યાસ તરંગ શક્તિ 2026 ભારતીય વાયુસેનાને તેની ઓપરેશનલ ક્ષમતાઓ, વ્યાવસાયિક ધોરણો અને સંસ્થાકીય મૂલ્યોનું પ્રદર્શન કરવાની તક આપે છે, સાથે જ ભારતની વધતી જતી સ્વદેશી એરોસ્પેસ અને સંરક્ષણ ક્ષમતાઓને ઉજાગર કરે છે. “પાર્ટનરશિપમાં પાવર” થીમ હેઠળનો આ અભ્યાસ ભાગ લેનારી વાયુસેનાઓ વચ્ચે ટકઉ ભાગીદારીના નિર્માણમાં સહયોગ, આંતર-કાર્યક્ષમતા અને પરસ્પર વિશ્વાસના મહત્વને પુનઃસ્થાપિત કરે છે.

આ અભ્યાસ પ્રાદેશિક શાંતિ, સુરક્ષા અને સ્થિરતાના સમર્થનમાં રચનાત્મક સંરક્ષણ જોડાણ અને મજબૂત લશ્કરી સહયોગ પ્રત્યે ભારતની પ્રતિબદ્ધતાને પુનઃપુષ્ટ કરે છે, જ્યારે સીમાચિહ્નરૂપ ઓપરેશનલ અનુભવો દ્વારા ભાગીદારીને મજબૂત બનાવે છે અને વ્યૂહાત્મક સહયોગને પ્રોત્સાહન આપે છે.