ચમકતી અને સ્વસ્થ ત્વચા માટે ડાયેટમાં કરો આ ફેરફાર, ખરાબ આદતોથી રાખો અંતર

આજના ભાગદોડ ભરેલા યુગમાં મોટાભાગના લોકો ખીલ (પિમ્પલ્સ), ત્વચાનું સુકાઈ જવું અને અન્ય ત્વચા સંબંધી સમસ્યાઓથી પરેશાન રહે છે. ખોટી ખાણીપીણી, ઓછું પાણી પીવું અને આપણી દૈનિક આદતોની સીધી અસર ત્વચાના સ્વાસ્થ્ય પર પડે છે. વધુ પડતા પ્રોસેસ્ડ અને અનહેલ્ધી ફૂડનું સેવન કરવાથી શરીરમાં સોજો (ઇન્ફ્લેમેશન) વધી શકે છે, જેની નકારાત્મક અસર ચહેરા અને ત્વચા પર સ્પષ્ટ દેખાય છે. તેથી, ત્વચાને તંદુરસ્ત રાખવા માટે માત્ર બહારથી ક્રીમ કે લોશન લગાવવું પૂરતું નથી, પરંતુ અંદરથી પોષણ આપવું પણ એટલું જ અનિવાર્ય છે. શરીરને મળતા પોષક તત્વો સીધા ત્વચાની તંદુરસ્તી સાથે જોડાયેલા છે. આહારમાં કેટલીક ખાસ ચીજોનો સમાવેશ કરવાથી ત્વચાને વિટામિન્સ, મિનરલ્સ, હેલ્ધી ફેટ્સ અને એન્ટિઓક્સિડન્ટ્સ ભરપૂર માત્રામાં મળી રહે છે. આવો જાણીએ કે ત્વચાને હેલ્ધી અને ગ્લોઇંગ બનાવવા માટે શું ખાવું જોઈએ, કઈ ચીજોથી નુકસાન થાય છે અને કઈ બાબતોનું ધ્યાન રાખવું જરૂરી છે.

તબીબોના મતે, ત્વચાને સ્વસ્થ રાખવા માટે આહારમાં ટામેટા, નારંગી, કેપ્સિકમ (શિમલા મિર્ચ), બ્રોકોલી, સ્ટ્રોબેરી અને કીવીનો સમાવેશ કરી શકાય છે. આ તમામ ફળો અને શાકભાજીઓમાં વિટામિન ‘સી’ અને ભરપૂર એન્ટિઓક્સિડન્ટ્સ હોય છે. વિટામિન ‘સી’ શરીરમાં ‘કોલેજન’ના નિર્માણમાં મદદ કરે છે, જે ત્વચાને સ્વસ્થ રાખવા માટે ખૂબ જ જરૂરી પ્રોટીન છે. આ ઉપરાંત, બદામ અને સૂર્યમુખીના બીજ વિટામિન ‘ઇ’ ના ઉત્તમ સ્ત્રોત છે, જે ત્વચાને ઓક્સિડેટીવ ડેમેજથી બચાવવામાં મદદરૂપ બને છે. આ સિવાય અખરોટ, ચિયા સીડ્સ અને અળસીમાં ઓમેગા-3 ફેટી એસિડ મળી આવે છે. આ તત્વો ત્વચાના મોઈશ્ચરને જાળવી રાખવામાં અને સોજાને ઓછો કરવામાં મદદ કરે છે. જ્યારે કઠોળ અને આખા અનાજ શરીરને પ્રોટીન, ફાઈબર અને અન્ય જરૂરી પોષક તત્વો પૂરા પાડે છે. આ વિવિધ પ્રકારના ખોરાકને આહારમાં સામેલ કરવાથી ત્વચાને કુદરતી પોષણ મળે છે.

• કયા ખોરાકથી ત્વચાને નુકસાન થઈ શકે છે?

તબીબોના મતે, વધુ પડતા પ્રોસેસ્ડ ફૂડ, રિફાઇન્ડ શુગર અને હાઈ ગ્લાયસેમિક ઇન્ડેક્સ ધરાવતી ચીજવસ્તુઓ ત્વચામાં બળતરા, સોજો અને ખીલની સમસ્યામાં વધારો કરી શકે છે. આટલું જ નહીં, તે વહેલાસર વૃદ્ધત્વના લક્ષણોને પણ પ્રોત્સાહન આપી શકે છે. તેથી ગળી ચીજો, ફાસ્ટ ફૂડ અને અનહેલ્ધી ફેટ્સ ધરાવતા ખોરાકનું સેવન મર્યાદિત માત્રામાં કરવું જ હિતાવહ છે. આલ્કોહોલનું વધુ પડતું સેવન પણ ત્વચાના સ્વાસ્થ્ય માટે હાનિકારક સાબિત થાય છે.

• હેલ્ધી ત્વચા માટે કઈ બાબતોનું ધ્યાન રાખવું?

પૂરતું પાણી પીવો: શરીરમાં પાણીની ઉણપ સર્જાવાથી ત્વચા સૂકી અને નિર્જીવ બની જાય છે, તેથી હાઇડ્રેટ રહેવું ખૂબ જરૂરી છે.
સૂર્યના તાપથી બચો: તડકામાં બહાર નીકળતી વખતે સનસ્ક્રીન લોશનનો ઉપયોગ કરો અને બને ત્યાં સુધી તીવ્ર તાપના સંપર્કમાં આવવાનું ટાળો.
વ્યસનોથી દૂરી: ધૂમ્રપાન અને દારૂના સેવનથી ત્વચાની ચમક છીનવાઈ જાય છે, તેથી તેનાથી દૂર રહેવું.
પૌષ્ટિક આહાર: ડાયેટમાં તાજા ફળો, શાકભાજી, આખા અનાજ, નટ્સ, બીજ અને કઠોળને અચૂક સામેલ કરો.

જો ત્વચા સંબંધિત કોઈ સમસ્યા લાંબા સમય સુધી રહેતી હોય, તો જાતે ઉપચાર કરવાને બદલે કોઈ નિષ્ણાત ડર્મેટોલોજિસ્ટ (ત્વચા રોગ નિષ્ણાત) ની સલાહ અવશ્ય લેવી જોઈએ.