નવી દિલ્હી, 14 સપ્ટેમ્બર 2026: ભારત અને ચીન વચ્ચેના સંબંધોમાં સુધારાના સંકેતો વચ્ચે ઉત્તરીય સરહદેથી એક મોટા અને મહત્વના સમાચાર સામે આવ્યા છે. ભારતીય સંરક્ષણ મંત્રાલયે એક સત્તાવાર નિવેદનમાં જણાવ્યું છે કે ચીને લાઇન ઓફ એક્ચ્યુઅલ કંટ્રોલ (LAC) પર પોતાની પીપલ્સ લિબરેશન આર્મી (PLA)ના સૈનિકોની તૈનાતીમાં નોંધપાત્ર ઘટાડો કર્યો છે. મંત્રાલયના અહેવાલ મુજબ, એલએસીના સરહદી વિસ્તારો અને પરંપરાગત ટ્રેનિંગ વિસ્તારોમાં હવે કમ્બાઈન્ડ આર્મ્સ બ્રિગેડ આકારની માત્ર 10 ટુકડીઓ જ તૈનાત રહી છે. આ સાથે જ સંરક્ષણ મંત્રાલયે સ્પષ્ટ કર્યું છે કે એલએસીના તમામ સેક્ટરોમાં ભારતીય સેનાની સ્થિતિ અત્યંત મજબૂત છે અને કોઈપણ આકસ્મિક પરિસ્થિતિને પહોંચી વળવા માટે સેના સંપૂર્ણ સજ્જ છે.
ચીની દળોની ઘટાડા પાછળ બંને દેશો વચ્ચે સતત ચાલી રહેલી રાજકીય, કૂટનીતિક અને સૈન્ય સ્તરની બેઠકો જવાબદાર માનવામાં આવી રહી છે. મંત્રાલયના જણાવ્યા મુજબ, આ પગલાથી ઉત્તરીય સરહદો પર વધુ સ્થિરતા લાવવામાં મદદ મળી છે. વર્ષ 2024 અને 2025 દરમિયાન ભારત અને ચીને સંવાદના તમામ માધ્યમોને પુનઃજીવિત કર્યા હતા. આ અંતર્ગત વર્કિંગ મેકેનિઝમ ફોર કન્સલ્ટેશન એન્ડ કોઓર્ડિનેશન (WMCC)ની 33મી અને 34મી રાઉન્ડની બેઠકો માર્ચ અને જુલાઈ 2025માં યોજાઈ હતી. તદુપરાંત, સીમા વિવાદ પર વિશેષ પ્રતિનિધિઓની બેઠકો પણ ડિસેમ્બર 2024 અને ઓગસ્ટ 2025માં યોજવામાં આવી હતી.
ઓગસ્ટ 2025માં તિયાનજિન ખાતે યોજાયેલી શંઘાઈ સહયોગ સંગઠન સમિટ દરમિયાન વડાપ્રધાન નરેન્દ્ર મોદીની ચીન યાત્રાથી દ્વિપક્ષીય સંબંધોને વધુ બળ મળ્યું હતું. સૈન્ય સ્તરે પૂર્વ લદ્દાખમાં 23મી કોર કમાન્ડર સ્તરની વાટાઘાટો પણ સફળ રહી હતી. હાલ સરહદ પર અધિકારીઓની બેઠકો હાર્દિક અને મૈત્રીપૂર્ણ વાતાવરણમાં થઈ રહી છે.
-
બ્રિક્સ સમિટમાં પીએમ મોદી અને શી જિનપિંગ વચ્ચે મહત્વની બેઠક
તાજેતરમાં નવી દિલ્હી ખાતે આયોજિત બ્રિક્સ સમિટ દરમિયાન વડાપ્રધાન નરેન્દ્ર મોદી અને ચીનના રાષ્ટ્રપતિ શી જિનપિંગ વચ્ચે 50 મિનિટથી વધુ સમય સુધી દ્વિપક્ષીય બેઠક યોજાઈ હતી. પીએમ મોદીએ બેઠક દરમિયાન બંને દેશો વચ્ચેના સહયોગ પર ભાર મૂક્યો હતો. રાષ્ટ્રપતિ શી જિનપિંગે જણાવ્યું હતું કે, “ચીન ભારત સાથેના સંબંધોને વ્યાપક અને વ્યૂહાત્મક દ્રષ્ટિકોણથી જુએ છે. વૈશ્વિક પડકારો વચ્ચે વિશ્વના બે સૌથી વધુ વસ્તી ધરાવતા દેશો તરીકે ભારત અને ચીનની જવાબદારી અત્યંત મહત્વપૂર્ણ છે.” લાંબા સમયથી ચાલી રહેલા સરહદી તણાવ બાદ આ ઘટનાક્રમ દક્ષિણ એશિયાની શાંતિ અને સ્થિરતા માટે અત્યંત મહત્વનો સાબિત થશે.
