અમદાવાદ,7 જાન્યુઆરી 2026: Jamnagar MP Poonam Mandam’s assets increase by Rs 130 crore in 10 years એસોસિએશન ફોર ડેમોક્રેટિક રિફોર્મ (ADR)ના જાહેર કરેલા રિપોર્ટ મુજબ 102 સાંસદોએ વખતો વખત ફાઇલ કરેલા સોગંદનામાનામાં જાહેર કરેલી સંપત્તીનું વિશ્લેષણ કર્યુ છે. 2014 થી 2024 વચ્ચેના રિપીટ થયેલા દેશના કુલ 103 સાંસદોમાંથી 102 સાંસદોની મિલકતમાં થયેલા ફેરફાર અંગે એક રિપોર્ટ જાહેર કરવામાં આવ્યો છે. આ રિપોર્ટ પ્રમાણે 2014માં આ સાંસદોની સરેરાશ મિલકત 15.76 કરોડ હતી, જે 2024માં વધીને 33.13 કરોડ થઈ છે. જો કે, ગુજરાતના રિપીટ 7 સાંસદોની વાત કરીએ તો જામનગરના સાંસદ પૂનમ માડમની મિલકતમાં 130 કરોડનો (747%) વધારો થયો છે, પરંતુ નવસારીના સાંસદ સી.આર. પાટીલની સંપત્તિમાં 34 કરોડનો (47%) ઘટાડો નોંધાયો છે.
દેશમાં 2014થી NDAનું શાસન છે. એસોસિયેશન ફોર ડેમોક્રેટિક રિફોર્મ દ્વારા આ 10 વર્ષના ગાળા દરમિયાન ગુજરાત સહિત દેશભરમાં રિપીટ થયેલા સાંસદોની સંપત્તિમાં થયેલા વધારા-ઘટાડાનું વિશ્લેષણ કરવામાં આવ્યું છે. આ ગાળા દરમિયાન ગુજરાતમાં સાત સાંસદ રિપીટ થયા છે, જેમાં જામનગરનાં સાંસદ પૂનમ માડમની સંપત્તિમાં 10 વર્ષ દરમિયાન 130 કરોડ રૂપિયાનો તોતિંગ વધારો જોવા મળ્યો છે. જ્યારે કેન્દ્રીય મંત્રી અને પૂર્વ ગુજરાત પ્રદેશ ભાજપ-પ્રમુખ સી.આર. પાટીલની સંપત્તિમાં આશ્ચર્યજનક રીતે 47 ટકાનો ઘટાડો જોવા મળ્યો છે.
છેલ્લી બે ટર્મ (2014-2019 અને 2019-2024) મુજબ દેશના જે સાંસદોની મિલકતમાં ધરખમ વધારો થયો છે તેવા 10 સાંસદોમાંથી મહારાષ્ટ્રના સતારા લોકસભા ક્ષેત્રના સાસંદ ઉદયન રાજે પ્રતાપસિંહ મહારાજ ભોંસલે છે. તેમની મિલકત 2014માં 60 કરોડથી વધીને 2024માં 162 કરોડ થઈ છે. તેમાં 268%નો વધારો થયો છે, બીજા ક્રમે ગુજરાતના જામનગરના સાંસદ પૂનમબેન માડમ છે. 2014માં તેમની મિલકત 17 કરોડ દર્શાવેલ હતી જે 2024માં વધીને (સોગંદનામા અનુસાર) 147 કરોડ થઈ છે. એટલે તેમાં 130 કરોડનો તોતિંગ વધારો થયો છે. તમામ વિગતો ADR દ્વારા 2014, 2019 અને 2024ના સોગંદનામા પરથી લીધી છે. છેલ્લાં 10 વર્ષમાં રિપીટ થયેલા સાંસદોની સરેરાશ મિલકતમાં રૂ. 17.36 કરોડનો વધારો થયો છે. 2014માં સરેરાશ મિલકત રૂ. 15.76 કરોડ હતી, જે 2024માં વધીને સરેરાશ રૂ. 33.13 કરોડ થઈ ગઈ છે. ટકાવારની દૃષ્ટિએ જોઈએ તો આ વધારો 110 ટકા જેટલો છે. જ્યારે કચ્છના સાંસદ વિનોદભાઈ લખાભાઈ ચાવડાની મિલકતમાં સૌથી મોટો ટકાવારી ફેરફાર જોવા મળ્યો છે. 2014 માં ₹56 લાખથી વધીને 2024માં મિલકત ₹7 કરોડ થી વધુ થઈ છે, જે 1163% નો વધારો થયો છે.
